Учора ў мінскіх вернікаў рыма-каталіцкага веравызнання адбылася гістарычная падзея — у мікрараёне Новая Баравая канцэкраваны (пасвечаны і адчынены) новы храм — касцёл Святога Францішка.
Ва ўрачыстасцях прынялі дзесяткі жыхароў гэтага мікрараёна і Уручча, былой вёскі Копішча, вернікаў іншых парафій, біскупаў і святароў мінскіх касцёлаў, манахі-францішкане, канцэлебранты. Узначалілі цэлебрацыю і святочную імшу Апостальскі нунцый ў Беларусі арцыбіскуп Антэ Ёзіч і мітрапаліт Мінска-Магілёўскі арцыбіскуп Юзаф Станеўскі. Прысутныя ўбачылі намашчэнне алтара і сцен святыні, іх акаджванне і асвятленне, сталі сведкамі, як засцілаецца алтар першым абрусам (ён вытканы з лёну і ўпрыгожаны народным арнаментам), як запальваюцца свечкі для цэлебрацыі Эўхарыстыі.
У новым асвечаным храме прайшла першая камунія, велічна і радасна спяваў парафіяльны хор, гучаў арган і струнны квартэт. Па завяршэнні набажэнства на фоне касцёльных сцен адбылася агульная фотасэсія ўсіх удзельнікаў падзеі. Свята працягвалася да змяркання — на прасторным падворку кляштара, дзе была ўсталяваная сцэна і працавала гульнявая дзіцячая пляцоўка. Прайшлі два канцэрты з удзелам аматарскіх і прафесіянальных музычных і спеўных калектываў. Выступалі моладзевыя гурты з духоўных цэнтраў Слуцка, Докшыц, Ліды, а таксама Дзяржаўны камерны хор Беларусі. Гучала і традыцыйная беларуская музыка – гурт «Пава», спеўныя ансамблі «Transitus» (парафія Святога Францішка) і «Verbum Dei», гурт «Росквіт». Іграў на аргане вядомы арганіст Юрый Габрусь.
Парафія Святога Францішка ўзнікла два дзесяткі гадоў таму, а будаўніцтва храмавага комплекса (касцёл і кляштар) пачалося ў 2014-м. Храм будаваўся выключна з айчынных будматэрыялаў. На свяце ўшанавалі парафіян і духоўных асоб, якія шмат гадоў плённа шчыравалі над ўзвядзеннем гэтай святыні, што гарманічна ўпісваецца ў сучасную архітэктурную прастору новага мікрараёна. Былы мітрапаліт арцыбіскуп Тадэуш Кандрусевіч, пры якім пачыналася ўзвядзенне храма, у сваім звароце красамоўна і вобразна назваў святочную падзею «хрысцінамі касцёла».
Анатоль КЛЯШЧУК
Фота аўтара
З пачаткам навучальнага года рэгіструецца і рост захваральнасці на рэспіраторныя інфекцыі.
Як адзначаюць фінансавыя эксперты, рынак жылой нерухомасці выйшаў на беспрэцэдэнтна высокія паказчыкі па колькасці здзелак.
З рэжысёрам «Кіношнікаў» — наша размова пра мары і іх увасабленне ў рэальнасць.
Хто здолее змяніць гісторыю ці змяніцца пад яе ўплывам?
