Некалькі год таму ў Свіслачы перастала дзейнічаць СШ № 3. Школьнікі і педагогі былі пераведзены ў бліжэйшую школу. Трохпавярховы будынак некалькі год пуставаў, потым быў перададзены на баланс мясцовай спартыўнай школе. І ў хуткім часе ў адноўленым будынку размясціліся і спартыўная школа, і раённы фізкультурна-аздараўленчы комплекс, і цэнтр творчасці дзяцей і моладзі.
Па словах старшыні Свіслацкага раённага Савета дэпутатаў Віктара Суботкі, мясцовыя ўлады хутка вярнулі пусты будынак у гаспадарчы зварот.
Зараз аб’ект запатрабаваны. Тут створаны адпаведныя ўмовы для заняткаў спортам, творчага развіцця дзяцей і моладзі. У гуртках і секцыях займаецца палова ўсіх дзяцей раёна. Гэта добрая база для падрыхтоўкі будучых спартсменаў, магчымасць праявіць свае здольнасці.
Дзейнічаюць трэнажорная, барцоўская, валейбольная і баскетбольная залы, більярдная, фітнес-клуб, ёсць настольны тэніс.
Работы па рамонту і абсталяванні спартыўнага цэнтра вяліся пры дапамозе Гродзенскага аблвыканкама, Міністэрства спорту і турызму, а таксама спонсараў. На аднаўленне будынка і закупку трэнажораў было накіравана 500 тысяч рублёў. Спартыўны інвентар набывалі за кошт сродкаў Гродзенскага абласнога ўпраўлення спорту і турызму. Адтуль паступіла 5 тысяч рублёў.
Кошты заняткаў даволі дэмакратычныя. Інспектар спорту і турызму Свіслацкага райвыканкама Валерыя Хаванская паведаміла пра гнуткую сістэму зніжак. Напрыклад, калі чалавек купляе тры месяцы запар абанемент, чацвёрты атрымлівае бясплатна. Кошт абанемента ад 15 да 25 рублёў, у залежнасці ад залы. Для пенсіянераў зніжка 50 %, для інвалідаў — бясплатнае наведванне. На тэнісных сталах за 1 гадзіну — 1 рубель. Аплата сапраўды чыста сімвалічная. У фітнес-зале ёсць інструктар-метадыст. Найбольш папулярныя — трэнажоры, фітнэс, настольны тэніс. Наведвальнікі аддаюць перавагу вячэрнім заняткам.
—У Свіслачы неаднаразова ўздымаліся пытанні абсталявання трэнажорных залаў для заняткаў спортам, — зазначыла Валерыя Хаванская. — І залы не прастойваюць, іх запатрабаванасць відавочная. За мінулы год было набыта 400 абанементаў, з пачатку бягучага — больш за 160.
Трэці паверх былой школы заняў цэнтр творчасці дзяцей і моладзі, які пераехаў сюды з аварыйнага старога будынка.
— Той будынак, дзе мы раней знаходзіліся, ужо не адпавядаў сучасным патрабаванням. Таму мы з задавальненнем пераехалі сюды, дзе для нас была падрыхтавана адпаведная база, зроблены рамонт. Калі мы сюды пераехалі, у нас палепшыліся ўмовы прадастаўлення дадатковых адукацыйных паслуг. Будынак у самым цэнтры горада, у крокавай дасяжнасці ад устаноў адукацыі. Адразу з’явілася больш жадаючых наведваць гурткі па інтарэсах. З’явіўся новы камп’ютарны клас. Нашы дзеці ўдзельнічаюць у розных конкурсах, напрыклад, сталі пераможцамі конкурсу МНС «Выратавальнік будучага» на абласным этапе і дыпламантамі на рэспубліцы. Сёлета прынялі ўдзел у конкурсе робататэхнікі і прывезлі дыпломы 2 і 3 ступені, — расказала дырэктар цэнтра творчасці дзяцей і моладзі Свіслачы Жанна Бычык.
Зараз тут працуюць дзесяць гурткоў. Дзеці займаюцца радыёэлектронікай, пясочнай анімацыяй, тэстапластыкай, выяўленчым мастацтвам, дэкаратыўна-прыкладной творчасцю, тэкстыльнымі цацкамі, арыгамі, музычнай падрыхтоўкай і не толькі. Адукацыйны цэнтр працуе шэсць дзён на тыдзень, многія дзеці прыходзяць на заняткі ў суботу. Па словах кіраўніка цэнтра, на базе новай установы з’явілася магчымасць праводзіць больш раённых мерапрыемстваў. Тут праходзяць дні сельскага школьніка, дыялогавыя пляцоўкі, вучоба лідарскага актыву, майстар-класы, гульні.
Па словах старшыні Свіслацкага райсавета дэпутатаў Віктара Суботкі, мясцовыя ўлады імкнуліся максімальна задаволіць пажаданні і патрэбы жыхароў раёна. Менавіта з такім прыцэлам і стваралася спартыўная і адукацыйная база новага цэнтра. З улікам вопыту работы і заявак гараджан база будзе ўдасканальвацца, запэўніў старшыня райсавета.
Маргарыта УШКЕВІЧ
Фота аўтара
Відэаназіранне, празмерныя запыты, публічнае распаўсюджванне.
Ацяпляльныя «лайфхакі» вяскоўцаў.
