Вы тут

Дыялог пакаленняў


Сустрэча са старшынёй Пастаяннай камісіі Савета Рэспублікі па эканоміцы, бюджэце і фінансах, а таксама ўрачыстая цырымонія ўручэння маладзёжных білетаў адбылася ў верхняй палаце парламента. Маладыя людзі атрымалі магчымасць не проста пабываць у будынку дзяржаўнага органа, дзе прымаюцца адны з найважнейшых рашэнняў у краіне, але і пазнаёміцца з гісторыяй Савета Рэспублікі.


Найлепшыя ўражанні ў маладых людзей засталіся і ад сустрэчы са старшынёй Пастаяннай камісіі Савета Рэспублікі па эканоміцы, бюджэце і фінансах. Сам фармат дыялогу, які прапанавала Таццяна Рунец, прыйшоўся моладзі даспадобы. Член прэзідыума верхняй палаты парламента максімальна даступна і зразумела расказала моладзі пра структуру Савета Рэспублікі, задачы, якія вырашае дзяржаўны орган, над якімі законапраектамі сенатары працуюць у цяперашні час.

Адказала парламентарый і на пытанні школьнікаў. У прыватнасці, іх цікавіла, як стаць удзельнікам патрыятычнага праекта «Цягнік Памяці». Таксама маладыя людзі хацелі даведацца пра сучасныя формы патрыятычнага выхавання насельніцтва, заканадаўчую дзейнасць парламентарыяў. Шчырай Таццяна Рунец была і падчас адказу на пытанні асабістага характару. Сенатар згадала, пры якіх абставінах у свой час ёй уручалі камсамольскі білет, расказала, кім марыла стаць у дзяцінстве, падзялілася падзеяй, якая стала найбольш запамінальнай. Ведаючы, што старшыня Пастаяннай камісіі любіць чытаць, школьнікі пацікавіліся, ці ёсць у Таццяны Рунец любімая кніга, і папрасілі парады, дзе можна адпачыць у Беларусі.

У сваю чаргу, сенатар задавала сустрэчныя пытанні, адзначала, на што важна звярнуць увагу сучаснай моладзі. Галоўнае, па яе словах, каб маладыя людзі любілі сваю краіну і прыслухоўваліся да бацькоў, якія жадаюць ім толькі найлепшага.

Як адзначыла Таццяна Рунец у размове з карэспандэнтам «Звязды», ва ўзаемадзеянні з моладдзю патрэбна апрабаваць усе фарматы. «Увогуле, з маладымі людзьмі трэба размаўляць, — лічыць Таццяна Рунец. — Прычым на роўных, на адной мове. Часам нават і парады папрасіць. Без павучанняў. З павучаннямі моладзь не заўсёды ўспрымае інфармацыю».

Паводле яе слоў, сустрэчы з моладдзю вельмі важныя. «Хаця б для таго, каб сувязь пакаленняў не была страчана, — акцэнтавала ўвагу сенатар. — Як кажа наш Прэзідэнт, моладзь — гэта звяно, якое звязвае. Ім будаваць нашу краіну, заўтра гэтыя маладыя людзі прыйдуць на кіруючыя пасады. Па меншай меры, такія сустрэчы закладваюць пэўны падмурак, у тым ліку сямейных традыцыйных каштоўнасцяў. Ва ўсім свеце навязваюць нетрадыцыйныя каштоўнасці, а мы павінны расказаць, што з'яўляецца асновай сям'і, асновай нашага грамадства. Я заўсёды кажу нашай моладзі, што трэба любіць людзей і не быць абыякавымі. Калі мы будзем абыякавымі, мы нічога не пабудуем».

Таццяна Рунец падкрэсліла, што ў нашай краіне рабоце з моладдзю ўдзяляецца вельмі вялікая ўвага. «Узяць хаця б 18 ваенна-патрыятычных клубаў, створаных на базе воінскіх часцей, — удакладніла парламентарый. — Думаю, што гэта яшчэ не мяжа і падобныя клубы будуць стварацца далей».

Сенатар засталася задаволеная сустрэчай з актывам БРСМ Маскоўскага раёна. «Спрабавала простай мовай расказаць моладзі аб тым, чым займаюцца члены Савета Рэспублікі, — заўважыла Таццяна Рунец. — У сілу свайго ўзросту яны яшчэ не ўсё могуць зразумець. Аднак, у любым выпадку, гэтая сустрэча ім запомніцца. Па-першае, таму што адбылася яна ў Савеце Рэспублікі. Па-другое, што ў гэтай дзяржаўнай установе ім уручылі членскі білет БРСМ. Спадзяюся, што карыснай для іх была і наша размова. Дыялог пакаленняў — гэта таксама свайго роду падмурак, які мы закладваем для далейшага развіцця нашай дзяржавы».

Вераніка КАНЮТА

Выбар рэдакцыі

Грамадства

Час клопату садаводаў: на якія сарты пладовых і ягадных культур варта звярнуць увагу?

Час клопату садаводаў: на якія сарты пладовых і ягадных культур варта звярнуць увагу?

Выбар саджанца для садавода — той момант, значнасць якога складана пераацаніць.

Культура

Чым сёлета будзе здзіўляць наведвальнікаў «Славянскі базар у Віцебску»?

Чым сёлета будзе здзіўляць наведвальнікаў «Славянскі базар у Віцебску»?

Канцэрт для дзяцей і моладзі, пластычны спектакль Ягора Дружыніна і «Рок-панарама».