Да 100 наведвальнікаў у хвіліну фіксавалі на ўваходзе на выстаўку «Беларусь інтэлектуальная», калі яна праходзіла ў сталічным выставачным комплексе «БелЭкспа». Пра гэта расказаў журналістам дырэктар Цэнтра сістэмнага аналізу і стратэгічных даследаванняў Нацыянальнай акадэміі навук Беларусі Валерый ГАНЧАРОЎ.
— Выстаўка «Беларусь інтэлектуальная» была арганізавана па даручэнні кіраўніка дзяржавы. Яна прайшла з вялікім поспехам у Мінску, Гомелі, Магілёве і Віцебску, далей яе чакаюць у Гродне і Брэсце. Ідэя выстаўкі нарадзілася пасля ІІ з'езда беларускіх вучоных. У стратэгіі «Навука і тэхналогіі: 2018—2040» мы прапісалі «Беларусь інтэлектуальную» як тую мадэль грамадства, да якой будзем імкнуцца. Натуральна, што і мерапрыемствы, асабліва нацыянальнага маштабу, праводзім менавіта пад гэтым лагатыпам. Калі Нацыянальнай акадэміі навук было даручана арганізаваць дэманстрацыю апошніх дасягненняў навукі, мы скарысталіся выпадкам, каб яшчэ раз прасунуць нашу місію — пераўтварыць Беларусь у краіну з высокім інтэлектам. Інтэлект павінен быць галоўным фактарам вытворчасці. Менавіта на гэта мы робім упор, — падкрэсліў Валерый Ганчароў. — Экспазіцыя была арганізавана па кластарах, якія адлюстроўваюць галоўныя трэнды ў беларускай і сусветнай навуцы: у іх ліку — штучны інтэлект, ІT-тэхналогіі, робататэхніка; інавацыйнае прыборабудаванне; электратранспарт і яго базавыя кампаненты; абараназдольнасць і ваенная навука; экалогія, прыродакарыстанне; біятэхналогіі; фармацыя, ахова здароўя, медыцына; аграпрамысловы комплекс, харчаванне; прастора маладзёжных ініцыятыў. Цэнтральнае ядро склалі топавыя распрацоўкі, атрыманыя ў апошнія гады, якія вылучаюцца найвышэйшым сусветным узроўнем навізны, а па перыферыі размясцілі распрацоўкі, якія ўжо актыўна прымяняюцца ў розных сферах нашага жыцця і эканоміцы.
Адпрацаваную на сталічнай пляцоўцы канцэпцыю зараз прасоўваюць у абласных цэнтрах, паказваючы, апроч іншага, і развіццё рэгіянальнай навукі. Экспазіцыя ў кожным рэгіёне мае свой унікальны складнік, таму што там дзейнічаюць свае прадпрыемствы, навуковыя, адукацыйныя ўстановы і тэхнапаркі. Напрыклад, у Гомелі было прадстаўлена больш як 100 уласных экспанатаў, а наведалі экспазіцыю больш за 50 тысяч чалавек.
— Мы стараемся максімальна захаваць пераемнасць выстаўкі, каб кожны наведвальнік атрымаў дакладнае ўяўленне аб тым, як развіваецца і агульнанацыянальная, і рэгіянальная навука, — патлумачыў дырэктар Цэнтра сістэмнага аналізу і стратэгічных даследаванняў НАН Беларусі. — У абласных цэнтрах запланавана дадатковая дэманстрацыя менавіта мясцовых распрацовак. Некаторыя ўключаюць у склад ужо дзеючых кластараў, а іншыя размяшчаюць асобна, таму што рэгіянальны кантэкст вельмі спецыфічны. Мы дапамагаем калегам у рэгіёнах не толькі ў плане адбору распрацовак, але і ў максімальна выгаднай падачы экспанатаў. Таму што адна справа — проста паставіць на стэндзе скрыначку з лазерам, і зусім іншая — паказаць наведвальнікам, як ён працуе і дзе можа прымяняцца гэта тэхналогія.
Па словах Валерыя Ганчарова, паглядзець топавыя экспанаты на выстаўцы можна і за паўгадзіны, але ж калі прыглядацца, задаваць пытанні і атрымліваць адказы — гэта займае да трох гадзін. Фармат выставы дазваляе атрымаць інфармацыю як у сціснутым выглядзе, так і ў разгорнутым. Гэта залежыць выключна ад жадання і інтарэсаў наведвальніка.
16—19 сакавіка выстаўка «Беларусь інтэлектуальная» пройдзе ў Гродне.
— Яна разгорнецца ў Цэнтральным спартыўным комплексе па вуліцы Камунальная, — расказаў журналістам старшыня камітэта эканомікі Гродзенскага абласнога выканаўчага камітэта Аляксандр КАМЕНДАНТ. — Там пачаліся арганізацыйныя мерапрыемствы, частка абсталявання ўжо знаходзіцца ў Гродне. Бліжэй да выхадных пачнецца запаўненне выставачнай прасторы. Стараемся арганізаваць усё на годным узроўні. Мы бачым цікавасць з боку грамадзян, да нас ужо паступаюць званкі ад ахвотных і ўдзельнічаць, і наведаць экспазіцыю. Лічу, што ў першую чаргу дасягненні навукі трэба дэманстраваць нашым дзецям, але выстаўка, безумоўна, будзе цікавая ўсім.
Як заўважыў Валерый Ганчароў, Цэнтральны спартыўны комплекс у Гродне — вельмі цікавае па канфігурацыі збудаванне: «Шчыра кажу, што гэта быў выклік для нас — як размясціць там экспазіцыю выстаўкі. Мы заўсёды прадумваем аптымальны маршрут для наведвальнікаў. Дык вось у Гродне гэты маршрут будзе ўнікальны, таму раю наведаць выстаўку нават тым, хто ўжо знаёміўся з ёй у іншых абласных цэнтрах».
А фінішуе выстаўка «Беларусь інтэлектуальная» ў Брэсце. Старшыня камітэта эканомікі Брэсцкага абласнога выканаўчага камітэта Наталля АЛЯХНОВІЧ паабяцала, што будзе зроблена ўсё, каб мясцовым жыхарам было цікава яе наведаць.
Надзея НІКАЛАЕВА
Васілеўскія такія: на Зямлі і ў космасе ліхія!
Ідэнтычнасць праз спадчыну.
Беларусь — у тройцы лідараў па захваральнасці.