Паштэт з крабавых палачак, селядзец у слоіку і карысць гушчы ад кавы

Паштэт з крабавых палачак

Паштэт — выдатны спосаб разнастаіць свой сняданак або перакус. Звычайна такая страва гатуецца з печані ці мяснога філе. Але не менш смачным будзе паштэт з крабавых палачак з дабаўленнем тварагу і салодкага перцу.

Спатрэбіцца: крабавыя палачкі — 6 шт.; тварог — 100 г; салодкая молатая папрыка — 0,5 ч. л.; смятана — 1 ст. л.; часнок — 1 зубок; кроп — 2 галінкі; балгарскі перац — 0,5 шт.; соль — на смак.

Кроп дробна пасекчы. Змяшаць яго са смятанай. Дадаць тварог з молатай папрыкай. Добра перацерці інгрэдыенты відэльцам. Здрабніць часнок і крабавыя палачкі. Дробна-дробна нашаткаваць палоўку балгарскага перцу. Перчык з часнаком і крабавымі палачкамі можна перамяшаць з дапамогай блэндара, тады маса атрымаецца больш аднастайнай.

Змяшаць усё і прысаліць.

Гатовы паштэт перакласці ў шкляную ёмістасць і адправіць хоць бы на гадзіну ў холад. Тады страва будзе гусцейшай і шчыльнейшай.

З паказанай колькасці прадуктаў паштэту атрымліваецца слоічак аб'ёмам 200 мл.

Селядзец у слоіку

Спатрэбіцца: селядзец — 3—5 штук (у залежнасці ад памеру); для расолу — 2 літры вады, 6 сталовых лыжак солі, 2 сталовыя лыжкі цукру, перац гарошкам і лаўровы ліст.

У ваду пакласці соль, цукар, перац і лаўровы ліст, давесці да кіпення і астудзіць расол.

Цэлыя рыбіны размарозіць, прамыць вадой і змясціць у трохлітровы слоік.

Заліць халодным растворам. Закруціць і прыбраць у халадзільнік. Праз тры дні далікатны маласольны селядзец гатовы. Чым больш ён ляжыць у расоле, тым больш падобны на рыбку сапраўднага бочкавага пасолу!

Дэсерт з манкі з мандарынамі

На смак вельмі нагадвае далікатны фруктовы крэм.

Спатрэбіцца: мандарыны — 10-11 штук, манныя крупы — 100 г.

Мандарыны (лепш узяць сорт «клеменцін», яны больш салодкія) абіраем. У выніку павінна атрымацца 400 г абабранай садавіны. Затым разбіраем на долькі і максімальна пазбаўляемся ад перагародак, семечак, калі трапляюцца. Адпраўляем мандарыны ў блэндар. Трэба здрабніць іх як мага лепш. Мандарынавая маса павінна атрымацца максімальна аднастайнай кансістэнцыі.

Гатовае пюрэ з мандарынаў перакладваем у посуд з тоўстым дном. Дадаём 100 г манных круп. Інгрэдыенты старанна змешваем і ставім на пліту. Калі мандарыны з кіслінкай, дадаём на смак цукар.

Увесь час памешваючы, варым масу да загусцення. Працэс займае 5—10 хвілін.

Густую масу здымаем з агню і перакладваем у форму, загадзя засланую пергаментнай паперай. Акуратна выраўноўваем паверхню дэсерту з дапамогай лыжкі ці лапаткі.

Форму зацягваем харчовай плёнкай і прыбіраем у халадзільнік на 2-3 гадзіны.

Застылы дэсерт дастаём з формы і наразаем на парцыённыя кавалачкі.

Кожны кавалачак можна абкачаць у вафельнай крошцы ці какосавай стружцы. Гэта зусім не абавязкова, але выглядае эфэктна. Таксама ў якасці абсыпкі можна выкарыстоўваць здробненыя арэхі ці печыва.

Гушча ад кавы — выдатная сыравіна

Кававая гушча падыходзіць для мноства розных мэт. Часта яе выкарыстоўваюць у быце.

• Гушча ад кавы — прыродны араматызатар. Калі давялося доўга гатаваць і рукі набраліся паху цыбулі ці часнаку, можна нацерці іх вільготнай кававай гушчай.
• Самае незвычайнае выкарыстанне кававай гушчы — мыццё посуду. За кошт сваіх маленькіх абразіўных часцінак сродак выдатна спраўляецца з любымі забрудненнямі нароўні з содай ці бытавой хіміяй. Адціраць патэльні і каструлі кававай гушчай — адно задавальненне. Посуд будзе блішчаць, ніякай хіміі. Да таго ж рукі пасля кантакту з гушчай стануць гладкімі і далікатнымі.
• Кававая гушча — добрае ўгнаенне. Яна насычае зямлю карыснымі рэчывамі. Можна ўгнойваць гэтым сродкам не толькі пакаёвыя расліны, але і глебу ў садзе. Акрамя таго, кававы пах адпужвае шкоднікаў, напрыклад, смаўжоў. Калі на ўчастку з'яўляецца шмат мурашнікаў, іх можна засыпаць кававай гушчай. Мурашкі пачнуць перасяляцца ў іншае месца. Таксама дадаюць кававую гушчу ў ваду для паліву пакаёвых раслін.
• Дадаць кававую гушчу ў попельніцу — вось гэта ідэя! Пах дыму тут жа знікне. Таксама кава выдатна ўбірае ў сябе ўсе пахі ў халадзільніку і кухонных шафках. Каб пазбегнуць цвілі на гушчы, яе трэба прасушыць перад выкарыстаннем з мэтай асвяжыць паветра.
• Усё ведаюць, як добра кава афарбоўвае тканіну: праліўшы некалькі кропель на белую кашулю, адчуваеш безнадзейнасць сітуацыі. Але гэту ўласцівасць можна ўжыць з карысцю. Напрыклад, пафарбаваць кававай гушчай велікодныя яйкі.
• Цёмны кававы экстракт з поспехам замаскіруе драпіны на мэблі. Трэба ўсяго толькі нанесці вільготную гушчу на ватны тампон і добра пацерці паверхню. Вынік парадуе!
• Лайфхак для тых, у каго ёсць камін. Вільготная кававая гушча выратуе ад раскіданага попелу. Гушча звязвае попел і не дае яму разлятацца. Акрамя таго, калі дровы дагараць, пах дыму будзе прыглушаны кававым водарам.
• Можна выкарыстоўваць гушчу як маску-кандыцыянер для валасоў — нанясіце яе на вільготныя валасы, пакіньце на 10 хвілін. Аб'ём і шаўкавістасць валасоў — гарантаваныя! І прыемны пах як бонус.
• Гарачае, прыгатаванае з кававай гушчай, — гэта неверагодна смачна. Запечанае ў кававай гушчы мяса зрабіць лёгка. Дадайце ў свае рэцэпты арыгінальнасці!