Святлана Міхайлаўна працуе настаўніцай пачатковых класаў. Пра такіх, як яна, кажуць «педагог ад Бога». Штораз, калі расказвае пра сваіх дзяцей, адчуваецца, як яна іх любіць, шкадуе. Прынамсі, у мяне з галавы не выходзіць гісторыя пра двух брацікаў. Іх бацькі разышліся і стварылі новыя сем'і. Хлопчыкі засталіся жыць з татам і яго новай жонкай — цёцяй Верай. З мамай бачацца толькі па выхадных. «Неяк на ўроку старэйшы з іх сядзіць і плача, — распавядае Святлана Міхайлаўна. — «Ягор, чаму ты плачаш?» — пытаюся. «А ён па маме сумуе», — падказаў хтосьці з дзяцей. «Ну, ідзі сюды», — кажу. Пасадзіла я свайго трэцякласніка на калена, пагладзіла па галаве: «Ведаеш, Ягорка, тыдзень вельмі хутка заканчваецца. Калі ты будзеш сябе добра паводзіць, дык ён яшчэ хутчэй праляціць». Пасля гэтых слоў настрой у дзіцяці прыўзняўся». У класе ў Святланы Міхайлаўны вучацца дзеці з розных сем'яў. «Многім, адчуваецца, дома не хапае ўвагі. Падыдуць, бывае, штосьці спытаць, галаву на плячо пакладуць... Таму я і ўвяла традыцыю — абдымацца кожную раніцу. Заходжу ў клас пасля першага званка са словамі: «Ну, хадзіце, будзем абдымацца». Спачатку ўсе абдымаюцца са мной, потым — паміж сабой. Пасля таго садзяцца за парты задаволеныя, з усмешкамі».
Даказана, што абдымкі не толькі выклікаюць станоўчыя эмоцыі, але і, як вітамінкі, павышаюць імунітэт. Менавіта таму педыятры раяць бацькам абдымаць сваіх дзетак як мага часцей. Не так даўно я слухала чарговы вэбінар на бацькоўска-дзіцячую тэму, дзе псіхолаг папрасіла палічыць, колькі разоў у дзень мы цалуем і абдымаем дзіця, а колькі разоў у дзень сварымся і робім яму заўвагі. Калі колькасць першых і другіх дзеянняў прыкладна аднолькавая, трэба як мага хутчэй мяняць суадносіны на карысць абдымкаў і пацалункаў. Бо дзіця, якое не атрымала патрэбную колькасць пяшчоты, можа вырасці агрэсіўным і замкнёным, няздольным на эмпатыю. Паводле даных статыстыкі, амаль 80 % забойцаў і 75 % гвалтаўнікоў у дзяцінстве былі пазбаўленыя бацькоўскай любові.
21 студзеня ва ўсім свеце адзначаецца адно з самых добрых свят — Міжнародны дзень абдымкаў. Згодна з традыцыяй, удзельнікі руху «Бясплатныя абдымкі» выходзяць на вуліцы гарадоў і прапаноўваюць свае абдымкі мінакам. Я таксама гадоў шэсць таму зусім выпадкова прычынілася да яе: выйшла на абед і сустрэла маладых людзей з плакатамі з надпісамі «Давай абнімемся», «Мяняю абдымкі на ўсмешку!». Пасля тых абдымкаў на душы сапраўды стала неяк сонечна, нягледзячы на тое, што на вуліцы было змрочна і марозна. З'явілася свята ў 2004 годзе, прыдумаў яго аўстраліец Хуан Ман. Аднойчы ён прызямліўся ў Сіднэйскім аэрапорце, але там яго ніхто не сустракаў. Малады чалавек засмуціўся, бо вакол усе абдымаліся. Тады ён напісаў на лісце кардону з абодвух бакоў «Free Hugs» («Бясплатныя абдымкі»). Спачатку людзі пазіралі на яго са здзіўленнем і абыходзілі бокам. Аднак потым падышла жанчына. Яна расказала, што раніцай у яе памёр сабака і ёй вельмі хочацца, каб яе хто-небудзь абняў. Хуан так і зрабіў, і на твары жанчыны з'явілася ўсмешка. З таго дня малады чалавек пачаў прапаноўваць абдымкі тым, хто меў у іх патрэбу. З цягам часу рух «бясплатных абдымкаў» распаўсюдзіўся па ўсім свеце.
«Ведаеце, што непакоіць мяне? Свет без абдымкаў!» — казаў канадскі акцёр і музыкант Раян Гослінг. І, як можа падацца на першы погляд, такая пагроза з'явілася падчас пандэміі, калі з-за страху заразіцца каранавірусам людзі пры сустрэчы перасталі абдымацца. Традыцыя абдымацца на вуліцы з незнаёмцамі і сёння, як для мяне, гучыць не надта актуальна, але ж у кожнага з нас ёсць блізкія людзі. Менавіта іх псіхолагі раяць абдымаць часцей без усялякай нагоды. Дзякуючы абдымкам адносіны з роднымі зробяцца яшчэ больш цёплымі. Дарэчы, у маёй сям'і ёсць добрая традыцыя: каб дзень прайшоў добра, мы з мужам, сынам і двума катамі пачынаем яго з абдымак катоў. Чаго і вам шчыра жадаем. Як мне аднойчы параіў знаёмы псіхатэрапеўт: правядзіце эксперымент, пастарайцеся абдымаць родных некалькі разоў на дзень — праз 30 дзён тэрапіі вы і самі не захочаце адмаўляцца ад гэтага рытуалу.
Надзея ДРЫНДРОЖЫК
Прэв’ю: pexels.com
А разам з імі навучанне, сацпакет і нават жыллё.
Беларусь — адзін з сусветных лідараў у галіне здабычы і глыбокай перапрацоўкі торфу.
«Мы зацікаўлены, каб да нас прыязджалі».