Вы тут

Кнігі для дзяцей і падлеткаў. Гісторыі пра сяброў — міфалагічных і рэальных


Ягор Конеў. Дамавічкі Шушык і Жуля. Мінск, Выдавецкі дом «Звязда», 2022

Ці ведаеце вы што-небудзь пра баль дамавічкоў? А хто такая Марэна і чаму яна невідушчая? Ягор Конеў напісаў новую кнігу пра забаўных і страшных істот з беларускага фальклору. Папярэдняя яго кніга «Прыгоды дамавічкоў» у Выдавецкім доме «Звязда» выйшла ажно трыма выданнямі, стаўшы сапраўдным бестселерам. 


Казачная гісторыя пераносіць чытача ў той час, калі ў хату да дамавічка Шушыка завітала бяздомная дамавушка Жуля. Сяброўства паміж імі напачатку зусім не склалася, але далейшыя падзеі прымусілі дамавічкоў, а дакладней упартага «аднаасобніка» Шушыка, хоцькі-няхоцькі шукаць паразуменне і згоду. Ды і хіба можна паасобку супрацьстаяць лютай Марэне, якая прыйшла ў вёску, каб знішчыць усё жывое? І пражэрлівы Кадук аказаўся пераможаны, бо дамавічкі не раз уратавалі адно аднаго ад пагібелі. Здолелі пераканаць Старога Лесавіка падзяліцца з імі старажытным закляццем, а спрацавала яно толькі таму, што Шушык і Жуля сталі нарэшце сапраўднымі сябрамі. Бо з выпакутаваных прызнанняў лясных нячысцікаў — і з уласнага досведу зведалі: калі дбаць адно пра сябе, «мусіш незлічонымі начамі сядзець у жальбе і наракаць на ўласную долю». 

Аўтар на аснове цікавага матэрыялу з народнай міфалогіі здолеў стварыць арыгінальную казку, якая распавядае пра важныя жыццёвыя каштоўнасці. Можна не сумнявацца, што і другая кніга пра незвычайных сяброў з вёскі Зарэчча прыйдзецца даспадобы чытачам. 

Алег Ждан-Пушкін. Урод. Мінск, Выдавецкі дом «Звязда», 2023

Два года таму ў Выдавецкім доме «Звязда» пабачыла свет кніга аўтара «Прынцэса» з падзагалоўкам «Маленькая аповесць з прызнаннем і загадкай» — пра васьмікласнікаў сталічнай школы, пра першую закаханасць і сяброўства. У сваёй новай кнізе Алег Ждан-Пушкін зноў звяртаецца да аўдыторыі чытачоў-падлеткаў. 

Увага да адчуванняў братоў нашых меншых, спроба паглядзець на чалавека іх вачыма, урэшце, пачуць іх крыўды на жорсткасць «гаспадара прыроды» маюць даўнюю традыцыю ў беларускай літаратуры. Дастаткова прыгадаць хрэстаматыйнае апавяданне «Сонечны зайчык» Вячаслава Адамчыка. У творах класікаў найчасцей сваё шчырае спачуванне прадстаўнікам царства жывёл, якія церпяць пакуты, выказваюць дзеці («Яшчэ раз першы снег» Янкі Брыля, «Алені» Івана Пташнікава). Маленькая аповесць Алега Ждана-Пушкіна «Урод» мае падзагаловак «Гісторыя сабакі, які марыў здзейсніць подзвіг» і створана ў рэчышчы гэтай класічнай традыцыі. Чатырохлапы герой твора мянушку «Урод» атрымаў ад людзей за сваю асаблівасць — занадта вялікія вушы. Сабака доўгі час бадзяўся, адусюль гнаны, пакуль не прыбіўся да лецішча, дзе адпачываў разам з бацькамі школьнік Андрэй. Ад хлопчыка і зазнаў паратунак: увосень Андрэю ўдалося ўгаварыць бацькоў забраць свайго вернага сябра з сабой у горад. З гэтага моманту ў сабакі пачалося новае, шчаслівае жыццё, у якім ён вывучае новы для сябе свет, разважае і марыць. 

Акрамя маленькай аповесці, у кнізе змешчаны аповеды «Ліпа ў нашым саду» і «Гукі флейты» — пра дабрыню і спагаду да тых, хто жыве побач і мае патрэбу ў дапамозе, абароне ці проста шчырай падтрымцы. 

Алена БРАВА

Выбар рэдакцыі

Грамадства

Час клопату садаводаў: на якія сарты пладовых і ягадных культур варта звярнуць увагу?

Час клопату садаводаў: на якія сарты пладовых і ягадных культур варта звярнуць увагу?

Выбар саджанца для садавода — той момант, значнасць якога складана пераацаніць.

Культура

Чым сёлета будзе здзіўляць наведвальнікаў «Славянскі базар у Віцебску»?

Чым сёлета будзе здзіўляць наведвальнікаў «Славянскі базар у Віцебску»?

Канцэрт для дзяцей і моладзі, пластычны спектакль Ягора Дружыніна і «Рок-панарама».