Правільна падрыхтавацца да аналізу крыві. Ці трэба здаваць кроў нашча?

Самы часты ў свеце аналіз, на які адпраўляюць ледзь не пры кожнай хваробе, гэта аналіз крыві. Урачы просяць не есці, не курыць, не жаваць жуйку і не выпіваць пару дзён да працэдуры. Ці праўда, што можна не катаваць сябе галадоўкай перад візітам на аналізы? Ці трэба здаваць кроў, калі нічога асабліва не турбуе?

Дык ці ёсць сэнс здаваць кроў нашча, або ўсё ж можна перад гэтым перакусіць? І ў тым, і ў другім выпадку большасць паказчыкаў акажацца амаль аднолькавымі, аднак у крыві, здадзенай пасля ежы, паказчыкі гемаглабіну, мачавой кіслаты і ліпазы будуць вышэйшымі. Праўда, усе тыя ваганні малаважныя, яны змяняюцца на працягу дня незалежна ад прыёму ежы.

А вось узровень глюкозы пасля сняданку падскочыць настолькі моцна, што «вылеціць» за межы нормы. Калі такія вынікі трапяць ў рукі доктара, ён будзе вымушаны паставіць дыягназ «цукровы дыябет». А яшчэ ў сываратцы знізіцца ўзровень гармону картызолу.

Каб вынікі аналізаў былі дакладнымі, з вечара нельга налягаць на тлустае і салодкае, а раніцай нельга ўжываць нават жавальную гумку, не кажучы пра бутэрброды. Аналізы могуць быць ілжывымі, калі здаваць кроў увечары. А калі прапусціць чарачку, гэта паўплывае на абменныя працэсы ў печані. Нават заняткі спортам лепш выключыць.

Многія прэпараты ўплываюць на склад крыві. Пасля рэнтгену і фізіятэрапіі кроў не здаюць некалькі дзён. Пасля фізічных нагрузак павялічваецца колькасць лейкацытаў і нейтрафілаў, якія могуць паказваць, што ў пацыента, напрыклад, ангіна. Таму перад здачай крыві трэба 20 хвілін адпачыць. Гэта лепш, чым здаваць кроў другі раз.

Дарэчы, кроў з пальца ў пацыентаў бяруць радзей, чым з вены.

Капілярная кроў прыдатная пераважна для агульнага аналізу, для падліку эрытрацытаў, трамбацытаў, лейкацытаў. Вянозная кроў дазваляе зрабіць большы спектр даследаванняў, вывучыць біяхімічныя параметры: агульны бялок, крэацінін, білірубін, ацаніць узровень алергенаў, антыцелаў.

Дык ці трэба ўсё ж здаваць аналіз крыві, калі нешта турбуе? Безумоўна. Нават агульны аналіз крыві для дасведчанага доктара вельмі інфарматыўны. Ён паказвае, як ажыццяўляецца абмен жалеза, вітамінаў группы В, што адбываецца з імунітэтам, ці ёсць у арганізме хранічная вірусная нагрузка. Біяхімічны аналіз крыві таксама многае можа расказаць — у тым ліку пра работу печані, яе эфектыўнасць і стан іншых органаў стрававання.

Алена КРАВЕЦ