Сёлета перад леснікамі стаяла задача папоўніць пасадкамі каля 640 пашкоджаных непагодай гектараў і высадзіць каля 40 тысяч гектараў новага лесу. Леснікі таксама намагаюцца аднавіць лагістычныя ланцужкі і знайсці новых партнёраў, а таксама новыя рынкі збыту, сярод якіх разглядаюцца азіяцкі і часткова афрыканскі напрамкі. А яшчэ рэспубліканскае ўнітарнае прадпрыемства «Белдзяржлес» распрацоўвае канцэпцыю па лічбавізацыі лясной галіны. Што ўжо робіцца і яшчэ адбудзецца ў гэтым кірунку, расказаў Аляксандр Драгун, першы намеснік міністра лясной гаспадаркі.
Гаворачы пра лічбавізацыю, леснікі маюць на ўвазе перавод у электронны выгляд многіх працэсаў, якія і так ужо ажыццяўляюцца сёння, то-бок, можна казаць, што разрознена лічбавізацыя адбываецца даўно, падкрэсліў спецыяліст:
— Дзейнічае, напрыклад, адзіная дзяржаўная аўтаматызаваная сістэма ўліку драўніны і здзелак з ёй. А таксама супрацьпажарная сістэма назірання за лясамі «Лясны вартавы», пад наглядам якой сёння знаходзіцца амаль 100 % тэрыторыі лясоў (больш за палову працуе ў аўтаматычным рэжыме). Для аховы лесу выкарыстоўваюцца фотапасткі і відэакамеры. Асабліва на месцах бураломаў, дзе былі сканцэнтраваны склады драўніны, каб захаваць яе ад крадзяжу. У пілотным варыянце існуе аўтаматызаваная сістэма лесааднаўлення, куды ўносяцца звесткі аб маладых лясах, наяўнасці пасадачнага матэрыялу. Лесарубныя білеты таксама выпісваюцца з выкарыстаннем розных праграмных прадуктаў. Праўда, пералічаныя праграмы напісаны на розных платформах, таму сёння думаем, як аб'яднаць іх у адзінае цэлае.
Працуе геаінфармацыйная сістэма лясной гаспадаркі, так што лічбавізацыя галіны адбываецца і з пункту гледжання картаграфічнага матэрыялу, а таксама таксацыйных апісанняў зялёных насаджэнняў (указваюцца высечаныя, перасаджаныя расліны і кампенсацыйныя мерапрыемствы). Пачынаюць прымяняцца лічбавыя сістэмы і ў паляўнічай гаспадарцы. Некаторыя з іх функцыянуюць ужо год і больш. Таму адна з задач ляснога ведамства — аб'яднаць усе гэтыя лічбавыя пачынанні на адной платформе. А ў перспектыве — пасля распрацоўкі канцэпцыі па лічбавізацыі галіны стварыць адзіны геапартал лясной гаспадаркі Беларусі.
Ірына СІДАРОК
Інтэрв'ю з алімпійскім чэмпіёнам па фехтаванні.
Прафесійна, аператыўна, па-добраму.