Сёлета Беларусь адзначыла юбілеі геніяльных класікаў нашага прыгожага пісьменства Янкі Купалы і Якуба Коласа — 140 гадоў з дня нараджэння. Іх жыццё і літаратурная дзейнасць адлюстравалі велічныя і трагічныя падзеі станаўлення беларускай нацыі і дзяржаўнасці. Акрамя іншага, яны праявілі сябе як грамадскія дзеячы і педагогі.
У жыццяпісе Янкі Купалы, змешчаным у поўным зборы твораў паэта, можна прачытаць, што 5 красавіка 1939 года ён «разам з Якубам Коласам, Міхасём Лыньковым і іншымі пісьменнікамі выступаў на вечары студэнтаў Мінскага педінстытута імя Горкага, чытаў вершы». Колькі радкоў пра адно з выступленняў, якое, між іншым, стала для кагосьці знакавай падзеяй і нават прадвызначыла лёс.
Прапаную зладзіць невялікую рэканструкцыю гэтага мерапрыемства і паглядзець на яго вачыма журналіста, непасрэднага ўдзельніка, а таксама гледача — аднаго з навучэнцаў педінстытута, дзе ладзілася вечарына. Паспрабуем праз розную оптыку ацаніць тое, што адбывалася на сцэне і ў зале.
Спачатку звернемся да матэрыялу, які быў апублікаваны неўзабаве пасля сустрэчы — у газеце «Советская Белоруссия» № 80 ад 8 красавіка 1939 года на апошняй яе старонцы.
На жаль, аўтар нататкі быў нешматслоўны, а сухі газетны стыль няхай і перадае сутнасць падзеі, але не дае магчымасці ацаніць атмасферу, у якой усё адбывалася.
Чалавек, для якога гэтая падзея стала асабліва важнай, — дзевятнаццацігадовы студэнт Мікола Аўрамчык. Нядзіўна, што той дзень згадваецца ў яго ўспаміне — «Пра сябе».
З гэтых мемуарных запісаў мы даведваемся, што ў інстытуце ішло актыўнае літаратурнае жыццё, выдаваўся часопіс «Наша творчасць», ладзіліся вечары з беларускімі пісьменнікамі, і Міколу Аўрамчыку добра запомнілася якраз апісаная падзея, якая паслужыла сапраўдным штуршком для яго творчасці і надала веры ў свае сілы.
Згодна з успамінамі, літгурткоўцы былі запрошаны да пісьменнікаў-ардэнаносцаў і камсамольскага начальства ў прэзідыум. І там, седзячы побач з Коласам і Купалам, ён заўважае, што, пакуль нехта з выкладчыкаў інстытута расказваў аб творчасці маладых аўтараў, Якуб Колас праглядаў студэнцкі часопіс, звярнуў увагу на верш Аўрамчыка «Адлёт жураўлёў» і паказаў яго Янку Купалу. Далей дадзім слова самому літгурткоўцу: «А тут якраз яб’явілі, што чытаць свае вершы будуць пачаткоўцы, і першаму слова далі мне. Я канчаткова разгубіўся, нясмела выйшаў на трыбуну, па ўсіх кішэнях шукаў свае рукапісы і, як на злосць, не знаходзіў іх. У першых радах залы пачалі смяяцца. Нарэшце я сумеўся і, хвалюючыся, прачытаў на памяць “Адлёт жураўлёў” і яшчэ нейкі верш. Воплескі студэнтаў крыху згладзілі непрыемнае ўражанне».
Мікола Аўрамчык згадвае, што асабліва цёпла студэнты сустрэлі выступленне ардэнаносных гасцей, што Янка Купала чытаў верш «А мы сабе сеем і сеем» і ўрывак з паэмы «Тарасова доля», а Якуб Колас — вершы «18 з’езду» і «Прывітанне Маскве».
Але ў іншым сваім успаміне «З іменем Купалы — у сэрцы» гэтая цёплая сустрэча ўжо не падаецца такой цёплай: «Як бы ні быў я тады ўсхваляваны тым, што ў іх прысутнасці мне далі слова першаму, і якое расчараванне ні адчуваў бы пасля свайго разгубленага выступлення, але ўсё роўна вельмі ўважліва слухаў, як выступалі яны абодва.
Зараз Янка Купала чытаў верш “А мы сабе сеем і сеем” і ўрывак з паэмы “Тарасова доля”.
Ці ад таго, што выбраў ён доўгія для чытання рэчы, ці таму, што чытаў іх нараспеў, са звонкай працяжнасцю, трохі крывячы рот, ягонае чытанне на гэты раз здалося мне аднастайна-манатонным і нуднаватым.
Пераконвала ў гэтым і тое, як расслаблена ўспрымала яго выступленне шматлюдная аўдыторыя, хаця я не сумняваўся, што пераважная большасць студэнтаў не толькі слухала, але і бачыла паэта ўпершыню».
Так згадваў выступленне Мікола Аўрамчык. Але часта бывае, што ўспрыманне непасрэднага ўдзельніка часам не супадае з тым, як гэта бачыць аўдыторыя.
Стварыць трэці ракурс нам дапаможа дзённікавы запіс Самуіла Александровіча, які на тую пару быў навучэнцам педінстытута, знаходзіўся ў зале і занатоўваў тое, што бачыў на сцэне. На жаль, не ўсе словы гэтага ўнікальнага дакумента, прадстаўленага сёлета на архіўных чытаннях у БДАМЛМ, паддаюцца расшыфроўцы, але нават тое, што ўдалося расчытаць, дазволіць нам пашырыць веды пра далёкую падзею і яе ўдзельнікаў. Прапаную вашай увазе тэкст з невялікімі скарачэннямі.
«5/IV. Чакаю вечара, прысвечанага пачынаючым і стрэчы з ордэнаноснымі пісьменнікамі.
8 гадзін блізка. Увайшлі у зал. Селі ў 4-рох: Я, <...>, Коршак, Валынец.
Адкрываецца вечар. У прэзідыум запрашаюцца: Купала, Колас, Лынькоў, Кучар, Цітоў, Кандраценя, Грамовіч, Аўрамчык, Сасноўскі, Коршак, Коган, Шарахоўскі, Дворкіна, Гейне, Дрозд, Рунец, Авіва Левіна, Рубенштэйн, Кручок <...>.
Першае слова даецца Лынькову. Гэта грузны з выгляду дзедушка, з падбародкам, з жыватом навесістым, тоўсты, зусім не падобен на <...> худы твар у мінулым, зусім пастарэўшы чалавек, сіваватыя валасы, карычневы суконны касцюм, пінжак расхлябаны, вышываная рубашка, <...>, на грудзях шыкаваты ордэн Леніна.
Гаворыць аб культуры, становішчы за мяжой, упамінае аб <...> літаратуры і іхным лёсе у враж. краіне, у прыватнасці ў Германіі (Гейне, Шыллера…), аб фаш. гора-тэарэтыках і іх расавай ідэйносці арыйцаў, аб бел. літ шчасці <...> у сов. краіне, аб задачах бел. пісьменніку.
Праходзіць Агняцвет у прэзідыум.
За сталом сядзяць народныя барды Беларусі Купала і Колас. Збоку пры іх прымясціўся Кучар, штось балакае з Янкам, к ім прымнуў з-заду Кандраценя.
Лынькоў скончыў. Бура апладысментаў. Гаворыць Шарахоўскі аб літ. сілах МПІ. Успамінае Аўрамчыка, Кандраценю, Грамовіча, інш.
Пасля яго урывак з аповеду чытае Кандраценя, затым Грамовіч з “Чужога грунта”.
Зала заціхае. Ля мікрафона Мікола Аўрамчык.
Нясецца сумная песня-элегія аб адлятаючых жураўлях.
Усе затоена, захапіўшыся слух <...>.
Кучар так утаропіўся і з усякай радасці, замілавана слухаў Лынькоў, Купала і Колас. Хваляваліся, не верылі вушам, што ідзе змена старым.
Гром апладысментаў. <...> Мікола вярнуўся і прачытаў “Беларусь”.
Выступіў <...>, Авіва Левіна два разы <...>, Кручок вітаў усіх МПІ ад імя Мін. Рубенштэйн прачытаў цікавыя вершы. Дрозд вітаў ад імя КіЖа. Гейне чытаў... Выступала Эдзі і храбра і прыгожа.
Потым прачытаў Купала свае вершы: вельмі прыгожы з твару, ім <...> любаваліся, фацэтны <...> курылі папіросы з Лыньковым і Коласам, смяяліся, шуцілі, часта кідалі рэплікі. Цікава ён грыз губу, проста смех браў, так шапяляў.
<...> Тады выступіў на трыбуну Колас.
Перад тым як прачытаць вершы, захацеў сказаць пару слоў <...> аб “Н.[ашай] Творчасці” МПІ <...> дзе па яго думцы маюцца <...> рэчы.
Так ён гаварыў, [пра] захапіўшы яго асабіста, нас усіх, аўдыторыю слухачоў “Адлёт жураўлёў”. Ён вельмі чулліва, тужліва і па бацькоўску хваліў гэты верш.
<...>
Што вясной, прылятаючы, зблудзяць
I не знойдуць знаёмых балот;
Бо на тых непраходных балотах
Дзе ніхто не мог гнёздаў чапаць
Ячмяні зашумяць пазалотай,
Прыйдуць людзі касіць сенажаць.
Ён паставіў гэты верш у рад побач з класічным вершам “Парус” Лермантава. Так удастоены чэсці Аўрамчык каб аб ім гаварыў Колас <...>.
Аўрамчык застаўся сіня лаўрэатам <...> вечара.
Затым гаварыла Дворкіна аб сілах і талентах МПІ.
Гаварылі аб праектуемым выданні зборніка вершаў з “Н.Пі Ш” МПІ
Пасля яе загаварыў <...> Кучар, успамінаючы дэкаднік у Маскве бел. літ. і мастацтва, гаварыў аб сустрэчы з маскоўскім чытачом, <...> Купалы, успамінаў аб фота ў сялянскай світцы, — это <...> барацьбіта за сялянскую долю <...>.
Кончыўся вечар.
У вестыбюлі: Лынькоў у вялікім пальто заліхвацкі пакурвае, Купала ў старамоднім пальто, з крыллечкай на локці, <...>, з прыёмнай дочкай, штось гаварылі <...>.
Колас (скрыўся з віду? — закрэслена) ад<...>ваўся.
Кучар бегаў каля іх <...>».
Вось такі, крыху сумбурны тэкст, запісаны спехам у рэжыме рэальнага часу.
Прыведзеныя вышэй матэрыялы паказваюць, наколькі далікатнай матэрыяй з’яўляецца гісторыя і як адрозніваюцца звесткі трох прысутных на адной і той жа вечарыне.
Мы пабачылі, што мерапрыемства было больш прадстаўнічае, чым гэта магло падацца з газетнай нататкі і ўспамінаў, — сапраўды значная падзея ў літаратурным жыцці перадваеннага Мінска. Пабачылі, што засталіся незаўважанымі аўтарам «літаратурнага дзённіка» перажыванні Міколы Аўрамчыка, а той пранёс іх праз доўгія гады і палічыў абавязковым апісаць у сваіх мемуарах. Ёсць вялікае падазрэнне, што ў параўнанні «Адлёту журавоў» і лермантаўскага «Паруса» было прыхавана колькі коласаўскай іроніі, але і маладыя літкружкоўцы плацілі класікам-ардэнаносцам адпаведна. З аднаго боку, праз успамін і дзённікавы запіс адчуваецца піетэт да пісьменнікаў старэйшага пакалення, з другога — пэўная задзірыстасць і хлапецкасць. 40-гадовы Лынькоў у вачах студэнта Александровіча ўжо «дзедушка», Янка Купала і Якуб Колас «хвалююцца», што ім на змену ідуць новыя паэты, ды і чыталі яны свае творы так, што аўдыторыю «смех браў». Тое, што ў Янкі Купалы былі праблемы з зубамі, іх хвалявала мала. Старое і новае — вечнае і ў жыцці, і ў літаратуры.
Зусім хутка вайна пераверне жыццё ўдзельнікаў таго далёкага вечара, нехта загіне на фронце, як Самуіл Александровіч, нехта пройдзе ўсе ваенныя жахі і адолее ледзь не векавы, як Мікола Аўрамчык, шлях. А нам застанецца зберагаць памяць пра іх, супастаўляць розныя погляды і спрабаваць максімальна праўдзіва аднаўляць гісторыю жыцця выдатных дзеячаў нашай культуры.
Міхал БАРАНОЎСКІ
Фота з прыватнага архіва аўтара
Фіналістка праекта «Акадэмія талентаў» на АНТ — пра творчасць і жыццё.
Амаль тысяча дзвесце чалавек сабраліся, каб вырашаць найважнейшыя пытанні развіцця краіны.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.