Ратуючы сэрцы. «Беларусьфільм» здымае фільм аб беларускіх урачах-кардыёлагах

Звычайна, калі ідзеш міма бальніцы, чуеш асаблівую цішыню. Нават людзі, якія наведваюць сваіх блізкіх, размаўляюць у паўгалоса. Але каля галоўнага ўваходу ў РНПЦ кардыялогіі было ажыўлена: камеры, медыцынскія работнікі, перамовы па рацыях. Здымаюцца першыя сцэны мастацкай стужкі «Ліст чакання», якая распавядае аб лёсах беларускіх урачоў-кардыёлагаў.

Каардынуе здымачны працэс рэжысёр-пастаноўшчык, народны артыст Беларусі Аляксандр Яфрэмаў. Здаецца, ён паспявае ўсё: адрэпетыраваць сцэну з акцёрамі, выстраіць будучы кадр, і нават паразмаўляць з пастановачнай групай. 

—Кіно — гэта заўсёды чаканне, — кажа рэжысёр. — Мы будзем здымаць фільм аб людзях, якія аддаюць сваё жыццё, прафесію і майстэрства самаму галоўнаму: здароўю, маралі і этыцы.

Галоўнымі героямі стужкі стануць выдуманыя асобы, якія не маюць прататыпаў у рэальным жыцці. У большай ступені гэта зборныя вобразы. Але пры гэтым здымачнай камандзе дапамагалі кансультанты, у склад якіх увайшлі супрацоўнікі РНПЦ кардыялогіі. Як адзначыў Аляксандр Яфрэмаў, іх прозвішчы абавязкова з’явяцца ў тытрах.

— Наша задача як навуковых кансультантаў заключалася ў тым, каб зрабіць сцэнарый максімальна прыбліжаным да жыцця, — распавёў заслужаны ўрач Рэспублікі Беларусь, кардыёхірург Юрый Астроўскі. — Мы імкнуліся зрабіць так, каб стужка не капіравала тое, што ўжо было створана раней. Акрамя таго, мы прадаставілі запісы нашай першай і пяцісотай трансплантацыі, якія былі запісаны ў рэжыме рэальнага часу. Канешне, мы не ўмешваемся ў сцэнарый, але дапамагаем зрабіць яго больш праўдзівым. Не заўсёды тыя рэчы, якія прыгожа выглядаюць у кіно, такія ж ладныя ў жыцці.

Удзел у стужцы прымаюць беларускія і расійскія акцёры, адну з роляў урача выконвае народны артыст СССР Геннадзь Аўсяннікаў. Пакуль здымачная група не спяшаецца раскрываць усе карты, але аб здымачным працэсе распавёў акцёр Дзмітрый Сутырын, у фільме ён будзе іграць прафесара: 

— Хачу адзначыць, што рэпетыцыі праходзілі выдатна. Я пазнаёміўся з выдатнымі людзьмі: добрымі акцёрамі, прафесійнымі аператарамі і, канешне ж, з Аляксандрам Васільевічам Яфрэмавым.

Генеральны дырэктар кінастудыі «Беларусьфільм» Уладзімір Карачэўскі распавёў, што фільм здымаецца па заказе Міністэрства культуры:

— У апошнія гады мы атрымліваем прапановы на стварэнне не толькі ваенных і дзіцячых фільмаў, але і студэнцкіх работ, кіно для капрадукцыі. Канешне, такая важная тэма, як гісторыя аб урачах, была падтрымана Міністэрствам культуры — мы атрымалі фінансаванне ў поўным аб’ёме. Спадзяюся, вясной глядач ужо ўбачыць вынікі нашай працы не толькі на кінаэкранах, але і на тэлеканалах. Гэты фільм распавядае аб сённяшніх беларусах, аб людзях, якія кожны дзень клапоцяцца аб іншых.

Запланавана, што стужка выйдзе ў дзвюх частках. Акрамя таго, фільм адаптуюць як для шырокага пракату ў кіно, так і для паказу па тэлебачанні. Здымкі адбудуцца ў чатырох медыцынскіх установах. Магчыма, у кадр патрапяць і звычайныя пацыенты, калі яны дадуць на гэта згоду.

— Тэма фільма вечная: пра дабро і зло, каштоўнасць жыцця. Гэта асабліва важна ў нашым турбулентным свеце, — адзначыў міністр аховы здароўя Дзмітрый Піневіч. — Выратаванне жыцця адбываецца буднічна. І вельмі важна, што фільм паказвае гэтую грань у рэчаіснасці нашых беларускіх урачоў: штотыднёвы подзвіг разам з працай.

Талерка разбіта, камеры настроены, рэжысёр на пляцоўцы. Нягледзячы на восеньскую непагадзь, настрой у каманды выдатны. Кіно, асабліва на такую важную тэму, павінна атрымацца. 

Арына КАРПОВІЧ

Фота Лізаветы ГОЛАД