Шаснаццаты кантэйнерны цягнiк рушыў з транспартна-лагiстычнага цэнтра «Мiнск-Белмытсэрвiс-2» у Кiтайскую Народную Рэспублiку (КНР). Праз два тыднi 41 кантэйнер з дзвюма тысячамi кубiчных метраў прадукцыi, больш як тысяча з якiх — сухое малако айчыннай вытворчасцi, прыбудзе на станцыю Чысуму.
У межах беларуска-расiйскага супрацоўнiцтва i рэалiзацыi iнiцыятывы «Адзiн пояс — адзiн шлях» «Белмытсэрвiс» як найбуйнейшы лагiстычны аператар краiны аказвае поўнае лагiстычнае суправаджэнне ўсiх грузаў, у тым лiку ў экспартных i iмпартных зносiнах з Кiтаем. Сёлета прадпрыемства ўжо адправiла ў КНР 627 кантэйнераў. Палова з iх прыходзiцца на мiнскi фiлiял. Менавiта тут арганiзуецца кансалiдацыя таварных партый кантэйнерных цягнiкоў.
— Дастаўка тавараў цягнiкамi ў розныя краiны i рэгiёны, у тым лiку на рынкi ЕАЭС i далёкага замежжа, выгадная нашым пакупнiкам з iншых краiн. Развiццё адносiн памiж Беларуссю i КНР — адзін з прыярытэтных напрамкаў, які адбываецца на розных узроўнях i будзе развiвацца i надалей, — расказаў Аляксандр СКАЧКОЎСКI, дырэктар Мiнскага фiлiяла РУП «Белмытсэрвiс». — Дзякуючы недарагой лагiстыцы кiтайскi спажывец атрымлiвае гарантавана якасны прадукт па канкурэнтных цэнах.
Некалькi дзесяцiгоддзяў таму культура спажывання малака ў Кiтаi знаходзiлася на ўзроўнi ледзь не адмаўлення. Цяпер жа за дзевяць месяцаў магiлёўскае прадпрыемства «Бабулiна крынка» экспартавала ў Кiтай малочнай прадукцыi на 9 мiльёнаў 200 тысяч долараў, што ў шэсць разоў больш, чым летась, расказаў Аляксей ДРАНIЦА, начальнiк аддзела знешнеэканамiчнай дзейнасцi прадпрыемства «Бабулiна крынка», прадукцыя якога адправiлася ў саставе.
— Наш тавар запатрабаваны ў Кiтаi, падыходзiць iх рынку. Акрамя таго, там меншыя мытныя пошлiны. Тым больш што ў наш час адлегласць адыгрывае не такую вялiкую ролю, а адпраўка тавару цягнiкамi скарачае тэрмiн дастаўкi ў разы ў параўнаннi, напрыклад, з марскiм транспартам. Мы нават усур'ёз задумваемся над адкрыццём уласнага прадстаўнiцтва ў КНР. А з часам, магчыма, прывучым кiтайцаў ужываць i сыр.
Перавага перавозак кантэйнерамi вiдавочная. Сёння адзiн вытворца можа адгрузiць партыю тавару ў некалькi палет цi некалькi тон, другi можа даць значна большую колькасць. Аднак, каб атрымаць выгадныя тарыфы, каб кансалiдацыя была эфектыўнай для вытворцаў па кошце ўсiх спадарожных паслуг, неабходна аб'яднаць iх у адзiн транспартны сродак, напрыклад рухомы чыгуначны састаў, удакладнiў дырэктар мiнскага фiлiяла:
— На тэрмiнале прадукцыя загружаецца ў кантэйнер, часам лiтаральна за 20-30 хвiлiн. А на ювелiрную работу па ўстаноўцы кантэйнераў на чыгуначную платформу аператару пагрузчыка рыч-тракера даюцца лiчаныя хвiлiны. Кожная гадзiна — лiшнiя затраты, якiя не патрэбны нi кiтайскаму спажыўцу, нi беларускаму вытворцу.
Iрына СIДАРОК
Фота аўтара
Мерапрыемства праводзіцца на добраахвотнай аснове.
Не выявіць ні секунды абыякавасці.
