Фестываль кіно з Паўночнай Еўропы і краін Балтыі «Паўночнае ззянне» пройдзе ў Мінску з 21 да 27 верасня ў анлайн-фармаце.
Першапачаткова VІ кінафорум планавалі правесці ўвесну, але праз пандэмію ён быў перанесены. І сёлета ўпершыню за гісторыю свайго існавання ўсе фільмы і майстар-класы «Паўночнага ззяння» будуць трансліравацца анлайн праз стрымінгавую беларускую платформу medіatech.by, што распрацоўваецца сумесна з партнёрамі фестывалю. Зараз арганізатары працуюць над яе стварэннем і над тым, каб аматарам кінамастацтва было зручна набываць білеты на прагляд фільмаў, а таксама ўдзельнічаць у разнастайных майстар-класах.
Традыцыйна ў рамках фестывалю адбудзецца паказ гульнявых і дакументальных паўнаметражных (і ўпершыню кароткаметражных) кінастужак са Швецыі, Даніі, Фінляндыі, Ісландыі, Нарвегіі, Літвы, Латвіі і Эстоніі. У асноўнай праграме «Паўночнага ззяння» каля 20 фільмаў закранаюць тэмы, што сугучныя слогану кінафоруму «Слухаць і чуць» (а гэта надзвычай актуальна ў святле сённяшніх падзей). Сёлета была створана новая візуальная канцэпцыя, праз якую фестываль запрашае даследаваць тэмы эмпатыі, пераемнасці пакаленняў, разбурэння старых узораў паводзін. Таксама ўпершыню ў межах фестывалю пройдзе пашыраная праграма маладога беларускага кіно.
Як адзначаюць арганізатары «Паўночнага ззяння», іх мэта «несці мастацтва кіно, магію паўночнай культуры пераважна ў перакладзе на беларускую мову не толькі ў сталіцу, але і ў рэгіёны Беларусі». Паказы фестывалю ладзіліся ў папярэднія гады ў Гомелі, Магілёве і Гродне.
Ёсць верагоднасць, што новы фармат аб'яднае аматараў кіно ў розных пунктах нашай краіны.
Алена ДРАПКО
Прэв’ю: depositphotos.com
Выбар саджанца для садавода — той момант, значнасць якога складана пераацаніць.
Канцэрт для дзяцей і моладзі, пластычны спектакль Ягора Дружыніна і «Рок-панарама».