22 кастрычніка, чацвер

Вы тут

Што цікавага прапануе тэлеканал «Беларусь 3»


Восень па традыцыі на тэлебачанні радуе прэм'ерамі. І на сацыякультурным тэлеканале Белтэлерадыёкампаніі нас чакаюць цікавыя падзеі. Тут 13 верасня прадставяць новы праект уласнай вытворчасці «Кадры жыцця», а ў канцы месяца гледачы ўбачаць тэлеверсію балета «Пер Гюнт». Акрамя гэтага, вядома, не абыдзецца без тэматычных праграм, паказу дакументальнага і мастацкага кіно.


Што датычыцца новага праекта, то «Кадры жыцця» — гэта цыкл інтэрв'ю з вядомымі прадстаўнікамі творчай інтэлігенцыі нашай краіны. Праект прапануе гледачам абноўлены фармат знаёмай праграмы «Майстры і куміры» — у арыгінальнай студыйнай «кіназале» з новымі дэкарацыямі. Праз архіўныя відэаматэрыялы і, бадай, самыя каштоўныя фонды жывых чалавечых успамінаў запрошаных гасцей здымачная група «Беларусь 3» разам з вядучымі праекта Сяргеем Кацьерам і Марынай Драгінай паспрабуе паназіраць за лёсамі творцаў у сацыякультурным кантэксце гісторыі краіны і знайсці пункты ўзаемнага ўплыву.

— Праз гісторыі нашых герояў у студыі — людзей знакавых і цікавых — мы запісваем своеасаблівую культурную біяграфію нашай краіны, — кажа кіраўнік і сувядучы праекта «Кадры жыцця» Сяргей Кацьер. — Расповеды нашых майстроў унікальныя. І мне, у сваю чаргу, заўсёды цікава, як мой асабісты лёс перасякаецца з лёсамі творчых людзей.

У першым выпуску праграмы, які выйдзе на «Беларусь 3» у наступную нядзелю ў 19.25, гледачоў чакае сустрэча з кінарэжысёрам, сцэнарыстам, паэтэсай Аленай Туравай (аўтар анімацыйных і гульнявых фільмаў, дзе і «Навагоднія прыгоды ў ліпені», «Кіндэрвілейскі прывід» і іншыя). Яна падзеліцца ўспамінамі пра дзяцінства і знакамітых бацькоў, пра першыя крокі на Нацыянальнай кінастудыі «Беларусьфільм», а таксама раскажа малавядомыя факты пра свае рэжысёрскія работы. Візуальным суправаджэннем размовы стане паказ архіўных відэаматэрыялаў з фонду Белтэлерадыёкампаніі.

А доўгачаканую прэм'еру спектакля «Пер Гюнт», якім адкрыў свой 88-ы сезон Нацыянальны акадэмічны Вялікі тэатра оперы і балета, прыхільнікі мастацтва ўбачаць 27 верасня ў эфіры «Беларусь 3». Нас чакае харэаграфічная пастаноўка ў 2 дзеях на музыку Грыга і па матывах драмы Ібсена. Гісторыю, напоўненую скандынаўскімі містычнымі матывамі і рамантычнымі пошукамі ідэалу, на мове танца выкажуць майстры сцэны — на чале з дырыжорам-пастаноўшчыкам спектакля, народным артыстам Беларусі Аляксандрам Анісімавым, балетмайстарам-пастаноўшчыкам Сяргеем Мікелем і мастаком-пастаноўшчыкам Любоўю Сідзельнікавай.

Здымачная група канала «Беларусь 3» правяла адзін з прэм'ерных вечароў балета «Пер Гюнт» разам з першымі гледачамі ў Вялікім тэатры, а ў канцы месяца прадставіць сваёй тэлеаўдыторыі кранальную гісторыю здабыцця сапраўднага «я» і бессмяротнай шчырасці кахання ў тэлеверсіі спектакля. Сачыце за праграмай эфіру і знаёмцеся з найлепшымі творамі мастацтва, а таксама з тымі, хто іх стварае.

Алена ДРАПКО

Фота Белтэлерадыёкампаніі

Загаловак у газеце: Кадры жыцця і вялікае мастацтва на «Беларусь 3»

Выбар рэдакцыі

Грамадства

Транспарт вялiкага горада. Пра новыя маршруты, электробусы i трэцюю лiнiю метро

Транспарт вялiкага горада. Пра новыя маршруты, электробусы i трэцюю лiнiю метро

 У Мiнску цяпер працуе 199 маршрутаў аўтобусаў, восем — электробусаў, 89 — тралейбусаў, восем — трамваяў. 

Культура

Як вывозілі каштоўнасці з музеяў БССР у канцы 1920-х — пачатку 1930-х гг.

Як вывозілі каштоўнасці з музеяў БССР у канцы 1920-х — пачатку 1930-х гг.

Даследчыкі савецкай індустрыялізацыі традыцыйна бралі пад увагу дзве галоўныя крыніцы яе фінансавання — экспарт сыравіны і сельскагаспадарчай прадукцыі.

Культура

Леў Клейнбарт. Чалавек, якi адкрыў для чытацкай публiкi Янку Купалу i Сяргея Ясенiна, нарадзiўся ў Капылi — у доме, якi захаваўся да нашых дзён

Леў Клейнбарт. Чалавек, якi адкрыў для чытацкай публiкi Янку Купалу i Сяргея Ясенiна, нарадзiўся ў Капылi — у доме, якi захаваўся да нашых дзён

У пачатку XX стагоддзя публiцыст, крытык i журналiст Леў Клейнбарт быў уплывовай асобай сярод творчай iнтэлiгенцыi Пецярбурга.

Эканоміка

Студэнцкі попыт на кошт арэнды жылля амаль не паўплываў

Студэнцкі попыт на кошт арэнды жылля амаль не паўплываў

Спецыялісты адзначаюць: добра яшчэ, што рынак выжыў.