Лукашэнка: Беларусь і Расія значна прасунуліся ў вырашэнні набалелых пытанняў

Беларусь і Расія значна прасунуліся ў вырашэнні набалелых пытанняў. Аб гэтым Прэзідэнт Беларусі Аляксандр Лукашэнка заявіў сёння на сустрэчы са старшынёй урада Расіі Міхаілам Мішусціным, перадае БЕЛТА.

«Я вельмі ўдзячны вам за апошнія тыдні і можа нават месяц-паўтара, калі ў нас ідуць інтэнсіўныя перамовы паміж урадамі. Мы дамовіліся з Уладзімірам Уладзіміравічам [Пуціным] яшчэ да выбараў пра гэта. І, як мне ўчора Раман Аляксандравіч [Галоўчанка] дакладваў, вы значна прасунуліся ў вырашэнні тых пытанняў, набалелых для нас», — сказаў кіраўнік дзяржавы.

«Я ўсё часцей кажу, у нас гэта проста відаць, адчувальна ўсё ў сувязі з асобнымі тут выпадамі так званай нашай апазіцыі (не ведаю, як яе назваць, я яшчэ не зусім разумею, як назваць усё гэта). Але, тым не менш, гэта для нас урок», — адзначыў Аляксандр Лукашэнка.

Прэзідэнт падкрэсліў, што гэты ўрок павінен падштурхнуць дзве брацкія краіны — Беларусь і Расію — зрабіць адпаведныя высновы. «І па многіх пытаннях, па якіх мы быццам бы не змаглі раней дамовіцца, каб мы дамовіліся. І вы з прэм’ерам Беларусі зрабілі вялікую работу, каб зблізіць нашы пазіцыі і па многіх пытаннях наогул дамовіцца», — канстатаваў беларускі лідар.

Паводле яго слоў, у яго з Прэзідэнтам Расіі Уладзімірам Пуціным ёсць дамоўленасць, што пасля сустрэчы міністраў замежных спраў і прыезду ў Мінск Міхаіла Мішусціна ў Маскве пройдзе сустрэча ўжо на ўзроўні кіраўнікоў дзяржаў. «І канчаткова расставім усе кропкі над i па тых пытаннях, якія вельмі адчувальныя і хваравітыя для дзвюх дзяржаў», — заявіў Аляксандр Лукашэнка.

Ён таксама падзякаваў Міхаілу Мішусціну за тое, што Расія падключылася ў цяжкую хвіліну і дапамагла хаця б у эканоміцы сур’ёзна стабілізавацца. «Вельмі сур’ёзна. Асабліва ў розумах людзей адбыўся пераварот, што Расія, як братэрская краіна, асноўны наш эканамічны партнёр і рынак збыту (амаль палову ўсяго мы прадаем у Расіі), ад нас не адвярнулася ў гэтыя цяжкія часы», — рэзюмаваў беларускі лідар.

Лукашэнка назваў інфармацыю аб атручэнні Аляксея Навальнага фальсіфікацыяй

Лукашэнка назваў інфармацыю аб атручэнні Аляксея Навальнага фальсіфікацыяй. «Я заўважыў, назіраючы за расійскімі падзеямі, у іх — Захаду — новая фішка з’явілася. Зноў „Навічок“, зноў атручэнне. Так я вам павінен сказаць, што ўчора, ці пазаўчора, я дакладна не памятаю, да выступу Меркель (яна заявіла, што яму — Навальнаму — хацелі зачыніць рот) мы перахапілі размову. Мы так разумеем, Варшава размаўляе з Берлінам. Два абаненты на сувязі. Перахапіла наша радыёэлектронная ваенная разведка. Паколькі там разгорнутыя часткі, і мы, вядома, вядзём і ў радыёсферы проціборства з натаўцамі. І мы перахапілі цікавую размову, якую (я вам дам пачытаць яе, мы падрыхтуем і накіруем у ФСБ) выразна кажа пра тое, што гэта фальсіфікацыя. Ніякага атручвання Навальнага не было», — заявіў кіраўнік беларускай дзяржавы.

Аляксандр Лукашэнка выказаў здагадку, што група спецыялістаў падрыхтавала для канцлера Германіі Ангелы Меркель, для яе адміністрацыі факты, можа быць, і заяву, якую яна зрабіла. «Зрабілі яны гэта — цытата: “Каб адбіць ахвоту Пуціну сунуць нос у справы Беларусі”. Я працытаваў гэтую размову. Разумееце, наколькі па-езуіцкі паступаюць гэтыя людзі», — расказаў Прэзідэнт.

«Таму, я думаю, Бортнікавым з Нарышкіным трэба будзе сур’ёзна разабрацца ў гэтай сітуацыі. Мы і голас перадамо запісаны, і тэкст. Цалкам усе матэрыялы сёння-заўтра будуць у вашых спецслужбаў для таго, каб яны разабраліся, каму гэта трэба. Адна таксама цытата: „Тым больш, у бліжэйшы час у іх выбары, дзень галасавання ў рэгіёнах Расіі“. Гэта значыць, яны ведаюць, што ў Расіі выбары, і трэба перад гэтымі выбарамі нейкую падсунуць брыдоту. Мы думаем, што яшчэ нешта прыдумаюць. Вось іх стыль. Вось іх твар», - падкрэсліў Аляксандр Лукашэнка.

«Тут і пра Беларусь размова ёсць. Я вам пакіну яго, вы прачытаеце», — дадаў Прэзідэнт.

Аляксандр Лукашэнка зрабіў выснову, што спакойнага жыцця «яны нам не гарантуюць, спакойнага жыцця нам не будзе». «У гэтым я перакананы. Але вы павінны разумець, што мы поўныя рашучасці адстаяць свой суверэнітэт і незалежнасць і не дазволім тут нас нахіляць. Мы бачым, адкуль ужо ногі растуць. І не проста ногі. Мы бачым, што яны ўжо па вушы ўгразлі ў гэтай хлусні. Але праўда заўсёды перамагала. І, напэўна, Гасподзь усё-такі на нашым баку», - сказаў кіраўнік дзяржавы.

Аляксандр Лукашэнка адзначае недружалюбныя крокі з боку блока НАТА

«Вы бачыце, што адбываецца ў нас. Мы бачым, што адбываецца вакол Расіі, — сказаў кіраўнік дзяржавы. — Мы вымушаныя былі адказваць, бачачы недружалюбныя крокі з боку блока НАТА каля нашых межаў. А для гэтага ўсе доказы ёсць, як бы яны ні апраўдваліся, — і перакідка амерыканскіх, іншых падраздзяленняў з глыбіні іх натаўскай тэрыторыі да межаў Беларусі, асабліва самалётаў F-16 (па-мойму, 16 або 18 самалётаў яны перакінулі)».

«Мы разгарнулі практычна палову нашай беларускай арміі. Фактычна ўзялі пад кантроль заходнія мяжы з Літвой і Польшчай. І, як я часта кажу, фактычна акружылі Гродна, каб супрацьстаяць гэтым пагрозам. Напэўна, гэтая дэманстрацыя дала свой вынік», — сказаў Аляксандр Лукашэнка.

Ён падкрэсліў, што спакойнага жыцця не будзе, але Беларусь поўная рашучасці адстаяць свой суверэнітэт і незалежнасць.

 «У гасцінным Мінску мы б асабліва хацелі падкрэсліць, што Расія цалкам падтрымлівае суверэнітэт, незалежнасць і тэрытарыяльную цэласнасць Беларусі»

У час сустрэчы кіраўнік беларускай дзяржавы ўдакладніў, як ідзе ўзаемадзеянне ў сферы барацьбы з каранавірусам. Ён нагадаў, што Беларусь стане першай краінай, куды Расія паставіць сваю вакцыну ад COVID-19.

«Я рады, што Раман Аляксандравіч Галоўчанка прыняў рашэнне сёння зрабіць вакцынаванне. Упэўнены, што ўсё будзе добра», — адказаў Міхаіл Мішусцін.

Таксама Міхаіл Мішусцін заявіў: «У гасцінным Мінску мы б асабліва хацелі падкрэсліць, што Расія цалкам падтрымлівае суверэнітэт, незалежнасць і тэрытарыяльную цэласнасць Беларусі».

Ён заявіў, што Беларусь з’яўляецца роднай краінай для Расіі. І справа не толькі ў гістарычных, моўных, духоўных сувязях. «Але і ў сотнях, тысячах ці мільёнах грамадзян, якія фактычна з’яўляюцца адным народам», — дадаў расійскі прэм’ер.

Міхаіл Мішусцін распавёў, што ўрады абедзвюх краін падтрымліваюць рэгулярныя кантакты. Паводле яго слоў, на нядаўніх перамовах прэм’ер-міністры абмеркавалі практычна ўвесь парадак Саюзнай дзяржавы, ЕАЭС і многія іншыя пытанні.

«У нас па многіх пытаннях прагрэс, у тым ліку па пытанні будучыні Саюзнай дзяржавы, якая будзе заснавана на абсалютна незалежнай пазіцыі нашых дзяржаў, але з адпаведнымі мерапрыемствамі эканамічнага характару, пра якія мы дамаўляліся», — сказаў Міхаіл Мішусцін.

Паводле яго слоў, бакі абмяркоўваюць зняцце бар’ераў у гандлі, пашырэнне супрацоўніцтва ў культуры, спорце, ахове здароўя, энергетыцы, прамысловасці. «Практычна ўсе ключавыя міністры нашага кабінета прыехалі ў Мінск, каб абмеркаваць парадак дня», — дадаў старшыня ўрада Расіі.

Старшыня ўрада Расіі прыехаў у Мінск з вялікай дэлегацыяй. Разам з ім на перамовы ў Палац Незалежнасці прыбылі ключавыя фігуры расійскага ўрада. Бакі, дадаў ён, маюць намер абмеркаваць увесь двухбаковы парадак дня і дамовіцца аб далейшых кантактах.

Беларусь дасягнула дамоўленасцей з Расіяй па аплаце энерганосьбітаў

«Хацеў бы павітаць рашэнні, якія сёння былі прынятыя па нашых узаемных пытаннях, звязаных з аплатай энерганосьбітаў. Мы дасягнулі з вамі ўсіх дамоўленасцей», — адзначыў Міхаіл Мішусцін.

Аднак раскрываць сутнасць дамоўленасцей і канкрэтныя рашэнні кіраўнік расійскага ўрада не стаў. Разам з тым ён падкрэсліў, што Расія зацікаўлена ў тым, каб вывесці супрацоўніцтва з Беларуссю яшчэ на больш высокі ўзровень, напоўніць яго новым зместам, ўзяць лепшыя практыкі ў Расіі і Беларусі і рэалізаваць іх у галіновым узаемадзеянні.

Кіраўнік расійскага ўрада заўважыў, што у 2019 годзе тавараабарот паміж краінамі перавысіў $ 35,5 млрд. Аднак пандэмія каранавіруса ўнесла свае карэктывы ў гандаль. За студзень-чэрвень аб’ём таваразвароту знізіўся на 21% да $ 12,5 млрд. «Спадзяюся, што мы зараз, калі паляпшаецца пандэмічная сітуацыя, зможам нагнаць упушчанае і вярнуцца да тых лічбаў, якія былі ў мінулым годзе», — дадаў ён.

«Неабходна цалкам выключыць знешняе ўмяшанне ва ўнутраныя справы Беларусі»

«Перш за ўсё хацеў бы яшчэ раз падкрэсліць важнасць забеспячэння незалежнасці, суверэнітэту і тэрытарыяльнай цэласнасці Беларусі. Перакананыя, што ў цяперашняй сітуацыі неабходна дзейнічаць строга ў прававым полі, цалкам выключыць знешняе ўмяшанне ва ўнутраныя палітычныя працэсы Беларусі, адмовіцца ад усякага роду пагроз, прымянення аднабаковых санкцый і іншых нелегітымных абмежавальных мер», - сказаў Міхаіл Мішусцін.

Ён падкрэсліў, што ў Расіі даражаць добрасуседскімі і братэрскімі адносінамі з Беларуссю, бо народы дзвюх краін аб’ядноўвае шматвекавая гісторыя, трывалыя духоўныя і маральныя сувязі.