Бясплатная падгонка адзення, знiжкi да 70 % на мадэлi мiнулых гадоў. Новыя тканiны i ўборы. Павышэнне цаны на школьныя ўборы айчыннай вытворчасцi не больш як на 10 %. Усё гэта i не толькi чакае беларусаў, якiя рыхтуюцца да новага навучальнага года. Што сёлета апрануць на лiнейкi вучнi, у колькi гэта абыдзецца бацькам i як не спусцiць сямейны бюджэт на школьных базарах, расказалi спецыялiсты.
Айчынны асартымент i дадатковыя паслугi
Для вучняў сёлета выпускаюць 500 мадэляў дзелавога адзення для школы, 285 з якiх новыя, а таксама 200 варыянтаў абутку i больш за 70 мадэляў трыкатажнай прадукцыi.
Мяркуецца, што айчынная прамысловасць (дзесяць прадпрыемстваў швейна-трыкатажнай галiны, якiя ўваходзяць у склад канцэрна «Беллегпрам») пашые каля 600 тысяч швейных i трыкатажных вырабаў. Хоць пару гадоў назад толькi швейнай прадукцыi для школы выпускалася больш за мiльён. Сёлетняе змяншэнне заказу абумоўлена вялiкай колькасцю мадэляў, якiя засталiся з мiнулых гадоў, растлумачыў Вадзiм ЛАМКОЎ, намеснiк старшынi «Беллегпрама».
— Школьны сезон сёлета пачаўся крыху пазней, чым звычайна. На гэта паўплывала сiтуацыя на рынку краiны праз каранавiрус — прадпрыемствы ў красавiку—маi арыентавалiся ў асноўным на выпуск сродкаў аховы. Таму мы не праводзiлi паказы школьнага адзення i прэзентацыi. Аднак увесь комплекс работ мы правялi i працягваем iх. Прадпрыемствы гатовыя на працягу тыдня адшыць любую разумную колькасць дадатковых заказаў да запланаванага аб'ёму, калi яны будуць.
Асартымент тавараў для школы сфармiраваны ў асноўным за кошт прадукцыi айчыннай вытворчасцi. Для поўнага задавальнення спажывецкага попыту недахоп дапаўняецца iмпартнымi таварамi. У гандаль ужо паступiла больш за 400 тысяч вырабаў: 260 тысяч швейных i 145 тысяч — трыкатажных. Школьнiкам прапануецца да 100 мадэляў ранцаў, заплечнiкаў i сумак са святлоадбiвальнымi элементамi. Прадстаўлены разнастайны асартымент школьных пiсьмовых i канцылярскiх прылад, расказала Наталля МЕЛЬНIКАВА, намеснiк начальнiка ўпраўлення арганiзацыi гандлю i грамадскага харчавання, начальнiк аддзела спажывецкага рынку МАРГ:
— У рэгiёнах краiны арганiзавана работа больш як 350 школьных базараў, кiрмашоў, праводзяцца выстаўкi-продажы, кiрмашы выхаднога дня. Аформлены куткi першакласнiка i школьнiка, выдзелены дадатковыя месцы для продажу. Тэматычна аформлены гандлёвыя залы i вiтрыны, размешчаны шыльды i планшэты-ўказальнiкi. Прадукцыю для школьнiкаў можна набыць у больш чым 10 тысячах рознiчных гандлёвых аб'ектах.
Графiк правядзення школьных кiрмашоў у сталiцы, абласных гарадах i райцэнтрах змешчаны на сайце канцэрна «Беллегпрам».
Пакупнiкам будуць аказваць i дадатковыя паслугi, накшталт папярэднiх заказаў на тавары школьнага асартыменту або падгонкi адзення па фiгуры. У сталiчным ЦУМе, прынамсi, з 15 да 31 жнiўня прыладзiць убор пад камплекцыю вучня дапамогуць бясплатна.
Выцiскаем з цэн лiшнiя капейкi
Сёлета мадэльеры запусцiлi ў вытворчасць шмат мадэляў сучаснага адзення для хлопчыкаў i дзяўчынак. Больш стала трыкатажных вырабаў, а ў вытворчасцi абутку арыентуюцца на мадэлi з натуральных тэкстыльных валокнаў. Для школьнiкаў прадугледжана даволi шмат нестандартных мадэляў, а таксама вырабаў з рэгулятарамi, якiя можна падагнаць па фiгуры дзiцяцi.
Арыенцiровачны кошт камплектаў адзення дзелавога стылю для вучняў — ад 60 да 303 рублёў. А цана на набор школьна-пiсьмовых прылад i канцылярскiх тавараў можа вар'iравацца ад 22 да 183 рублёў.
— У асноўным удалося захаваць цэны на ўзроўнi мiнулага года. Яны падраслi на 3—10 % пераважна з-за выкарыстання новых матэрыялаў i iмпартных закупак, — запэўнiў Вадзiм Ламкоў. — Мы хочам захаваць канкурэнтаздольнасць ва ўмовах, калi прадукцыя лёгкай прамысловасцi паступае ў краiну неабмежавана. Каб утрымацца на рынку, мы змагаемся за цэны i выцiскаем з iх лiшнiя капейкi. Уся адзежа для школьнiкаў адпавядае стандартам, якiя iснуюць для гэтай групы тавараў. А ўключэнне хiмiчных i сiнтэтычных нiтак у касцюмы адпавядае патрабаванням хiмiчнай i бiялагiчнай бяспекi.
Прываблiваюць айчыннага пакупнiка да набыцця тавараў беларускага легпраму i знiжкамi.
— Скiдкi на школьны асартымент, якiя прадпрыемствы гандлю прапануюць сумесна з айчыннымi вытворцамi тавараў, даходзяць да 70 %. На мадэлi дзелавога стылю, якiя выпушчаны ў 2016—2018 гадах, прадпрыемства «Калiнка», напрыклад, дае знiжкi
ад 45 да 70 %. А на асобныя леташнiя мадэлi — да 40 %, — падзялiлася Наталля Мельнiкава. — Удвая танней можна набыць мадэлi 2017—2018 гадоў i ў фiрменных крамах «Камiнтэрна» i «Палесся». А некаторыя прадпрыемствы змяншаюць цэны i на вырабы 2020 года.
Каб падрыхтавацца да школы, прапануюцца таксама праграмы крэдытавання i растэрмiноўкi за ўласныя сродкi i сумесна з банкамi, у крамах праводзяцца днi знiжак. На 15—16 жнiўня запланаваны, дарэчы, адзiны дзень знiжак, якiя будуць даходзiць да 40 %. Адбудуцца таксама акцыi са скiдкамi да 25 % для шматдзетных сямей, дамоў сямейнага тыпу, сем'ям, якiя выхоўваюць дзяцей-iнвалiдаў. У буйных крамах арганiзуюцца дабрачынныя акцыi «Збяром партфель разам».
Строгая класiка i яркiя дэталi
Дакладных патрабаванняў да школьнага стылю няма, аднак ёсць рэкамендацыi. Галоўную ролю ў вызначэннi вонкавага выгляду навучэнцаў iграе савет установы адукацыi, падкрэслiла Iрына БУЛАЎКIНА, галоўны спецыялiст упраўлення агульнай сярэдняй адукацыi Галоўнага ўпраўлення агульнай сярэдняй, дашкольнай i спецыяльнай адукацыi Мiнадукацыi:
— Адзенне дзелавога стылю вельмi разнастайнае, i яго можна камбiнаваць, што дазваляе вучням выглядаць элегантна, прыгожа i сучасна. Пры гэтым адзенне школьнiка павiнна настройваць на рабочы лад i не адцягваць ад навучальнага працэсу яго i навакольных. У гэтым навучальным годзе ў краiне будзе працаваць каля трох тысяч устаноў адукацыi для навучання больш як мiльёна школьнiкаў, 114 тысяч з якiх першакласнiкi.
Асартымент адзення для школы вельмi разнастайны: ад строгiх цёмных касцюмаў да яркiх вырабаў. Сярод навiнак штаны-кюлоты, сарафаны-камiзэлькi, кроп-топы, бомберы, спаднiцы-плiсэ.
У строях для хлопчыкаў прадугледжаны элементы з замшу, вышыўкi, кантрасных гузiкаў, петляў i дэкаратыўных закрэпках. Дапаўняецца вобраз штанамi свабоднага стылю тыпу кэжуал i смарт-кэжуал. Папулярнымi застаюцца штаны-чынасы з бавоўны i вузкiя штаны з полiвiскознай тканiны.
— Больш шырока, чым летась, у гэтым годзе прадстаўлены кашулi ў класiчным стылi, трыкатажныя кашулi i «двойкi» — трыкатаж плюс тэкстыль. Гэта досыць новы i модны кiрунак. Прадстаўлены як насычаныя, так i стрыманыя колеры, — ахарактарызаваў школьныя ўборы Вадзiм Ламкоў. — Укараняюцца новыя вiды малюнкаў жакардавых палоцен: клеткi, дыяганальны рубчык, варыянты дробнай крошкi, трохколерны жакардавы малюнак. А таксама дэкаратыўныя элементы: манжэты, планкi, лампасы, дэкаратыўная тасьма, здымныя дэталi, штучная пячаць i iншае.
Дзяўчынкам акрамя класiчных блузак са змешаных баваўняных тканiн прапануюцца святочныя ўборы, упрыгожаныя шыфонам, гiпюрам, карункамi, плiсэ, зборкамi, атласнай тасьмой, стразамi. А таксама камбiнаваныя блузкi з трыкатажных палоцен, блузкi з прынтованай вiскознай тканiны.
З'яўляецца тэндэнцыя да таго, каб элементы школьнага адзення можна было насiць i ў штодзённым звычайным ужытку. Для гэтага ўборы шыюць з тканiн, якiя лёгка мыць, i яны не камечацца, — дадаў ён. Прадпрыемствы легпрама выконваюць таксама заказы для асобных устаноў адукацыi, якiя просяць шыць для сваiх навучэнцаў мадэлi па iндывiдуальных эскiзах.
Iрына СIДАРОК
Фота БЕЛТА
Інтэрв'ю з алімпійскім чэмпіёнам па фехтаванні.
Прафесійна, аператыўна, па-добраму.
