Вы тут

Прэзідэнт: Канкурэнцыя, сутыкненне меркаванняў, мазгавая атака — гэта правільна


Гэта мерапрыемства — адно з нямногіх, калі на сустрэчы з удзелам Прэзідэнта журналісты (у тым ліку і прадстаўнікі «Звязды») апынуліся з іншага боку відэакамер, а ў нашым выпадку — дыктафонаў. Карэспандэнты самі сталі героямі сюжэтаў і публікацый, якія запаланілі медыяпрастору гэтым днём. У зале Палаца Незалежнасці сабралася амаль 250 спецыялістаў галіны масмедыя. Аляксандр Лукашэнка сказаў, што для сустрэчы няма надзвычайнай нагоды — толькі часткова яна звязана з выбарчай кампаніяй


Прысутных у зале журналістаў ён назваў дзяржаўнымі людзьмі, але адзначыў іх «своеасаблівае мысленне» і «тое, што ў іх можа быць на той ці іншы факт рознае меркаванне». «Гэта таксама нармальна, я гэта добра ўспрымаю. Я калісьці гаварыў, што калі мне рыхтуюць нараду, першае пытанне, якое задаю тым, хто рыхтаваў: альтэрнатыўнае меркаванне ёсць па пытанні? Няма — тады нарада адмяняецца, бо яе праводзіць няма сэнсу. Таму выпрацавана пазіцыя на ўзроўні Прэзідэнта: абавязкова альтэрнатыва, абавязкова канкурэнцыя, сутыкненне думак, мазгавая атака, штурм — усё гэта правільна. Я нармальна адношуся да таго, што ў гэтай зале існуюць розныя пункты гледжання, розныя меркаванні», — выказаўся Прэзідэнт.

Свабода слова падпарадкуецца закону

Аляксандр Лукашэнка адзначыў: заўсёды лічыў, што ўсе сродкі масавай інфармацыі краіны не могуць быць прыватныя. А ў складаны пераходны перыяд трэба вельмі акуратна ісці, вырашаючы такія пытанні, — «ісці як па лязе нажа ці па тонкім лёдзе».

Трэба заняцца і інтэрнэт-сектарам — актыўней выходзіць з дзяржаўнай пазіцыяй і ў гэтую бязмежную прастору. «А там што, не нашы кадры? І не скажу, што яны лепшыя, чым нашы кадры. Проста мы гэтае пытанне ўпусцілі. Мала гэтым займаліся на дзяржаўным узроўні», — акцэнтаваў увагу кіраўнік краіны і даў даручэнне сур'ёзна падумаць над гэтым пытаннем.

Дарэчы, Прэзідэнт адзначыў, што «Інтэрнэт у пэўнай ступені сцішыўся апошнім часам». Скарацілася колькасць абразлівых выказванняў на адрас медыйных персон, якія працуюць у дзяржаўных СМІ.

«Нарэшце вы адчулі, што такое «свабода слова», асабліва прагрэсіўна настроеныя ў гэтай зале людзі. Убачылі, што такое «свабода слова». Сказаў не тое — абразяць яшчэ больш. Я не ўсё гавару. Нават у гэтай зале я не магу сказаць, як пішуць і што кажуць. Няхай пра мяне — я ўжо прывык. Але кожны з вас атрымаў, той, хто не за Лукашэнку слова сказаў, а за дзяржаву, у якой прыйдзецца жыць вашым дзецям», — заўважыў Аляксандр Лукашэнка. «Свабода слова ў любой дзяржаве абмежаваная законам. Таму мы навядзём тут парадак», — запэўніў Прэзідэнт.

Рэформы несправядлівасці

Прэзідэнт выказаў сваю пазіцыю наконт рэформаў: «разбурыць дашчэнту многа розуму не трэба». Ён расказаў журналістам — сам калісьці выступаў за змены пасля распаду Савецкага Саюза ў сярэдзіне 90-х. Каб утрымаць краіну ад абвалу ў той час, яму прыйшлося ісці на вельмі рашучыя меры.

Ён выказаў меркаванне, што вяртанне да Канстытуцыі 1994 года, — гэта рэгрэс. «Калі мы гаворым аб рэформах, аб пераменах — гэта неабходна пісаць перадусім у Канстытуцыі і развіваць у законах. Як можна казаць пра рывок наперад і рэформы і ў той жа час заклікаць да Канстытуцыі, якая дрэнна сябе зарэкамендавала?» — задаў пытанне Аляксандр Лукашэнка.

Ён пракаментаваў прапановы альтэрнатыўных прэтэндэнтаў на ўдзел у выбарчай кампаніі па рэформах у прамысловасці і аптымізацыі рабочых месцаў. Вызваленым кадрам, напрыклад, прапаноўваюць ісці ў ІТ. «Я гэта прачытаў перад наведваннем МТЗ. Стаю перад людзьмі, гляджу на гэтыя рукі і думаю: ён жа ўсё жыццё круціў гайкі, калупаўся ў рухавіках, трансмісіі. Заўтра яго (пад 50—60 гадоў) выкінуць на вуліцу, і ён стане рэзервам для айцішнікаў?.. — абурыўся кіраўнік краіны. — Яны думаюць, пра што гавораць?».

На думку лідара краіны, калі пачаць такія рэформы, «яны скончацца праз год» — народ не вытрымае несправядлівасці. «Гэта поўны пераварот не толькі ў грамадстве і жыцці нашым, але і ў розумах людзей. Беларусы гэтага не дапусцяць», — выказаў ён меркаванне.

Прэзідэнт заявіў, што роля Міністэрства інфармацыі ў краіне будзе значна павялічвацца і арыентавацца на дзяржаву. «Я чалавек дзяржаўны, дзяржаўнік, і гэту лінію я буду прасоўваць. Пры гэтым хачу падкрэсліць — я абсалютна не супраць прыватнай уласнасці», — канстатаваў Аляксандр Лукашэнка.

Прэзідэнт арыентаваў журналістаў на сумленную і шчырую размову. «Я павінен сысці з гэтай залы з разуменнем таго, што задаволіў вашы запыты і патрабаванні, адказаў на тыя пытанні, што не даюць спакою, адрэагаваў на тое, у чым вы маеце патрэбу і чым жывяце, — сказаў ён. — Такога націску, як у гэтыя дні Беларусь не адчувала за ўсе гады свайго незалежнага развіцця».

Падчас размовы, якая доўжылася больш за пяць гадзін, журналісты мелі магчымасць задаць пытанні і атрымаць адказы на кожнае з іх. Абмяркоўвалі геапалітыку, праблемы выхавання моладзі, інтэграцыйных аб'яднанняў, прагнозы развіцця СМІ ў краіне, будучыню традыцыйных відаў СМІ...

«Выхад — разам з аўдыторыяй ісці ў інтэрнэт»

Міністр інфармацыі Ігар Луцкі падчас свайго дакладу акрэсліў некаторыя сусветныя тэндэнцыі, звязаныя з працай сродкаў масавай інфармацыі. 

«Сыход аўдыторыі ў інтэрнэт і, як вынік, падзенне тыражоў і даходаў друкаванай прэсы — гэта сусветная тэндэнцыя. Выхад — разам з аўдыторыяй ісці ў інтэрнэт», — сказаў міністр.

Недастаткова, на яго думку, кантралюецца размеркаванне рэкламы і даходаў ад яе ў сеціве. Навядзенне парадку з гэтым — адна з найбліжэйшых задач для Мінінфарма.

«У тэлебачанні мы парадак з размеркаваннем рэкламных прыбыткаў практычна навялі. А вось тэрыторыя інтэрнэту патрабуе навядзення парадку. Гэта адна з задач у тым ліку і Міністэрства інфармацыі», — працягнуў Ігар Луцкі. «Дарэчы, рэкламныя бюджэты таксама дрэйфуюць у інтэрнэт, — адзначыў міністр. — Але рэкламны рынак тут — гэта тэрыторыя, якая пакуль недастаткова кантралюецца дзяржавай, як у частцы справядлівага размеркавання рэкламных прыбыткаў, так і ў частцы ўтрымання гэтых сродкаў у краіне. Дрэнна, калі беларускія рэкламадаўцы аддаюць грошы замежнікам, якія нам, беларусам, у нашай жа медыяпрасторы рэкламуюць нашы ж тавары і паслугі».

«Мэта — дабіцца таго, каб мы былі якасным рэгулятарам ва ўсіх сектарах масавай інфармацыі, эфектыўней кантралявалі медыяпрастору, сталі драйверам перадавых медыярэсурсаў і каардынацыйным цэнтрам інфармацыйнай работы для дзяржаўных органаў, каб роля міністэрства была і бачная, і зразумелая грамадству», — зазначыў Ігар Луцкі.

Сустрэча Прэзідэнта з прадстаўнікамі СМІ працягвалася практычна шэсць гадзін. Кіраўнік дзяржавы падрабязна расказаў аб сучасным этапе развіцця краіны, сучасных выкліках, міжнародным супрацоўніцтве і сітуацыі ў свеце. Закраналася і тэма проціэпідэмічных мерапрыемстваў.

Супрацоўнікі медыя і эксперты таксама мелі магчымасць задаць Аляксандру Лукашэнку пытанні, на якія ён падрабязна адказаў. Яны тычыліся як непасрэдна працы СМІ ў розных сегментах, так і больш шырокіх тым, як, напрыклад, маладзёжная палітыка, інтэграцыйныя працэсы, пытанні захавання суверэнітэту і незалежнасці краіны.

Марыя ДАДАЛКА

Прэв’ю: БЕЛТА

Выбар рэдакцыі

Эканоміка

Энергія смецця, якасць вады і зніжэнне затрат удвая. Камунальнікі і навукоўцы абмеркавалі ўплыў інавацый на жыццё галіны

Энергія смецця, якасць вады і зніжэнне затрат удвая. Камунальнікі і навукоўцы абмеркавалі ўплыў інавацый на жыццё галіны

Святлодыёды са шматслойнымі нанаплёнкамі, якія мяняюць колер у залежнасці ад часу сутак і падстройваюцца пад біярытм чалавека...

Спорт

Сёлета футбольнаму клубу «Віцебск» спаўняецца 60 гадоў

Сёлета футбольнаму клубу «Віцебск» спаўняецца 60 гадоў

«У юбілейны сезон хацелася сур'ёзна адзначыць дзень нараджэння. Але пандэмія каранавіруса ўнесла свае карэктывы».

Эканоміка

 Фiнансiстам патрэбны банкноты — прымаюць любыя. Банкi гарантуюць, што захаваюць нашы грошы

Фiнансiстам патрэбны банкноты — прымаюць любыя. Банкi гарантуюць, што захаваюць нашы грошы

Фiнансавыя паслугi адзiн аднаму людзi аказваюць ужо тысячы гадоў.