Як правесці гэта лета? Першыя беларусы ўжо грэюцца на моры, іншыя раскупляюць туры на адпачынак унутры краіны

Каранавірус адступае, на змену яму прыходзіць добрае, цёплае беларускае лета, а разам з ім і адпускная пара. Як і дзе правесці свой адпачынак сёння — гэта адно з самых набалелых пытанняў тысяч беларусаў. Пра тое, як бачаць турыстычную індустрыю найбліжэйшых месяцаў спецыялісты, расказалі прадстаўнікі Міністэрства спорту і турызму, а таксама турыстычнай грамадскасці краіны.

Турысты ў чаканні мора

У сярэдзіне сакавіка, калі да пачатку самага гарачага турыстычнага сезона заставалася яшчэ пару месяцаў, пандэмія паставіла індустрыю ў вельмі складанае становішча. Міністэрству спорту і турызму ў тэрміновым парадку трэба было вывозіць сваіх суайчыннікаў з краін, якія пачалі закрываць межы, а турыстычным агенцтвам і аператарам вырашаць пытанні з запланаванымі адпачынкамі сваіх кліентаў. Прайшло ўжо тры месяцы, а гэтых пытанняў не становіцца менш.

Дырэктар Дэпартамента па турызме Міністэрства спорту і турызму Ірына Варановіч адзначае, ведамства працягвае работу з арганізацыямі і аб'яднаннямі практычна штодня, бо далёка не ўсе пытанні яшчэ вырашаны. Адной з галоўных праблем турыстычнай індустрыі ў гэтыя тры месяцы стала пытанне аб вяртанні грашовых сродкаў турыстам, якія аформілі раней браніраванне тураў. Нагадаем, пры раннім браніраванні пуцёўкі купілі каля 300 тысяч беларусаў, а агульная сума запазычанасці перад імі была прыкладна 400 мільёнаў рублёў. Сёння, дзякуючы разуменню кліентаў, можна сказаць, што пытанне вырашана з 85 % турыстаў, з імі дасягнута дамоўленасць, гэта значыць, кліентам альбо вярнулі грошы, альбо іх туры перанесены на больш познія тэрміны, у тым ліку на 2021 год. «Сітуацыя з каранавірусам яшчэ не зусім зразумелая і незразумела, як яна будзе развівацца, — кажа Ірына Мікалаеўна. — Еўрапейскія краіны ўжо адкрыліся ўнутры, але кожны дзень з'яўляюцца новыя паведамленні, колькасць хворых то памяншаецца, то павялічваецца».

— Нашы турысты, перш за ўсё, у чаканні марскога паху, марской хвалі і сонца, — кажа старшыня савета Рэспубліканскага саюза турыстычных арганізацый Аксана Бічун. — На сённяшні дзень турыстычныя аператары са сваімі партнёрамі прыклалі максімум намаганняў, каб пастарацца ў гэтых няпростых умовах стварыць усе перадумовы для бяспечнага адпачынку. Наша турыстычная галіна жывая, яна спраўляецца з выклікамі сённяшняга дня і верыць у найлепшае, — падкрэсліла Аксана Анатолеўна.

Сапраўды, пазітыўных фактараў, якія кажуць пра тое, што турызм ажывае шмат, але пакуль гэтыя тэндэнцыі вельмі далікатныя, таму што многія краіны адсоўваюць тэрміны пачатку палётнай праграмы і адкрыцця межаў. «Таму мы не можам гарантаваць са стапрацэнтнай упэўненасцю, што палётная праграма адновіцца, пакуль не атрымаем афіцыйныя дакументы ад замежных партнёраў», — тлумачыць старшыня Рэспубліканскай асацыяцыі турыстычных агенцтваў Алена Кудлакова.

У нашым топе — лодкі, байдаркі, спа-комплексы

Нягледзячы на тое, што адкрываюцца палёты ў іншыя краіны, хтосьці ўсё ж вырашыць застацца адпачываць у Беларусі. Ірына Варановіч адзначае, што гэтае пытанне таксама прапрацоўваецца з турыстычнымі аб'яднаннямі краіны. «На мінулым тыдні адбылося пасяджэнне рабочай групы з нагоды распрацоўкі рэкамендацый, як неабходна дзейнічаць падчас тураў па Беларусі. Гэтыя рэкамендацыі будуць знаходзіцца ў вольным доступе. Спачатку месяца ўжо пачаліся арганізаваныя турыстычныя паездкі па краіне з захаваннем усіх мер бяспекі ў аўтобусе. Напрыклад, рассаджванне ў ім павінна ажыццяўляцца ў шахматным парадку, таксама абавязковая наяўнасць у аўтобусе дэзынфіцыруючых сродкаў», — адзначае Ірына Варановіч.

Нягледзячы на адкрытыя межы, уязны турызм у Беларусі пакуль цалкам адсутнічае, але «мы рады, што пашыраецца спіс краін, пасля якіх не трэба знаходзіцца на каранціне, напрыклад, да нас ужо могуць прыехаць амерыканскія і турэцкія турысты», — адзначае старшыня праўлення Рэспубліканскага саюза турыстычнай індустрыі Філіп Гулы. «Спадзяемся, што рана ці позна да іх далучацца і расіяне ці хоць бы турысты з некаторых расійскіх рэгіёнаў, дзе сітуацыя з каранавірусам стабілізуецца». Філіп Анатолевіч падкрэслівае, што ўнутраны турызм у Беларусі — гэта, перш за ўсё, інфраструктура, таму самыя складаныя праблемы пакуль адчуваюць гасцініцы. «У некаторых рэгіёнах мясцовая ўлада дастаткова эфектыўна змагла распарадзіцца ўказамі № 143 «Аб падтрымцы эканомікі» і № 178 «Аб часовых мерах дзяржаўнай падтрымкі наймальнікаў і асобных катэгорый грамадзян», але гэтая падтрымка закранула не ўсіх. Што датычыцца актыўнага турызму — лодкі, байдаркі, экалагічныя сцежкі, санаторыі, спа-комплексы, тут наплыў і попыт у беларусаў досыць высокі. Жыхары гарадоў і абласных цэнтраў падарожнічаюць актыўна, таму з чацвярга да панядзелка загрузка вельмі высокая. Санаторыі загружаныя пакуль на 28 %, але, напрыклад, да майскіх свят гэты працэнт не дасягаў і 15, таму досыць нядрэнна, — адзначае Філіп Гулы, дадаючы, — Але сэрвіс не ўсюды адпавядае запытам беларускіх грамадзян, і гэта якраз тая добрая нагода палепшыць яго. Пытанні з сэрвісам пачынаюцца з сістэмы ўзаемадзеяння з кліентам або пасярэднікам, які браніруе пуцёўку або прадае яе, а заканчваюцца непасрэдна сэрвісам на месцы. Спадзяюся, што гэтая сітуацыя дасць нам добрае эфектыўнае развіццё».

На завяршэнне адзначым, што цяпер у турыстычнай галіне краіны ідзе абмеркаванне новага праекта закона аб турызме. На працягу двух тыдняў спецыялісты сустракаліся штодня для яго абмеркавання. Яны адзначаюць, што з улікам сітуацыі з каранавірусам стары закон агаліў шматлікія праблемы галіны, у тым ліку падзел адказнасці паміж турыстычнымі агенцтвамі і аператарамі і забеспячэнне бяспекі турыста ва ўмовах абставін непераадольнай сілы.

Дар'я ЛАБАЖЭВІЧ

Фота Ганны ЗАНКАВІЧ