Вы тут

Арганізацыю чарговага Форуму рэгіёнаў Беларусі і Расіі абмеркавалі ў Савеце Рэспублікі


Арганізацыю чарговага Форуму рэгіёнаў Беларусі і Расіі, які сёлета прымае беларускі бок, абмеркавалі ў рэжыме відэаканферэнцыі ў Савеце Рэспублікі.


Фота БЕЛТА

Работа па ўсіх кірунках

На сумесным пасяджэнні аргкамітэтаў VІІ Форуму рэгіёнаў у цэнтры ўвагі ўдзельнікаў былі арганізацыйныя моманты работы тэматычных секцый, якія ў пераважнай большасці прымеркаваны да 75-й гадавіны Вялікай Перамогі савецкага народа ў вайне з нямецка-фашысцкімі захопнікамі. На парадку дня ўдзельнікаў пасяджэння апынуліся і пытанні рэалізацыі ініцыятыў, агучаных на папярэднім VІ Форуме рэгіёнаў, які прайшоў летась у Санкт-Пецярбургу.

Як паведаміў напачатку пасяджэння віце-спікер Савета Рэспублікі Анатоль ІСАЧАНКА, форум мае адбыцца 23-25 верасня ў беларускай сталіцы і Мінскай вобласці. Запланавана работа пяці секцый, Савета дзелавога супрацоўніцтва, пасяджэнне міжпарламенцкай камісіі і круглы стол з удзелам двух спікераў парламентаў, губернатараў, бізнес-суполкі, дэпутатаў. У кульмінацыйнай частцы форуму — пленарным пасяджэнні — плануецца ўдзел кіраўнікоў дзяржаў.

У гутарцы з журналістамі намеснік старшыні Савета Рэспублікі адзначыў, што ў межах мерапрыемстваў таксама плануецца падпісанне шэрагу пагадненняў аб супрацоўніцтве і камерцыйных кантрактаў. Ужо цяпер гаворка ідзе пра агульную суму 500 мільёнаў долараў. Але на думку Анатоля Ісачанкі, лічба не канчатковая — яна будзе значна большая, бо працэс напаўнення яшчэ не завершаны.

— Работа ідзе і па прамысловасці, і па будаўніцтве, і па сельскай гаспадарцы — мы працуем па ўсіх кірунках з выканкамамі, бізнесам, з усімі зацікаўленымі, бо форум — гэта тая пляцоўка, дзе ўсе сустракаюцца, ідзе падпісанне кантрактаў, вызначаюцца наступныя праекты, — растлумачыў віце-спікер верхняй палаты беларускага парламента.

Праекты і рашэнні

Дарэчы, рэалізацыі праектаў будзе прысвечана работа тэматычнай секцыі «Сумесныя праекты як фактар стабільнага эканамічнага развіцця Беларусі і Расіі», якая размесціцца на пляцоўцы ААТ «БелАЗ». Пра тое, што робіцца па рэалізацыі ініцыятыў, агучаных на папярэднім форуме, удзельнікам сумеснага пасяджэння аргкамітэтаў VІІ Форуму рэгіёнаў Беларусі і Расіі паведаміў дзяржасакратар Саюзнай дзяржавы Рыгор РАПОТА. Ён упэўнены, што гэтая пляцоўка становіцца ўсё больш важным фактарам развіцця Саюзнай дзяржавы, у тым ліку дзякуючы рэалізацыі ініцыятыў, якія маюць вялікае практычнае значэнне.

— Была ініцыятыва ажыццявіць гарманізацыю заканадаўства дзвюх краін. Мушу сказаць, што Пастаянным камітэтам разам з Міністэрствам юстыцыі падрыхтавана канцэпцыя гарманізацыі заканадаўства, яна зараз знаходзіцца на ўзгадненні выканаўчых органаў улады. То-бок гэтае пажаданне (агучанае на папярэднім форуме. — «МС».) падхоплена і выконваецца, — растлумачыў ён.

Таксама на форуме раней прагучала ініцыятыва аб адмене роўмінгу мабільных размоў паміж грамадзянамі Расійскай Федэрацыі і Рэспублікі Беларусь.

— Тут таксама прагрэс відавочны, — упэўнены Рыгор Рапота. Ён растлумачыў, што адпаведныя дарожныя карты падрыхтаваны і выконваюцца.

Акрамя таго, на мінулым форуме прагучала ініцыятыва наконт стварэння высакахуткаснай магістралі, якая злучыць Санкт-Пецярбург і Гамбург. Гаворка ішла пра тое, каб маршрут прайшоў праз беларускія гарады Орша, Мінск і Брэст. Па словах дзяржсакратара Саюзнай дзяржавы, была праведзена дастаткова вялікая падрыхтоўчая работа: кансультацыі
адбываліся на самых высокіх узроўнях на нямецкім, польскім, беларускім і расійскім баках. Цяпер пытанне ў практычнай рэалізацыі гэтага карпаратыўнага праекта.

— Праект плануецца ажыццявіць у асноўным за пазабюджэтныя грошы, — растлумачыў дзяржсакратар. — Кожны бок павінен вылучыць упаўнаважаныя бізнес-структуры, якія распачалі б гэтую дзейнасць.

І калі ў нямецкага боку яны ёсць, то ў расійскага — пакуль на стадыі вырашэння. Далей гэтай тэмай зоймецца беларускі бок, каб можна было распачаць распрацоўку тэхніка-эканамічнага абгрунтавання.

— Адпаведны еўрапейскі банк ужо гатовы яго крэдытаваць. Ёсць і міжнародны фінансавы кансультант, які гатовы весці гэты праект, пачынаючы ад тэхніка-эканамічнага абгрунтавання да яго рэалізацыі, — паведаміў Рыгор Рапота.

Падсумоўваючы ацэнку рэалізацыі праектаў, дзяржсакратар Саюзнай дзяржавы адзначыў, што ўсе тры пазіцыі — гарманізацыя заканадаўства, адмена роўмінгу і высакахуткасная магістраль — знаходзяцца сёння ў дастаткова высокай ступені прапрацоўкі.

У сувязі з гэтым ён выказаў пажаданне, каб на секцыях і далей гучалі канкрэтныя прапановы, якія будуць накіраваны на развіццё эканамічнага, навукова-тэхнічнага, адукацыйнага супрацоўніцтва нашых краін.

Усё для моладзі!

Таксама Рыгор Рапота агучыў прапанову правесці экспертную сесію высокага ўзроўню на тэму «Адукацыя як аснова гістарычнай памяці і далейшага інтэграцыйнага развіцця Саюза Беларусі і Расіі», прычым правесці яе не на палях форуму, а ў яго межах.

Дарэчы, вопыт правядзення такой сесіі ўжо ёсць — летась на VІ Форуме рэгіёнаў яна мела тэму «Прыярытэты развіцця Саюзнай дзяржавы».

Адукацыйную тэму працягнуў намеснік старшыні Пастаяннай камісіі Савета Рэспублікі па адукацыі, навуцы, культуры і сацыяльным развіцці Андрэй ІВАНЕЦ, які агучыў тэматыку секцыі «Подзвіг савецкага народа ў Вялікай Айчыннай вайне — аснова выхавання патрыятызму і грамадзянскай адказнасці». Яе правядзенне запланавана на базе Нацыянальнай акадэміі навук Беларусі. Тут будзе самая вялікая колькасць удзельнікаў — каля 400 чалавек: выступоўцы, госці, навукоўцы, моладзь.

Значным момантам работы секцыі стане выстаўка, у якой прадугледжваюцца элементы інсталяцыі на тэму ваенных падзей, экспанаванне ўнікальных артэфактаў і ваенна-гістарычных рэліквій. Ва ўнутраным дворыку разгорнецца работа палявой кухні і можна будзе пазнаёміцца з ўзорамі ваеннай тэхнікі часоў Вялікай Айчыннай вайны.

Тэматыка выступленняў абяцае быць цікавай і насычанай, упэўнена старшыня Камітэта Савета Федэрацыі па навуцы, адукацыі і культуры Лілія ГУМЕРАВА, а выстаўка стане выхаваўчым праектам для моладзі Беларусі і Расіі.

Але гэта не адзіная пляцоўка, дзе маладыя людзі змогуць пашырыць свой кругагляд. Пра стварэнне ўмоў для павышэння сацыяльна-эканамічнай актыўнасці вясковай моладзі ў мэтах устойлівага развіцця рэгіёнаў Беларусі і Расіі будзе ісці гаворка на тэматычнай секцыі, якую правядуць у Дзяржынскім раёне. Як расказаў старшыня Пастаяннай камісіі Савета Рэспублікі па рэгіянальнай палітыцы і мясцовым самакіраванні Міхаіл РУСЫ, удзельнікі секцыі наведаюць сучасны малочнатаварны комплекс агракамбіната «Дзяржынскі», цэнтр экалагічнага турызму «Станькава», а таксама ваенна-гістарычны цэнтр. Яго калега старшыня Камісіі Савета Федэрацыі па аграрна-харчовай палітыцы і прыродакарыстанні Аляксей МАЁРАЎ дадаў, што для абедзвюх дзяржаў важна, каб моладзь магла рэалізоўваць сябе на вёсцы ва ўсіх кірунках жыцця: рабоце, навучанні, адпачынку — і таму лічыць тэматыку секцыі вельмі актуальнай.

Тэматыка 75-годдзя Вялікай Перамогі будзе гучаць таксама на секцыі «Беларусь і Расія: пашырэнне сумесных намаганняў па супрацьдзеянні гераізацыі нацызму на міжнародных пляцоўках». Як паведаміў старшыня Пастаяннай камісіі Савета Рэспублікі па міжнародных справах і нацыянальнай бяспецы Сяргей РАЧКОЎ, месца правядзення знакавае і для Беларусі, і для горада-героя Мінска — секцыя будзе дзейнічаць на базе музея Вялікай Айчыннай вайны.

Як падкрэсліў намеснік старшыні Савета Федэрацыі Юрый ВАРАБ'ЁЎ, задача арганізатараў — зрабіць так, каб VІІ Форум рэгіёнаў Беларусі і Расіі стаў адным з найбольш значных у шэрагу падзей, прымеркаваных да слаўнай даты, паспрыяў развіццю традыцыйных эканамічных, культурных сувязяў рэгіёнаў Беларусі і Расіі.

Вольга АНУФРЫЕВА

Выбар рэдакцыі

Эканоміка

Всемирная прачечная: евразийские барьеры на пути отмывания грязных денег

Всемирная прачечная: евразийские барьеры на пути отмывания грязных денег

Расширение сотрудничества ЕЭК и Евразийской группы по противодействию легализации преступных доходов и финансированию терроризма (ЕАГ) 10 июля обсудили министр по экономике и финансовой политике ЕЭК Тимур Жаксылыков и директор Росфинмониторинга, председатель ЕАГ Юрий Чиханчин.

Эканоміка

Як абараняцца ад рыэлтараў, якія не хочуць працаваць па законе

Як абараняцца ад рыэлтараў, якія не хочуць працаваць па законе

Лiцэнзiя агенцтва «Гатовыя рашэннi» скасавана, «Iмперыi нерухомасцi» — прыпынена, а «Тваёй сталiцы» выпiсана прадпiсанне.

Палітыка

Аляксандр Лукашэнка: Гэта адна з самых складаных выбарчых кампаній

Аляксандр Лукашэнка: Гэта адна з самых складаных выбарчых кампаній

Кіраўнік дзяржавы прагаласаваў на выбарах Прэзідэнта.