Вы тут

Інстытут павышэння кваліфікацыі і перападрыхтоўкі СК з'явіцца ў Беларусі


«Хацелася б бачыць гэты інстытут як цэнтр, дзе канцэнтруюцца класныя спецыялісты і найноўшыя тэхналогіі»


Прэзідэнт Беларусі Аляксандр Лукашэнка абмеркаваў са старшынёй Следчага камітэта Іванам Наскевічам пытанне арганізацыі дзейнасці Інстытута павышэння кваліфікацыі і перападрыхтоўкі Следчага камітэта Беларусі. 

У Беларусі ніводная навучальная ўстанова пакуль не рыхтуе спецыялістаў у галіне расследавання камп’ютарных тэхналогій, між тым менавіта ў гэтую сферу перамяшчаецца сучасная злачыннасць. У бліжэйшыя дні чакаецца падпісанне ўказу кіраўніка дзяржавы аб стварэнні такой навучальнай установы. 

«Актуальная тэма, — пагадзіўся Аляксандр Лукашэнка. — Ад следства патрабуецца больш якасці, больш ведаў, бо злачыннасць перамяшчаецца ў сферу высокіх тэхналогій. Аператыўнасць вельмі патрэбная. І хацелася б бачыць гэты інстытут не проста як навучальную ўстанову, дзе дадуць нейкія веды, а каб гэта быў у вас цэнтр, дзе канцэнтруюцца класныя спецыялісты і найноўшыя тэхналогіі».

«У рамках інстытута мы плануем праводізць вялізны аб’ём работы па ўніфікацыі следчай практыкі, па метадычным забеспячэнні следства на цалкам іншым узроўні, па ўвядзенні навуковага складніку, — расказаў журналістам па выніках дакладу Іван Наскевіч. — Мы плануем займацца экспартам адукацыйных паслуг».

Тэме інстытута павышэння кваліфікацыі следчых была прысвечана другая частка даклада Івана Наскевіча. 

Да гэтага кіраўнік дзяржавы выслухаў, як абстаяць справы ў рабоце праваахоўных органаў за пяць месяцаў сёлета. Акрамя таго, старшыня СК далажыў пра крымінальныя справы, якія знаходзяцца на кантролі ў Прэзідэнта і пра грамадска значныя, буйныя злачынствы, якія расследаваў Следчы камітэт. 

Іван Наскевіч паведаміў, што крымінагенная абстаноўка ў Беларусі цягам апошніх пяці месяцаў досыць добрая. 

«Узровень злачыннасці ў параўнанні з мінулым годам зменшыўся практычна на 13,5 працэнтаў», — праінфармаваў ён. 

На гэта Прэзідэнт заўважыў, што такіх тэмпаў зніжэння злачыннасці ў краіне не было даўно.  «Думаю, што гэта вынік той планамернай вялізнай работы прафілактычнага характару ўсяго праваахоўнага блоку і ў цэлым дзяржаўных органаў, бо раней або пазней гэта павінна было выявіцца», — лічыць старшыня СК. 

Нагадаем, пра тое, што сітуацыя з недахопамі ў праваахоўнай сістэме павінна змяніцца кардынальна ў лепшы бок, кіраўнік дзяржавы казаў яшчэ ў жніўні мінулага года на вялікай нарадзе па пытаннях якасці работы праваахоўных органаў.

З таго часу тэма якасці работы ў гэтай сферы на пастаяным кантролі Прэзідэнта. 


Злачынствы сыходзяць у Сеціва

У размове з журналістамі старшыня СК дадаў, што ў параўнанні з папярэднімі гадамі апошнім часам назіраецца змяненне і ў структуры злачыннасці. 

«Рэзка вырасла колькасць злачынстваў у сферы высокіх тэхналогій. Іх доля сёння складае 12 працэнтаў, гэта вельмі шмат, і гэта доля расце штогод. Гадоў 6–7 таму такія злачынствы складалі парадку двух працэнтаў, гэта значыць, рост у шэсць разоў», — адзначыў ён. 

Яшчэ адна асаблівасць, па словах кіраўніка Следчага камітэта, тое, што ў сферу высокіх тэхналогій сыходзяць злачынствы, якія да нядаўняга часу мелі статус агульнакрымінальных, напрыклад такія, як вымагальніцтва і махлярства. Цяпер большасць гэтых злачынстваў адбываюцца з дапамогай інфармацыйных тэхналогій. 


Расследаванне справы па факце забойства маладой жанчыны ў Мінску, часткі цела якой знайшлі ў рацэ ў цэнтры горада, скончана

Датычна рэзанансных крымінальных спраў старшыня СК далажыў кіраўніку дзяржавы, у прыватнасці, пра вынікі па факце забойства маладой жанчыны ў Мінску, часткі цела якой знайшлі ў рацэ ў цэнтры горада. 

Па словах Івана Наскевіча, расследаванне крымінальнай справы завершана і накіравана пракурору для перадачы ў суд, злачынства раскрыта, вінаватая асоба выкрыта ў яго здзяйсненні.

Кіраўнік дзяржавы таксама быў праінфармаваны пра вынікі расследавання крымінальнай справы па факту разбойнага нападу на ювелірную краму «Яхант».

«У рамках расследавання ўстаноўлены некалькі эпізодаў злачыннай дзейнасці групоўкі з трох чалавек, — расказаў старшыня СК. — Яны, акрамя разбойных нападаў, кралі зброю. Трываласць групы і мэтанакіраванасць яе дзейнасці дазволілі кваліфікаваць тое, што яны здзейснілі, як бандытызм. Ім прад’яўленыя абвінавачанні ў тым ліку па артыкуле 286-м Крымінальнага кодэксу Беларусі».

Іван Наскевіч заўважыў, што ў нашы дні гэта досыць рэдкае абвінавачанне — апошні раз справа па гэтым артыкуле накіроўвалася ў суд каля пяці гадоў таму. 

Вытворчасць дадзенай крымінальнай справы скончана, зараз пачынаецца стадыя азнаямлення абвінавачаных з матэрыяламі крымінальнай справы. Мяркуецца, што цягам бліжэйшага месяца яна таксама будзе накіравана пракурору для перадачы ў суд. 


«Настаў час змяняць заканадаўства, якое датычыцца тэхнічных умоў будаўніцтва дарог»

«Акрамя таго, Прэзідэнт праінфармаваны пра ўмовы здзяйснення дарожна-транспартнага здарэння, якое адбылося ў Барысаўскім раёне, у выніку якога загінулі шэсць чалавек, у тым ліку трое непаўнагадовых, — працягнуў Іван Наскевіч. — Адной з умоў, па меркаванні следства, з’яўляецца адсутнасць загараджальнай канструкцыі паміж сустрэчнымі палосамі руху. Такога роду аварыі — з выездам на сустрэчную паласу руху і гібеллю людзей — сталі не рэдкасцю». 

Па словах старшыні СК, кіраўнік дзяржавы пагадізўся, што настаў час змяняць заканадаўства, якое датычыцца тэхнічных умоў будаўніцтва дарог, каб хаця б пры рэканструкцыі хуткасных магістраляў знаходзіць сродкі ўсталявання загараджальных канструкцый паміж палосамі сустрэчнага руху. 

«Відавочна, гэта будзе садзейнічаць больш бяспечнай арганізацыі дарожнага руху», — упэўнены Іван Наскевіч.

Ідзе планавая, спакойная работа па фіксацыі супрацьпраўных дзеянняў і зборы доказаў

Цэнтральным апаратам Следчага камітэту працягваецца расследаванне крымінальнай справы, якая была заведзена па арт. 364 Крымінальнага кодэксу Беларусі па факце выкарыстання гвалту ў адносінах да супрацоўніка органаў унутраных спраў у Гродне падчас пікету па збору подпісаў у рамках перадвыбарчай кампаніі, дадаў старшыня СК.

«Зараз гэтая крымінальная справа перакваліфікаваная ў ч. 1 арт. 342 Крымінальнага кодэксу Беларусі «Арганізацыя і падрыхтоўка дзеянняў, якія груба парушаюць грамадскі парадак». Прад’яўлены абвінавачанні і абраная мера стрымання ў адносінах 10 асоб», — заявіў Іван Наскевіч.

Старшыня СК дадаў, што ідзе планавая, спакойная работа па фіксацыі супрацьпраўных дзеянняў і зборы доказаў.

«Колькі чалавек у выніку будзе прыцягнута да крымінальнай адказнасці, я пакуль не скажу, магчыма, іх будзе больш, магчыма — менш, — удакладніў ён. — Расследаванне паказвае, што ў ініцыятыўнай групе было парадку паўсотні асоб судзімых, больш за 10 неаднаразова судзімых, як раз усе яны і з’яўляюцца фігурантамі гэтай крымінальнай справы. Следства працягваецца. Як толькі будзе атрымана інфармацыя, якая заслугоўвае на грамадскі інтарэс, мы праінфармуем усіх пра яго вынікі».

Вольга МЯДЗВЕДЗЕВА

Выбар рэдакцыі

Культура

Кіно, якога не чакалі — 3. Завяршаем падборку драйвовых беларускіх фільмаў

Кіно, якога не чакалі — 3. Завяршаем падборку драйвовых беларускіх фільмаў

Сфера культуры ярчэй за іншыя паказвае, што калі не працуюць традыцыйныя схемы, прыходзіцца шукаць чорны ўваход. Пошукі часам нараджаюць эксперыменты і выкруты, якія абыходзяць абмежаванні, патэрны і завядзёнку і становяцца найлепшымі знакамі свайго часу. 

Грамадства

Як новыя дасягненні вучоных паляпшаюць якасць жыцця і здароўя чалавека?

Як новыя дасягненні вучоных паляпшаюць якасць жыцця і здароўя чалавека?

Па прагнозах спецыялістаў, не менш як 20 працэнтаў ад аб'ёму тавараў у XXІ стагоддзі будзе за біятэхналогіямі.

Грамадства

Збіраем гардэроб школьніка разам са стылістам

Збіраем гардэроб школьніка разам са стылістам

Пошукі і набыццё «школьнай формы», як па старой звычцы кажуць мамы і таты, — тая яшчэ галаваломка! 

Грамадства

Медыцынскі агляд у віцебскіх газавікоў ажыццяўляе... робат

Медыцынскі агляд у віцебскіх газавікоў ажыццяўляе... робат

А наведвальнiкаў крамы кансультуе выява спецыялiста.