Вы тут

Цэнтр медыцынскай рэабiлiтацыi ў Мазыры працягне працаваць


У Мазыры Цэнтр медыцынскай рэабiлiтацыi для дзяцей-iнвалiдаў i маладых iнвалiдаў з псiханеўралагiчнымi захворваннямi працягне працаваць у ранейшым будынку, але ў новай якасцi. Установа, якую збiралiся закрыць i перадаць яе памяшканне iншай, больш не знаходзiцца пад пагрозай.


Мазырскi цэнтр медыцынскай рэабiлiтацыi «Вясёлка» быў адкрыты ў вераснi 1995 года. Функцыянуе ўстанова па прынцыпе дзённага стацыянара: дзецi i маладыя людзi з абмежаванымi магчымасцямi трапляюць сюды па накiраваннi палiклiнiк па месцы жыхарства. Кожны пацыент праходзiць дэталёвае абследаванне. Аднак наведвальнiкi не толькi атрымлiваюць тут патрэбныя iм лячэнне i працэдуры, але i праходзяць навучанне, займаюцца з вузкiмi спецыялiстамi — дэфектолагамi-лагапедамi i псiхолагамi, маюць зносiны памiж сабой, праводзяць сумесныя святы i мерапрыемствы.

Да апошняга часу «Вясёлка» была як другi дом для 51 чалавека: 17 непаўналетнiх i 34 старэйшых за 18 гадоў. Праўда, у звычайны рэжым наведвання ўнесла карэктывы эпiдэмiялагiчная сiтуацыя — пакуль прыязжае толькi 70 % «вясёлкаўцаў».

Не так даўно Мазырскi райвыканкам прыняў рашэнне закрыць цэнтр, а яго пацыентаў пераразмеркаваць у iншыя профiльныя ўстановы. Памяшканне ж планавалi рэканструяваць у дзiцячы садок, якi таксама неабходны ў гэтым густанаселеным мiкрараёне Мазыра.

«Вясёлкаўцам» прапанавалi наведваць цэнтр карэкцыйна-развiвальнага навучання i рэабiлiтацыi, а таксама аддзяленне дзённага знаходжання iнвалiдаў тэрытарыяльнага цэнтра сацыяльнага абслугоўвання насельнiцтва.

Бацькi дзяцей з абмежаванымi магчымасцямi i маладыя iнвалiды не пагадзiлiся з такiм рашэннем. Яны былi ўпэўненыя, што з закрыццём цэнтра пазбавяцца якаснага лячэння, а таксама медыцынскай, сацыяльнай, педагагiчнай i псiхалагiчнай дапамогi. Бацькоў турбаваў далейшы лёс дзяцей. Праблемнае пытанне атрымала шырокi грамадскi рэзананс.

Цяпер рашэнне мясцовага райвыканкама аб закрыццi Цэнтра медыцынскай рэабiлiтацыi для дзяцей-iнвалiдаў i маладых iнвалiдаў з псiханеўралагiчнымi захворваннямi з 1 чэрвеня адменена Гомельскiм аблвыканкамам. Але былая «Вясёлка» стане асновай для новага цэнтра абласнога маштабу. Прынцып яго функцыянавання будзе iстотна зменены ў параўнаннi з ранейшымi падыходамi да работы.

— Мы дэталёва вывучылi гэтае пытанне. Сёння ў вобласцi рэалiзуецца шмат сацыяльных праектаў. Адным з такiх стане i цэнтр комплекснай рэабiлiтацыi для iнвалiдаў у Мазыры, — адзначыў старшыня Гомельскага аблвыканкама Генадзь Салавей. — Плануецца, што новая ўстанова не будзе ўваходзiць у структуру аховы здароўя, як цяпер, а стане падпарадкоўвацца Камiтэту па працы, занятасцi i сацыяльнай абароне насельнiцтва аблвыканкама. Размесцiцца яна ў памяшканнях «Вясёлкi».

Губернатар падкрэслiў, што ў апошнiя гады магчымасцi дзеючага цэнтра выкарыстоўвалiся не ў поўнай меры. Напрыклад, будынак разлiчаны больш чым на 200 месцаў, але яго наведвала значна меншая колькасць людзей.

— Важна, каб установа развiвала таксама творчыя здольнасцi людзей з абмежаванымi фiзiчнымi магчымасцямi, працаваў як цэнтр карэкцыйна-развiвальнага навучання. Бо ў многiх падапечных ёсць схаваны патэнцыял. Яны малююць, спяваюць, iграюць на музычных iнструментах. Трэба ўбачыць гэты патэнцыял, стварыць умовы для яго рэалiзацыi, — лiчыць старшыня аблвыканкама.

Ён прывёў у прыклад праект «Карытас-Мiласэрнасць» па стварэннi ў Гомелi iнтэграцыйнага цэнтра для людзей з абмежаванымi магчымасцямi.

— Там прадугледжаны ўсе ўмовы, каб дзiця адчувала сябе як дома, развiвалася. Хочацца, каб i «Вясёлка» была такая ж. Мы чакаем карэкцiроўкi прававой базы, i тады будуць прыняты канкрэтныя рашэннi. «Вясёлка» i далей будзе працаваць, толькi ў новым фармаце, — падкрэслiў Генадзь Салавей. — Будуць перагледжаны ўмовы, паслугi i iншыя нюансы.

У сваю чаргу, старшыня камiтэта па працы, занятасцi i сацыяльнай абароне Гомельскага аблвыканкама Пётр Шуцько растлумачыў, што ў новым цэнтры з'явяцца аддзяленне дзённага знаходжання, аддзяленне сацыяльнай рэабiлiтацыi, у тым лiку для людзей, якiя атрымалi iнвалiднасць пасля цяжкiх траўмаў цi няшчасных выпадкаў.

— Гэты дыялог вельмi важны для нас, — ад iмя бацькоў «вясёлкаўцаў» падзякавала аблвыканкаму за падтрымку мацi адной з падапечных Наталля Бурак. — Нас хвалявала тое, каб пры магчымай лiквiдацыi «Вясёлкi» дзецi з абмежаванымi магчымасцямi не засталiся ў чатырох сценах, у замкнёнай прасторы. Яны ўжо прывыклi да зносiн, у iх з'явiлiся сябры. Гэта таксама тэрапiя. Цяпер цэнтру ў Мазыры быць, гэта для нас вельмi важна.

Бацькi адзначылi, што канкрэтныя прапановы па ўдасканаленнi работы цэнтра, якiя прапанавала кiраўнiцтва рэгiёна, — неацэнны ўнёсак. Яны, у сваю чаргу, гатовыя аказваць пасiльную дапамогу.

Дарэчы, прагучала на сустрэчы i прапанова, каб бацькi пры падтрымцы грамадскiх арганiзацый, зыходзячы з асабiстага вопыту, падрыхтавалi i ўнеслi прапановы па змяненнi заканадаўства, якое датычыцца догляду дзяцей з асаблiвасцямi здароўя ў бальнiцах, суправаджэння ў навучальных установах i падобных праблем. Гэтыя прапановы маюць намер накiраваць парламентарыям.

Мiж тым кiраўнiк Гомельскага аблвыканкама запэўнiў, што Мазыр не застанецца i без новых устаноў дашкольнай адукацыi. У хуткiм часе ў райцэнтры будуць пабудаваны два новыя дзiцячыя садкi. Будаўнiцтва першага ўжо пачалося ў густанаселеным мiкрараёне горада, пад другi плануюць рэканструяваць адзiн з будынкаў.

Наталля КАПРЫЛЕНКА

Фота БЕЛТА

Выбар рэдакцыі

Эканоміка

Як абараняцца ад рыэлтараў, якія не хочуць працаваць па законе

Як абараняцца ад рыэлтараў, якія не хочуць працаваць па законе

Лiцэнзiя агенцтва «Гатовыя рашэннi» скасавана, «Iмперыi нерухомасцi» — прыпынена, а «Тваёй сталiцы» выпiсана прадпiсанне.

Палітыка

Аляксандр Лукашэнка: Гэта адна з самых складаных выбарчых кампаній

Аляксандр Лукашэнка: Гэта адна з самых складаных выбарчых кампаній

Кіраўнік дзяржавы прагаласаваў на выбарах Прэзідэнта.

Грамадства

Медыцынскі агляд у віцебскіх газавікоў ажыццяўляе... робат

Медыцынскі агляд у віцебскіх газавікоў ажыццяўляе... робат

А наведвальнiкаў крамы кансультуе выява спецыялiста.