Беларусь і Венгрыя падпісалі мемарандум аб супрацоўніцтве ў галіне электраэнергетыкі

Мемарандум аб супрацоўніцтве паміж Міністэрствам энергетыкі Беларусі і Апаратам прэм’ер-міністра Венгрыі ў галіне электраэнергетыкі падпісаны сёння ў Мінску. Дакумент заключаны ў ходзе афіцыйнага візіту ў Беларусь прэм’ер-міністра Венгрыі Віктара Орбана, перадае прэс-служба Міністэрства энергетыкі.

З беларускага боку мемарандум падпісаў міністр энергетыкі Віктар Каранкевіч, з венгерскага — міністр без партфеля, адказны за праектаванне, будаўніцтва і ўвод у эксплуатацыю двух новых блокаў АЭС «Пакш» Янаш Шюлі.

Дакумент замацоўвае узаемную зацікаўленасць Беларусі і Венгрыі ў супрацоўніцтве ў ядзерна-энергетычнай сферы і накіраваны на развіццё кантактаў паміж арганізацыямі, дзейнасць якіх звязана з будаўніцтвам аб’ектаў атамнай энергетыкі і інфраструктуры. Акрамя таго, плануецца абмен вопытам у сферы эксплуатацыі атамных электрастанцый, захоўвання і захаранення радыеактыўных адходаў. Мемарандум прадугледжвае розныя формы ўзаемадзеяння, у тым ліку стварэнне сумесных прадпрыемстваў для ўдзелу ў інвестыцыйных праектах у галіне электраэнергетыкі. Бакі таксама дамовіліся развіваць партнёрства па пытаннях аказання тэхнічнай падтрымкі і абмену спецыялістамі.

«Беларусь разглядае Венгрыю ў якасці перспектыўнага партнёра і гатова прыняць удзел у праекце па ўзвядзенню карпарацыяй «Росатом» двух блокаў АЭС у Венгрыі. Беларускія будаўнікі і энергетыкі маюць для гэтага неабходны вопыт і веды», — адзначылі ў прэс-службе Мінэнерга.

Акрамя таго, МЗС Беларусі і Венгрыі падпісалі мемарандум аб узаемаразуменні аб супрацоўніцтве ў сферы дыпламатычнай падрыхтоўкі і абмену інфармацыяй і дакументацыяй. Мемарандум аб узаемаразуменні заключаны паміж Нацыянальным цэнтрам маркетынгу і кан’юнктуры цэн Міністэрства замежных спраў Беларусі і Венгерскім агенцтвам па садзейнічанні экспарту. З Беларускага боку дакументы падпісаў міністр замежных спраў Уладзімір Макей, з венгерскага — міністр замежных спраў і знешняга гандлю Венгрыі Петэр Сійярта.

Мемарандум аб узаемаразуменні паміж Міністэрствам сельскай гаспадаркі і харчавання Беларусі і Міністэрствам сельскай гаспадаркі Венгрыі па пытаннях супрацоўніцтва ў галіне племянной птушкагадоўлі падпісалі міністр сельскай гаспадаркі і харчавання Беларусі Іван Крупко і Петэр Сійярта.