24 кастрычніка, субота

Вы тут

Рарытэты Нацыянальнага гiстарычнага музея Беларусi з'явіліся на агароджы парка iмя Чалюскiнцаў у Мiнску


Калi Магамет з аб'ектыўных прычын не можа прыйсцi да гары, гара робiць сэлфi i дасылае Магамету. Гэта вельмi спрошчаная карцiна таго, як у неспрыяльнай эпiдэмiялагiчнай сiтуацыi вымушаныя працаваць музеi i iншыя культурныя ўстановы. Вось чаму новы праект «Рарытэты Нацыянальнага гiстарычнага музея Беларусi», якi 2 чэрвеня афiцыйна стартаваў i на працягу года будзе працаваць пад адкрытым небам на агароджы парка культуры i адпачынку iмя Чалюскiнцаў у Мiнску, вывеў многiх з анлайну ў рэальнасць, нягледзячы на надвор'е.


Як ужо расказвала «Звязда», «Рарытэты...» — гэта 70 фотабанераў, якiя адлюстроўваюць культурнае багацце i ўнiкальнасць беларускай нацыi. На выставачнай алеi змешчаны высакаякасныя здымкi i iнфармацыя на трох мовах пра больш чым 300 музейных артэфактаў, што захоўваюцца ў фондах Нацыянальнага гiстарычнага музея i ўсiх яго фiлiялаў. Узоры беларускай нумiзматыкi i самабытныя народныя строi з розных рэгiёнаў, партрэты славутых гiстарычных асоб i прылады для традыцыйных рамёстваў, музычныя iнструменты, кнiгi, посуд, упрыгожаннi, шэдэўры iканапiсу, разнастайнасць беларускай прыроды, шматлiкiя археалагiчныя знаходкi — праект ва ўмовах пандэмii аказаўся як нiколi дарэчы, бо тут можна здзейснiць падарожжа ў часе i прасторы, захоўваючы рэкамендаваную сацыяльную дыстанцыю i не завiтваючы ў музейныя залы. Хоць, канешне, арганiзатары спадзяюцца абудзiць у суайчыннiках i замежных турыстах цiкавасць да музеяў, да багатай беларускай гiсторыi i культурнай спадчыны. «Вымушаны антракт у камунiкацыях прымусiў нас з яшчэ большай цеплынёй ставiцца да нашых гасцей, сяброў i партнёраў», — зазначыў на адкрыццi праекта дырэктар Нацыянальнага гiстарычнага музея Павел Сапоцька.

...Здымкi артэфактаў з музейнай скарбнiцы, расказваюць аўтары праекта, фатографы, журналiсты, лаўрэаты прэмii «За духоўнае адраджэнне» (2005) Аляксандр Аляксееў i Алег Лукашэвiч, iшлi штодзень на працягу месяца, i для таго, каб якасна, без блiкаў i адбiткаў, зняць нават маленькi прадмет з металу цi шкла, сыходзiла па некалькi гадзiн. Але працэс здымак, калi можна было патрымаць у руках бясцэнныя артэфакты — рэчыўныя часткi гiсторыi роднай краiны, захапляў настолькi, што на час нiхто з удзельнiкаў здымак не звяртаў увагi.

Галоўны спецыялiст упраўлення культуры Мiнгарвыканкама Марына Ясюк нагадала: агароджа парка Чалюскiнцаў ужо дзявяты раз становiцца арт-пляцоўкай для доўгатэрмiновых выставачных праектаў, якiя праходзяць пад адкрытым небам. Цяперашнi, дарэчы, рэалiзаваны ў дзяржаўна-прыватным партнёрстве — пры падтрымцы Мiнiстэрства культуры, Мiнгарвыканкама i фiнансавай дапамозе ААТ «Беларусбанк».

— Выстаўка «Рарытэты Нацыянальнага гiстарычнага музея» хоць i адкрытая для наведвальнiкаў, але са зразумелых прычын дасяжная пакуль толькi беларусам. Як плануецца прасоўваць праект — можа, ёсць iдэя запiсаць аўтарскiя анлайн-экскурсii? — спытала «Звязда» ў аўтараў праекта.

— Цяпер ёсць мноства новых iдэй, як гэты праект развiваць, у тым лiку, я спадзяюся, з'явiцца аўдыягiд на розных мовах. Бо цiкавасць да нашай краiны ёсць: напрыклад, калi мы здзяйснялi праект «Спадчына Беларусi» i дарылi гэты фотаальбом замежнiкам, яго праглядалi з першай да апошняй старонкi, распытвалi пра нашу гiсторыю, i ў многiх менавiта пасля гэтага з'яўлялася жаданне наведаць Беларусь, каб пазнаёмiцца з краiнай блiжэй. Але галоўная мэта для нас як аўтараў — у тым, каб падняць самасвядомасць беларусаў, каб мы самi ведалi, любiлi i шанавалi сваю краiну, сваю гiсторыю i культуру, бо, паверце, толькi ў гэтым выпадку палюбяць i нас у свеце.

— Каб не быць галаслоўным, прывяду лiчбы, — дадае Алег Лукашэвiч, — альбом «Спадчына Беларусi» перавыдаваўся 18 разоў, а яго агульны тыраж склаў 46,5 тысячы асобнiкаў. І цяпер гэта кнiга добра прадаецца, хоць яна адна з самых дарагiх у нашых кнiгарнях, кошт падарункавага выдання ў скураной вокладцы звыш 500 рублёў... Калi мы пачыналi гэты праект у 2001 годзе, нават не думалi, што ён будзе такi паспяховы, атрымае працяг i падштурхне краiну да больш актыўнай рэстаўрацыi i захавання сваiх архiтэктурных помнiкаў. Але гэта адбылося, i сёння мы бачым, колькi помнiкаў адноўлена, колькi ўсяго зроблена i робiцца для захавання гiсторыка-культурнай спадчыны. А таму, безумоўна, будзем працаваць надалей, каб прадставiць нашы культурныя скарбы i здабыткi ў самых розных аспектах i кiрунках.

Вiкторыя ЦЕЛЯШУК

Фота Яўгена ПЯСЕЦКАГА

Загаловак у газеце: Каб любiць Беларусь нашу мiлую

Выбар рэдакцыі

Грамадства

Жыццёвы шлях Якава Крэйзера. Першы камдзiў, якi атрымаў Зорку Героя, заслужыў яе, абараняючы Барысаў

Жыццёвы шлях Якава Крэйзера. Першы камдзiў, якi атрымаў Зорку Героя, заслужыў яе, абараняючы Барысаў

У пачатковы перыяд Вялiкай Айчыннай вайны зацятыя баi разгарнулiся пры абароне Барысава — старадаўняга беларускага горада на Бярэзiне. 

Грамадства

Схадзіць на «Куфар» і застацца без грошай. На папулярным сайце можна сустрэць махляра, замаскіраванага пад пакупніка

Схадзіць на «Куфар» і застацца без грошай. На папулярным сайце можна сустрэць махляра, замаскіраванага пад пакупніка

«Лічбавыя жулікі», якія здымаюць грошы з чужых банкаўскіх карт, звычайна маскіруюцца пад інтэрнэт-рэсурсы, вартыя даверу.