У бліжэйшыя дні ацяпленне ў Мінску адключаць не будуць

Такім чынам сталічныя ўлады падкрэсліваюць правільную работу па прафілактыцы захворванняў, у тым ліку каранавіруса.

Ва ўсіх установах Мінска батарэі застануцца гарачымі яшчэ як мінімум цягам тыдня. Рашэнне аб заканчэнні ацяпляльнага сезону будзе прымацца, як мяркуецца, у чацвер. Між тым, у астатніх рэгіёнах Беларусі ўсе адміністрацыйныя будынкі перасталі ацяпляць яшчэ напрыканцы красавіка, згодна з рашэннем мясцовых органаў выканаўчай улады.

Найперш батарэі сталі халоднымі ў Гродзенскай вобласці (з 23 красавіка), на Гомельшчыне ацяпленне адключалі з 24 па 30 красавіка, Брэсцкая вобласць пазбаўлялася ад цяпла з 29 красавіка, магіляўчанам адключалі батарэі 29-30-га, а Віцебская вобласць пачала спыняць ацяпляльны сезон з 30 красавіка. На Міншчыне ацяпленне поўнасцю спынена ў Барысаве, Маладзечне, Жодзіна, Рудзенску, Свіслачы, Дружным, часткова ў Салігорску.

4 мая ў Гомельскай, Гродзенскай, Віцебскай, Брэсцкай, Магілёўскай і Мінскай абласцях поўнасцю адключана ацяпленне ва ўсіх адміністрацыйных будынках.

— Сацыяльна-культурныя аб’екты і бальніцы ў гэтых рэгіёнах у большасці працягваюць ацяпляцца, — расказаў начальнік аддзела па працы са зваротамі грамадзян і СМІ Міністэрства жыллёва-камунальнай гаспадаркі Генадзь АКСЦІЛОВІЧ. — Ацяпленне адключана таксама ў жыллі Гродзенскай, Гомельскай, Віцебскай, Брэсцкай, Магілёўскай і 11 раёнаў Мінскай абласцей. У Мінску ацяпленне яшчэ нідзе не выключалі.

Сёлетні ацяпляльны сезон у сталіцы цягнецца з 24 верасня 2019-га. Такім чынам гарачымі батарэі тут застаюцца ўжо цягам больш як сямі месяцаў. Рашэнне аб неадключэнні цяпла ў сталіцы ў Мінгарвыканкаме тлумачаць як адну з мер па прафілактыцы прастуд, якая абмяркоўвалася на адным са штабоў па каранавірусу. Такім чынам сталічныя ўлады падкрэсліваюць правільную работу па прафілактыцы захворванняў, бо ў адных кватэрах зараз можа быць горача, а ў іншых — пакуль холадна. Тым больш што сярэднесутачная тэмпература ў 8 °С цягам трох дзён запар, якая дае падставу сканчваць ацяпляльны сезон, у сталіцы пакуль не зафіксавана.

Мінчане, у кватэрах якіх цяпер занадта горача (звыш 24 °С), могуць звярнуцца ў службу 115 і пакінуць адпаведную заяўку. Дарэчы, тое ж самае падчас ацяпляльнага сезону могуць рабіць жыхары ўсёй Беларусі.

— Калі факт ператопу будзе пацверджаны, жыхарам выдадуць прэтэнзійны акт, на падставе якога яны могуць звярнуцца ў разлікова-даведачны цэнтр, і ім зробяць пераразлік, — удакладніў Генадзь Аксціловіч.

Што датычыцца графікаў штогадовага прафілактычнага адключэння гарачай вады, то, як і раней, Мінжылкамгас прытрымліваецца рэкамендацыі перанесці планавыя работы, якія меліся адбыцца ў маі, на верасень. Аднак кожны рэгіён самастойна вызначае, ці следаваць такой парадзе.

Ірына СІДАРОК

Фота аўтара