Вы тут

Культурны праект «Мастак i горад» пройдзе ў анлайн-фармаце


Новы час дыктуе новыя падыходы: арганiзатары мастацкiх iмпрэз iмклiва вучацца праводзiць iх з улiкам абмежаванняў дыстанцыяй i самаiзаляцыяй. Так, штогадовы культурны праект «Мастак i горад», якi прысвечаны сёлета 100-годдзю творчай суполкi УНОВIС, у сярэдзiне мая дзявяты раз адкрыецца на сталiчнай плошчы Якуба Коласа — але ўпершыню ў анлайн-фармаце.


На працягу васьмi мiнулых гадоў «Мастак i горад» выводзiў карцiны за межы галерэй, музеяў i прыватных калецый — з вузкага кола знаўцаў i прыхiльнiкаў у публiчную гарадскую прастору, прычым не толькi мiнскую — выстаўка праходзiла таксама ў Вiцебску i Брэсце, расквечваючы будзённасць вулiц i адкрываючы, куды ўжо блiжэй, для шырокай публiкi творчасць класiкаў i сучаснiкаў беларускага выяўленчага мастацтва — Марка Шагала, Казiмiра Малевiча, Валянцiна Губарава, Георгiя Скрыпнiчэнкi, Мiкалая Селешчука, а летась — Зоi Луцэвiч i Зоi Лiтвiнавай. Цяперашнi пераход у анлайн-рэжым, як мяркуюць арганiзатары, дазволiць шматразова павялiчыць аўдыторыю i пайсцi яшчэ далей — з гарадскiх вулiц i плошчаў наўпрост у кватэры ўсiх аматараў жывапiсу, незалежна ад iх месцазнаходжання.

У гэтым сезоне выставачны праект, падтрыманы гарадскiмi ўладамi Мiнска i Вiцебска, ладзiцца пад знакам #UNOVIS100 i прадставiць гледачам 32 работы айчынных мастакоў-авангардыстаў. Сярод аўтараў — жывапiсцы з вiцебскага мастацкага аб'яднання «Квадрат» Аляксандр Малей, Мiкалай Дундзiн, Вiктар Шылко, Аляксандр Слепаў, Валерый Чукiн i Аляксандр Дасужаў. «Квадрат» дзейнiчаў у Вiцебску ў 1987—1994 гадах i, паводле ўласнага азначэння, «прэтэндаваў на самастойнасць i незалежнасць у дачыненнi да творчасцi i арганiзацыi творчага працэсу», пры гэтым развiваў iдэi i асноўныя прынцыпы супрэматызму Казiмiра Малевiча, а таму з поўным правам мог звацца спадчыннiкам УНОВIСа.

Дырэктар Вiцебскага цэнтра сучаснага мастацтва Андрэй Духоўнiкаў адносiць праект «Мастак i горад» да тых падзей, што не бяруцца з нiадкуль, а нiбыта выходзяць з ценю:

— Нягледзячы на модныя i нямодныя плынi, змены кан'юнктур, з'яўленне i сыход новых рэалiй, у Вiцебску быў i ёсць свой, шмат у чым унiкальны, культурны асяродак. У iм нараджалiся i працягваюць нараджацца новыя iдэi, новыя мастакi. Можна гаварыць пра сувязь з самымi вялiкiмi iмёнамi, праводзiць паралелi, але вiцебскiя мастакi, такiя, якiя яны ёсць, — яркiя iндывiдуальнасцi, асобы. У iх творчасцi гучыць Вiцебск, горад, людзi i тыя вiбрацыi, што можна адчуць, паглядзеўшы работы, прадстаўленыя на выстаўцы».

Зрабiць гэта сёлета будзе як нiколi проста: «Мастак i горад» пераходзiць у анлайн-рэальнасць. Каб наведаць экспазiцыю, не трэба нават пакiдаць кватэру — з 14 мая вiртуальны тур па плошчы Якуба Коласа можна зладзiць на сайце праекта higminsk.by. На iнтэрнэт-лакацыi ў панарамным фармаце будуць размешчаны белыя кубы з рэпрадукцыямi карцiн. «Абыходзячы» канструкцыю, iнтэрнэт-наведвальнiкi змогуць разгледзець кожную работу з усiх бакоў, а пры нацiсканнi на рэпрадукцыю адкрыецца фотаздымак высокай якасцi. Карцiны традыцыйна суправаджаюцца апiсаннямi на беларускай, рускай i англiйскай мовах.

У звыклым фармаце, на сапраўднай, а не вiртуальнай плошчы праект «Мастак i горад» 2020 года плануецца адкрыць, як толькi гэта дазволiць зрабiць эпiдэмiялагiчная сiтуацыя. Калi ўсё атрымаецца, экспазiцыя таксама прыедзе з Мiнска ў Вiцебск, дзе сто гадоў таму i нарадзiлася творчае аб'яднанне УНОВIС.

Вiкторыя ЦЕЛЯШУК

Фота арганiзатараў праекта

Загаловак у газеце: Мастакi выходзяць з ценю

Выбар рэдакцыі

Грамадства

Не трапіць у рабства анлайн. Як у краіне змагаюцца з гандлем людзьмі

Не трапіць у рабства анлайн. Як у краіне змагаюцца з гандлем людзьмі

З 2000 года ў Беларусі выяўлена 4421 злачынства, звязанае з гандлем людзьмі.

Эканоміка

Дзесяць пытанняў пра крэдыты, або Што трэба ведаць аб крэдыце, каб ён стаў сродкам рэалізацыі мэт, а не цяжарам на плячах

Дзесяць пытанняў пра крэдыты, або Што трэба ведаць аб крэдыце, каб ён стаў сродкам рэалізацыі мэт, а не цяжарам на плячах

Пра што абавязкова трэба падумаць перад тым, як браць на сябе фінансавыя абавязацельствы перад банкам?