Вы тут

Каля двух дзясяткаў кніг ўбачылі свет да 75-годдзя Вялікай Перамогі


Каля двух дзясяткаў кніг, якія ўбачылі свет да 75-годдзя Вялікай Перамогі, прадставілі ў Мінску беларускія дзяржаўныя выдавецтвы.


У пэўным сэнсе слова флагманам у тэме Вялікай Айчыннай вайны з'яўляецца «Беларуская энцыклапедыя імя Петруся Броўкі», зазначыла дырэктар выдавецтва Вольга Ваніна. Тут у 2019-2020 гадах у шчыльным супрацоўніцтве з Нацыянальным архівам і Беларускім архівам кінафотафонадакументаў, Інстытутам гісторыі НАН Беларусі, музеем гісторыі Вялікай Айчыннай вайны выпушчаны цэлы шэраг змястоўных, аформленых па найноўшых паліграфічных тэхналогіях выданняў, а яшчэ некалькі выйдзе з тыпаграфіі ў найбліжэйшы час.

Так, у кніжнай серыі «Беларусь памятае. У імя жыцця і міру», запушчанай як частка маштабнай рэспубліканскай акцыі «Беларусь памятае», на сёння выйшлі ўжо чатыры кнігі, кожная з якіх утрымлівае не толькі малавядомыя архіўныя звесткі і ўспаміны відавочцаў, але і багаты ілюстрацыйны матэрыял — звыш 600 фотаздымкаў. Найноўшая ў серыі — энцыклапедыя «Савецкія святы і партызанскія парады на тэрыторыі Беларусі ў гады Вялікай Айчыннай вайны». Яна выйшла з друку літаральна днямі і расказвае пра тое, як партызаны, падпольшчыкі і мірнае насельніцтва адзначалі 1 мая, 7 лістапада і іншыя знакавыя для савецкіх людзей святы, як праходзіў па вызваленым Мінску партызанскі парад, а таксама як 7 лістапада 1941 года ў адказ на гітлераўскую прапаганду быў праведзены ў Маскве легендарны Парад надзеі, без якога, як лічылі многія франтавікі, магло б не быць і Парада Перамогі. Наступная кніга ў гэтай серыі, анансавала Вольга Ваніна, раскажа пра аднаўленне разбуранага фашыстамі Мінска і будзе мець назву «Адроджаны з попелу. Скіраваны ў будучыню».

Таксама працягваецца серыя «Беларусь: трагедыя і праўда памяці». Яе кнігі ў выдавецтве называюць «чорнымі квадратамі», і гэтая характарыстыка адпавядае як зместу, так і вонкаваму афармленню кніг, бо прысвечана кожная з іх злачынствам фашыстаў на беларускай зямлі — спаленым вёскам, найбуйнейшым гета і канцэнтрацыйным лагерам, у якіх загінулі тысячы і дзясяткі тысяч людзей. Матэрыял для гэтых выданняў рыхтуюць прафесійныя гісторыкі сумесна з мясцовымі гісторыка-краязнаўчымі музеямі ў розных рэгіёнах, расказваючы нам, нашчадкам салдат Вялікай Айчыннай, пра чорныя, балючыя кропкі на карце Беларусі — Хатынь, Трасцянец, Азарычы, Навагрудак, Масюкоўшчыну... У цяперашні час рыхтуецца выданне, прысвечанае Асіповічам, таксама даследчыкі збіраюць матэрыялы па гета і канцэнтрацыйных лагерах у Брэсцкай, Магілёўскай, Віцебскай абласцях.

Чым менш застаецца жывых сведкаў Вялікай Айчыннай вайны, тым большую свабоду атрымліваюць разнастайныя «інтэрпрэтатары», якія перакручваюць факты часам з ног на галаву ў мэтах перапісаць гісторыю. Менавіта таму, падкрэсліў кіраўнік Выдавецкага дома «Звязда» Павел Сухарукаў, задача беларускіх выдавецтваў, перш за ўсё дзяржаўных, — захаваць сапраўдную гістарычную памяць, збіраючы з першых вуснаў бясцэнныя звесткі. У прыватнасці, у Выдавецкім доме «Звязда» да 75-годдзя Вялікай Перамогі ўбачыла свет новая кніга Мікалая Смірнова «Партызанскі «другі фронт» у Беларусі». У яе ўвайшлі архіўныя дакументы, а таксама аўтарскія нарысы, якія раскрываюць малавывучаную тэму — імёны ўдзельнікаў і падрабязнасці аперацый спецслужбаў — атрадаў НКУС (НКДБ) і ваеннай контрразведкі, якія дзейнічалі на акупаванай нацыстамі тэрыторыі БССР.

Яшчэ адна кніга выдавецтва павінна ўбачыць свет акурат да 9 мая і стаць выдатным падарункам для ветэранаў. Зборнік «Беларусь помніць. Міншчына ганарыцца» складаецца з успамінаў сведкаў і непасрэдных удзельнікаў ваеннага ліхалецця — ветэранаў Вялікай Айчыннай вайны, якія цяпер жывуць на тэрыторыі Мінскай вобласці.

Кніга доктара гістарычных навук Галіны Аляхновіч «Працоўная Беларусь — фронту», якую выпусціла да юбілейнай даты выдавецтва «Беларусь», нагадвае сучаснікам пра тое, што подзвігі падчас вайны беларускі народ здзяйсняў не толькі на фронце, у падпольнай і партызанскай барацьбе з ворагам, але і ў тыле — працуючы на прадпрыемствах пад заклікам «усё для фронту, усё дзеля Перамогі», аднаўляючы прамысловасць і сельскую гаспадарку на вызваленых тэрыторыях.

Большасць згаданых кніг ужо можна ўбачыць у айчынных кнігарнях. Дарэчы, знайсці іх на паліцах будзе нескладана — па ініцыятыве Міністэрства інфармацыі кожны асобнік выданняў, прысвечаных Вялікай Айчыннай вайне і 75-годдзю Перамогі, пазначаны адмысловай яркай папяровай стужкай.

Вікторыя ЦЕЛЯШУК

Фота Ганны ЗАНКАВІЧ

Загаловак у газеце: Чытаць, каб помніць

Выбар рэдакцыі

Грамадства

Чым здзівілі фіналісты праекта TEDxYouth@Mіnsk?

Чым здзівілі фіналісты праекта TEDxYouth@Mіnsk?

Канферэнцыя прайшла ў анлайн-фармаце на відэасэрвісе VOKA.

Грамадства

Інтэр'ер для эстраднай зоркі. Глусчане сведчаць, што Філіп Кіркораў заказваў на іх фабрыцы дзверы

Інтэр'ер для эстраднай зоркі. Глусчане сведчаць, што Філіп Кіркораў заказваў на іх фабрыцы дзверы

Зараз такой фабрыкі няма, але ёсць людзі, якія могуць згадаць гісторыю яе існавання.

Грамадства

У Мінску пасля рэканструкцыі адкрыўся Музей гісторыі камсамола і маладзёжнага руху Беларусі

У Мінску пасля рэканструкцыі адкрыўся Музей гісторыі камсамола і маладзёжнага руху Беларусі

У Мінску пасля рэканструкцыі адкрыўся Музей гісторыі камсамола і маладзёжнага руху Беларусі.