Валанцёры Беларускага рэспубліканскага саюза моладзі даставілі пажылым пацыентам сталічных паліклінік 2712 рэцэптаў.
Добраахвотнікі Мінскай гарадской арганізацыі БРСМ працягваюць эстафету добрых спраў па аказанні дапамогі паліклінікам сталіцы ў адраснай дастаўцы пажылым гараджанам з хранічнымі захворваннямі рэцэптаў для іх далейшага планавага лячэння. Сёння ў Мінску працавалі 43 валанцёры. Яны даставілі адрасатам 559 рэцэптаў, паведамляе ЦК БРСМ. Самая ж вялікая колькасць рэцэптаў была перададзена 26 сакавіка — 653. Усяго за перыяд супрацоўніцтва са сталічнымі паліклінікамі добраахвотнікі Саюза моладзі даставілі пажылым людзям 2 712 рэцэптаў. Пры гэтым 1560 з іх перадалі валанцёры Заводской раённай арганізацыі БРСМ.
Толькі сёння ў Заводскім раёне валанцёры апусцілі ў паштовыя скрыні бабулям і дзядулям 350 рэцэптаў. Добраахвотніцкі дэсант тут складаецца выключна са студэнтаў — актывістаў Саюза моладзі Беларускага дзяржаўнага эканамічнага ўніверсітэта, Беларускай дзяржаўнай акадэміі авіяцыі, Мінскага інавацыйнага ўніверсітэта, Мінскага філіяла Беларускага гандлёва-эканамічнага ўніверсітэта спажывецкай кааперацыі і Расійскага дзяржаўнага сацыяльнага ўніверсітэта. Літаральна два дні таму гэтую валанцёрскую каманду папоўнілі курсанты Акадэміі МУС.
Усе валанцёры экіпіраваныя сродкамі абароны. Для дастаўкі рэцэптаў яны выкарыстоўваюць канверты і бескантактавы спосаб іх перадачы.
Акрамя таго, па ўсёй краіне працягваюць працаваць маладзёжныя гарачыя лініі. Валанцёры БРСМ аказваюць тэрытарыяльным цэнтрам сацыяльнага абслугоўвання насельніцтва неабходную дапамогу ў дастаўцы пажылым людзям прадуктаў першай неабходнасці і медыкаментаў, персанальна абтэлефаноўваюць пенсіянераў.
Маладзёжныя гарачыя лініі працуюць штодня з панядзелка па суботу ўключна з 9.00 да 18.00. Тэлефоны абласных гарачых ліній: у Брэсце — 8 (0162) 2-11-591, Віцебску — 8 (0212) 6-62-087, Гомелі — 8 (0232) 5-63-315, Гродна — 8 (0152) 7- 19-833, Магілёве — 8 (0222) 7-66-782, Мінску — 8 (017) 284-85-54.
Сяргей РАСОЛЬКА
Інтэрв'ю з алімпійскім чэмпіёнам па фехтаванні.
Прафесійна, аператыўна, па-добраму.