Якiя новаўвядзеннi чакаюць урачоў i пацыентаў

Лекi за кошт бюджэту на дзённым стацыянары, пашыраны пералiк медыцынскiх устаноў, дзе можна прайсцi медагляд, экспертыза якасцi аказання медыцынскай дапамогi, акрэдытацыя медыцынскiх устаноў — гэтыя i iншыя змены з'явяцца ў Законе «Аб ахове здароўя», якi ўступiць у дзеянне ў 2021 годзе. Пра новаўвядзеннi расказала намеснiк старшынi Пастаяннай камiсii Палаты прадстаўнiкоў па ахове здароўя, фiзiчнай культуры, сямейнай i маладзёжнай палiтыцы Валянцiна Курсевiч.

Экспертыза якасцi медыцынскай дапамогi будзе прымяняцца ў выпадках усiх лятальных зыходаў, бальнiчнай iнфекцыi i ўскладненняў, паўторнай шпiталiзацыi на працягу года з нагоды аднаго i таго ж захворвання, выпадках, якiя суправаджаюцца скаргамi на якасць аказання медыцынскай дапамогi.

— Раней такая экспертыза таксама была, але яе праводзiла лячэбна-кантрольная камiсiя той установы, дзе здарылася падобная сiтуацыя. Цяпер гэта будзе ажыццяўляць зусiм iншая дзяржаўная ўстанова — абласная медыка-рэабiлiтацыйная экспертная камiсiя, якая дасць ацэнку якасцi аказання медыцынскай дапамогi, — растлумачыла Валянцiна Курсевiч. — Напрыклад, адбыўся лятальны выпадак у аддзяленнi кардыялогii. Будзе разглядацца не толькi работа гэтага аддзялення — дадуць ацэнку дзейнасцi ўсёй лячэбнай установы. Напрыклад, спазнiлiся ў аказаннi дапамогi пацыенту з iнфарктам, бо своечасова не ўзялi яго на каранаграфiю. У чым праблема? Не працаваў ангiёграф. Чаму? Не было спецыялiста цi апарат зламаўся i своечасова не даставiлi запасную частку? З усiм гэтым будзе разбiрацца экспертная камiсiя.

Бясплатнымi стануць лекi ў аддзяленнях дзённага знаходжання, так званых дзённых стацыянарах.

— Для насельнiцтва гэта самы адчувальны момант, бо яны змогуць атрымаць бюджэтную дапамогу. Калi раней пацыент iшоў да ўрача, якi выпiсваў яму рэцэпт, а затым набываў лекi ў аптэцы за свае сродкi, то цяпер усе прэпараты ён атрымае ў дзённым стацыянары бясплатна. Такiм чынам, зменшыцца колькасць шпiталiзацый, а сродкi будуць пераразмеркаваны са стацыянарнай на амбулаторна-палiклiнiчную дапамогу, — падкрэслiла парламентарый. — Гэта актуальна для працаздольных грамадзян з iшэмiчнай хваробай сэрца, артэрыяльнай гiпертэнзiяй, хранiчнай абструктыўнай хваробай лёгкiх. Яны змогуць праходзiць лячэнне ў аддзяленнi дзённага стацыянара, дзе iм падбяруць лекавыя сродкi. Напрыклад, на рабоце ў чалавека здарыўся гiпертанiчны крыз. Пацыента прывозяць у стацыянар, дзе яму аказваюць дапамогу, а далей у аддзяленнi дзённага знаходжання ўрач падбярэ прэпараты для нармалiзацыi артэрыяльнага цiску.

У абноўленым законе з'явiцца i такое паняцце, як абгрунтаваная прафесiйная рызыка.

— Калi медыцынская дапамога аказана ў поўнай адпаведнасцi з клiнiчным пратаколам, урач выканаў усё, што неабходна, але вынiк не быў дасягнуты, — гэта абгрунтаваная прафесiйная рызыка, — растлумачыла Валянцiна Курсевiч.

Новы законапраект прадугледжвае i пашырэнне пералiку медыцынскiх устаноў, дзе можна будзе прайсцi медагляд. У прыватнасцi, з'явiцца такая магчымасць у медсанчасцях буйных прадпрыемстваў, такiх як Мiнскi трактарны завод, Мiнскi завод халадзiльнiкаў «Атлант», БелАЗ. Таксама любое прадпрыемства зможа заключыць дагавор на праходжанне медагляду сваiмi супрацоўнiкамi ў прыватных медыцынскiх цэнтрах.

Уводзiцца i працэдура акрэдытацыi. Усе дзяржаўныя медыцынскiя ўстановы павiнны яе прайсцi да 1 студзеня 2023 года.

— У шэрагу ўстаноў iснуюць метады аказання дапамогi, якiя адстаюць ад сучаснага ўзроўню, выконваюцца ў малых аб'ёмах, але патрабуюць вялiкiх сродкаў. У будучым такая дапамога будзе сканцэнтравана на базе мiжраённых цэнтраў. Прывяду прыклад Мiнскай вобласцi: мiжраённыя цэнтры ствараюцца ў Бараўлянах, Салiгорску, Маладзечне i Барысаве. Усе раёны будуць размеркаваны па гэтых цэнтрах, каб пацыент, скажам, з вострым iнфарктам мiякарда быў дастаўлены туды ў кароткi прамежак часу, яму была зроблена каранаграфiя i аказана далейшая дапамога на высокiм узроўнi, — адзначыла Валянцiна Курсевiч. — Нiякiя аддзяленнi медустаноў, якiя не адпавядаюць сучасным патрабаванням, закрыты не будуць. Яны будуць перапрафiляваны пад аказанне пэўных вiдаў запатрабаванай дапамогi — тэрапеўтычнай, кардыялагiчнай i iншых.

Алена КРАВЕЦ