Вы тут

На ўроках матэматыкі асіповіцкай настаўніцы вучні вандруюць па ўсёй краіне і падлічваюць эканамічны эфект ад сваіх падарожжаў


Хоць матэматыка ніколі не была маім любімым прадметам, па-добраму зайздрошчу вучням асіповіцкай школы № 3. Нават кабінет у іх не такі, як ва ўсіх: замест плакатаў з сухімі матэматычнымі формуламі — шмат рознакаляровай інфаграфікі з беларускімі краявідамі і нават рэцэптамі, спецыяльна адведзены куточак для жартаўлівых напамінаў пра тыповыя памылкі вучняў, на паўсцяны расцягнуўся загадкавы ланцужок з «матэматычна» аформленымі сэрцайкамі, і паўсюль, дзе толькі ёсць вольнае месца, картачкі для адукацыйных квэстаў. Тут яны праводзяцца рэгулярна. Усё, што знаходзіцца ў матэматычным кабінеце, — гэта вынік творчых пошукаў і знаходак Ганны Лісіцкай. Яна ў захапленні ад свайго прадмета і робіць усё, каб на ўроку не было сумна.


Без творчасці ў рабоце не магу

Калі не лічыць двух гадоў у дэкрэтным адпачынку, працоўнага стажу ў Ганны Лісіцкай не болей за тры гады. Але гэта не перашкаджае ёй рэгулярна атрымліваць падзякі і дыпломы за прафесіяналізм і паспяховую падрыхтоўку дзяцей. У першы год сваёй работы яна атрымала перамогу ў раённым конкурсе настаўнікаў «Урок, якім я ганаруся». У дэкрэце брала ўдзел у рэспубліканскім конкурсе з міжнародным ухілам і атрымала дыплом за першае месца. Летась выйшла на другое месца ў абласным конкурсе «Таленты ХХІ стагоддзя», сёлета заняла другое месца на конкурсах «Патрыёт.bу» і «ТэхнаІнтэлект» з выхадам на рэспубліку. А яшчэ ў настаўніцы і яе вучняў шмат дыпломаў за перамогі ў міжнароднай анлайн-алімпіядзе «Фоксфард».

— Я вельмі люблю тое, што ніхто не робіць, — усміхаецца маладая жанчына. — З задавальненнем удзельнічаю ў конкурсах, бо яны стымулююць вывучаць нешта новае. А мне хочацца пастаянна развівацца. Калі няма творчай работы, я сумую. У мяне шмат матэматычных гульняў, нашмат цікавейшых за тыя, якія можна знайсці ў мабільніку. Мы спаборнічаем паміж сабой, паміж класамі. Дзеці нават пасля ўрокаў застаюцца, каб дарашыць тую ці іншую задачку і перамагчы саперніка.

Задачкі для патрыётаў

У дэкрэтным водпуску Ганна Лісіцкая дарэмна час не губляла. Даведалася, што Акадэмія паслядыпломнай адукацыі праводзіць конкурс «Сучасны ўрок матэматыкі», і вырашыла зрабіць нешта арыгінальнае.

— Згадала, што некалькі гадоў таму ў краіне быў абвешчаны конкурс на вылучэнне сямі цудаў Беларусі. Яны былі выбраныя яшчэ ў 2011-м, але ніякай падрабязнай інфармацыі на гэтую тэму ў інтэрнэце няма. І я выправіла гэты прабел. Даведалася, што сем абвешчаных цудаў — гэта Белавежская пушча, Бабруйская крэпасць, Сафійскі сабор у Полацку, Брэсцкая крэпасць, касцёл у стылі барока ў Будславе, Мірскі замак і возера Нарач. Сабрала поўную інфармацыю па гэтых аб'ектах і вырашыла крыху разбавіць гісторыю матэматыкай. Правяла анкетаванне, каб даведацца, на чым і як падарожнічаюць дзеці, што бяруць з сабой, якой ежы аддаюць перавагу ў падарожжах, якія сувеніры прывозяць, і ўсе гэтыя звесткі ўвяла ў разлікі. Усе цэны, якімі мы карыстаемся, рэальныя: вучні ідуць у краму, на пошту, на аўтавакзал, каб даведацца, што колькі каштуе — так цікавей працаваць. У нас ёсць варыянт для падарожжаў на прыватным аўто, аўтобусе — падстаўляеш лічбы ў формулу і падлічваеш. Па такім жа прынцыпе высвятляеш, колькі будуць каштаваць ежа, сувеніры, якія выдаткі давядзецца несці, каб паслаць па пошце сувенір сябру.

З гэтай работай настаўніца ўвайшла ў трыццатку найлепшых распрацоўшчыкаў урокаў для Беларусі. Болей чым з 400 (!) прэтэндэнтаў.

На аснове дальтан-тэхналогій

Гэта спалучэнне кабінетнага навучання з адукацыйным працэсам, заснаваным на трох прынцыпах: свабода, самастойнасць, супрацоўніцтва. З дапамогай дальтан-заданняў вучні Ганны Лісіцкай знаёмяцца з гісторыяй роднага краю, запаўняюць таблічкі і ўводзяць адказы ў карткі.

— Мы выкарыстоўваем сэрвіс інтэрактыўных рабочых сшыткаў, дзеці іх запаўняюць і адразу ж правяраюць з дапамогай QR-кодаў. Тыя, хто справіўся з заданнем, у якасці бонуса атрымліваюць магчымасць здзейсніць віртуальнае падарожжа. Я адшукала іх у інтэрнэце і прымацавала да нашых заданняў. З іх дапамогай можна зазірнуць у любы куточак славутасці. Дзеці пасля такога прагляду прыходзяць на ўрок з адчуваннем, што рэальна наведалі той ці іншы аб'ект, — кажа настаўніца.

З дапамогай гугл-картаў яна аб'яднала ўсе тыя славутасці ў агульны плакат. Кожны з цудаў азначаны на ім кропкай, побач спасылкі на карысную інфармацыю.

Сама яна магістр фізіка-матэматычных навук. Прызнаецца, што заўсёды шукае нешта цікавае і новае. Пастаянна распрацоўвае спецыяльныя гульні і задачкі. Па сямі цудах, напрыклад, — у інтэрнэце ёсць яе гульня на 2 каманды, якую можна запусціць нават з тэлефона. Усе свае наватарскія распрацоўкі Ганна Лісіцкая размяшчае на ўласным сайце, які таксама стварыла сама. Бо акрамя таго, што выкладае матэматыку, яна яшчэ і настаўніца інфарматыкі ў старэйшых класах. На сайце вучні могуць знайсці адказы на заданні, паўтарыць з дапамогай дыдактычных гульняў матэрыял. А тры гады таму яна стварыла нават электронны падручнік па тэме мностваў, збірала інфармацыю з розных крыніц. Гэту тэму толькі ўвялі ў школьную праграму, і ў падручніках амаль нічога па ёй не было. «А я ж магістр па тэме мностваў — гэта якраз было прадметам даследавання ў маёй дысертацыі», — усміхаецца яна. Цяпер падручнікі новыя, але распрацоўку можна выкарыстоўваць як дадатак.

— Наогул у мяне шмат распрацовак па ўсіх тэмах, — кажа Ганна. — Праходзім дробы, я складаю задачкі на дробы, працэнты — вылічваем працэнты. Вучань атрымлівае заданне, інструкцыю і выконвае сваю работу. Падобных распрацовак я больш нідзе не бачыла, таму на ўроках выкарыстоўваю выключна свае. Усе яны зроблены на аснове матэрыялаў, рэкамендаваных для самастойнай работы, і разлічаны на дзяцей рознага ўзроўню падрыхтоўкі.

Абавязкова напішыце пра нашу настаўніцу, раяць сямікласнікі, яна ў нас вельмі класная. Не стрымліваюся, каб не спытацца, а за што ж яе тут так любяць. «Яна прыдумвае для нас цікавыя заданні. А на святы за правільны адказ можна атрымаць нават цукерку», — усміхаецца Раман Старкоў. «А мне матэматыка падабаецца за інтэрактыўныя заданні і гульні. Вельмі люблю матэматыку», — дадае Насця Бандаравец. «Ганна Аляксандраўна вучыць нас думаць і разважаць, дае цікавыя заданні на сучасныя тэмы і праводзіць квэсты», — адзначае Ульяна Грапава.

Справы сямейныя

У школе працуе таксама муж Ганны Лісіцкай Марк Аляксандравіч і маці Алена Леанідаўна Янюк. Сужэнец таксама выкладае матэматыку і інфарматыку, а вось маці — настаўніца англійскай мовы. Нядзіўна, што дачка зрабіла для профільнага класа заданні на англійскай мове. Кабінеты дачкі і маці амаль побач, і гэта вельмі добры шанц даведацца, адкуль бяруцца таленавітыя вучні.

Алена Леанідаўна прызнаецца, што спачатку яна вучыла дачку працаваць, але цяпер вучыцца ў яе. Разам яны зрабілі мабільную праграму па англійскай мове з інтэрактыўнымі заданнямі на адпрацоўку лексікі.

— У падручніках не хапае інфармацыі, і яе трэба пастаянна шукаць у інтэрнэце, — кажа настаўніца. — Вось знайшлі інфармацыю пра «Беларусьфільм», дзецям было вельмі цікава. Для нас важна, каб у дзяцей было жаданне вучыцца, а не сядзець у мабільніку. Вунь бачыце, колькі ў нас картак на розныя тэмы. Усё аўтарскае. Мы з дачкой нават карцінкі вышываем па тэме. І шмат працуем у рэжыме анлайн. Дачка дапамагла распрацаваць сайт і мне. У кожнага з дзяцей там ёсць асабісты кабінет, дзе можна прасачыць свае вынікі або проста напісаць эсэмэску. У нас жа школа з інавацыйным падыходам.

Нэлі ЗІГУЛЯ

Фота аўтара

Загаловак у газеце: Сем цудаў Беларусі ад Ганны Лісіцкай

Выбар рэдакцыі

Грамадства

Нацыянальная акадэмія навук ініцыюе стварэнне народнага летапісу Вялікай Айчыннай вайны

Нацыянальная акадэмія навук ініцыюе стварэнне народнага летапісу Вялікай Айчыннай вайны

Навукоўцы звяртаюцца да кіраўніцтва абласных і раённых выканаўчых камітэтаў, устаноў адукацыі і культуры, грамадскіх арганізацый, усіх зацікаўленых грамадзян з просьбай разгарнуць работу па зборы ўспамінаў і фатаграфій удзельнікаў падзей Вялікай Айчыннай вайны.

Грамадства

Зіновій Прыгодзіч. Успаміны пра архітэктара Леаніда Левіна. Пайшоў, каб застацца...

Зіновій Прыгодзіч. Успаміны пра архітэктара Леаніда Левіна. Пайшоў, каб застацца...

З Леанiдам Левiным, славутым нашым архiтэктарам, мяне пазнаёмiў Генадзь Бураўкiн — яго даўнi, харошы сябра.

Грамадства

«Дзякуй участковаму — ён нас добра беражэ». Як міліцыя праводзіць прафілактычны рэйд падчас сітуацыі з каранавірусам

«Дзякуй участковаму — ён нас добра беражэ». Як міліцыя праводзіць прафілактычны рэйд падчас сітуацыі з каранавірусам

«Без мiлiцыi мы нiяк», — рэзюмаваў Прэзiдэнт Беларусi Аляксандр Лукашэнка падчас сустрэчы з мiнiстрам унутраных спраў Юрыем Караевым, маючы на ўвазе сiтуацыю з каранавiрусам. 

Грамадства

Чым сябе заняць на самаiзаляцыi?

Чым сябе заняць на самаiзаляцыi?

Урачы па ўсiм свеце запусцiлi флэшмоб #StayAtHome.