21 верасня, панядзелак

Вы тут

Новы камп'ютарны тамограф з'явіўся ў Гомельскім абласным клінічным анкалагічным дыспансеры


У Гомельскім абласным клінічным анкалагічным дыспансеры з'явіўся новы камп'ютарны тамограф для максімальна дакладнай дыягностыкі ракавых пухлін. Абсталяванне, якое было закуплена яшчэ ў 2009 годзе, адпрацавала свой рэсурс: стары тамограф часта ламаўся. Рамантавалі, пацыентаў перанакіроўвалі ў іншыя медустановы. З 2018-га — тут КТ увогуле не рабілі. Летась падчас «Вялікай размовы» з Прэзідэнтам Беларусі аб рашэнні балючага пытання папрасілі жыхары рэгіёна — сваякі пацыентаў анкадыспансера. Станоўчы вынік не заставіў сябе чакаць. Гэта агульная перамога медыкаў і пацыентаў.


Пацярпелая ад аварыі на Чарнобыльскай АЭС Гомельская вобласць традыцыйна лідзіруе ў сумным рэйтынгу росту анкалагічных захворванняў. Прычыны розныя, адзначаюць гомельскія медыкі. Рост паталогіі ў нейкай ступені звязаны і з павелічэннем працягласці жыцця, праблемамі з дыягностыкай і дрэннай прафілактыкай захворванняў. Аднак фактам застаецца тое, што летась у вобласці выявілі каля 8000 новых выпадкаў. Кожны 28-ы жыхар праходзіў лячэнне або працягвае лячыцца ад раку.

Камп'ютарная тамаграфія дазваляе медыкам паставіць дакладны дыягназ без якіх-небудзь умяшанняў у арганізм. Дыягностыка дае магчымасць урачу-рэнтгенолагу вызначыць, дзе знаходзіцца пухліна, якіх яна памераў, што адбываецца з сумежнымі органамі і ўвогуле наколькі распаўсюдзіліся ракавыя клеткі ў арганізме чалавека. Усе гэтыя даныя неабходны, каб у далейшым максімальна дакладна паставіць дыягназ, значна скараціць тэрмін абследавання і выпрацаваць эфектыўную тактыку лячэння пацыента. Акрамя таго, дэталёвая візуалізацыя дапамагае хірургам-анколагам лепш планаваць будучыя аперацыі.

Па словах загадчыка рэнтгенаўскага аддзялення анкадыспансера Міхаіла ГАПЕЕНКІ, за апошнія сем гадоў колькасць даследаванняў, якія праводзяцца ва ўстанове, вырасла ўдвая.

— Гэта камп'ютарны тамограф апошняга пакалення, які імгненна робіць 80 зрэзаў, што дазваляе цалкам абследаваць чалавека за 20 секундаў, — адзначае суразмоўнік. — Прынцып дзеяння гэтага апарата не адрозніваецца ад папярэдняга. Аднак у плане радыяцыйнай бяспекі новае абсталяванне больш ашчаднае: тамограф працуе ў чатыры разы хутчэй. На даследаванне грудной клеткі, напрыклад, хопіць трох секундаў.

Робіцца серыя рэнтгенаўскіх здымкаў пад рознымі вугламі, пасля чаго мадэлюецца трохмерны малюнак органа з магчымасцю разгледзець яго структуру на «зрэзе». Новы тамограф дазваляе ўбачыць тканіны органа ў вельмі тонкім зрэзе — 0,5 мм. А значыць, тлумачаць спецыялісты, паталагічныя змены ў арганізме можна выявіць на больш раннім этапе і пазбегнуць згубных наступстваў.

Кошт новага тамографа — 856 тысяч рублёў. Ён набыты на сродкі рэспубліканскага бюджэту. Праектна-мантажныя работы па будаўніцтве новага кабінета камп'ютарнай тамаграфіі абышліся ў больш чым 524 тысячы рублёў. Сродкі выдаткаваў абласны бюджэт.

Дарэчы, стары камп'ютарны тамограф плануюць адрамантаваць і таксама далучыць да абслугоўвання пацыентаў. Так, напрыклад, апарат дазваляе з камфортам абследаваць пацыентаў вялікай камплекцыі (да 210 кг) або тых, хто баіцца замкнёнай прасторы. Выкарыстанне двух тамографаў дазволіць у разы павялічыць колькасць даследаванняў.

Сёння Гомельскі абласны анкадыспансер — адна з вядучых клінічных устаноў Гомельскай вобласці. Летась мясцовыя анколагі правялі абследаванне 11 700 чалавек. З новым камп'ютарным тамографам штогод тут змогуць праводзіць да 30 тысяч дыягностык.

Наталля КАПРЫЛЕНКА, фота аўтара

Выбар рэдакцыі

Культура

У выдавецтве «Мастацкая лiтаратура» выйшла кнiга Аляксандра Радзькова «Мой фiзмат»

У выдавецтве «Мастацкая лiтаратура» выйшла кнiга Аляксандра Радзькова «Мой фiзмат»

Пра калег — настаўнiкаў, старэйшых таварышаў, паплечнiкаў распавядае доктар педагагiчных навук, прафесар матэматыкi, заслужаны дзеяч навукi Рэспублiкi Беларусь.

Грамадства

Тураўскі крыж упершыню будзе прадстаўлены 26 верасня

Тураўскі крыж упершыню будзе прадстаўлены 26 верасня

На свята Узнясення Крыжа Гасподняга, падчас вячэрняй службы ў Мінскім кафедральным саборы.

Грамадства

Як і чым жыве колішняя «памідорная сталіца» Беларусі?

Як і чым жыве колішняя «памідорная сталіца» Беларусі?

Каб адчуць, чым organіc food адрозніваецца ад звыклых для сучаснага гараджаніна прадуктаў, дастаткова пакаштаваць памідоры ў Савічах і параўнаць іх з таматамі з гіпермаркета.

Грамадства

Генеральны дырэктар РУП «Белпошта» Святлана Юркевіч: Мы будзем развіваць перш за ўсё паштаматы

Генеральны дырэктар РУП «Белпошта» Святлана Юркевіч: Мы будзем развіваць перш за ўсё паштаматы

На працягу многіх дзесяцігоддзяў пошта асацыіравалася з традыцыйным наборам паслуг — лістамі, пасылкамі, газетамі, пенсіямі... Але сучасныя тэхналогіі ўсё больш уваходзяць у наш побыт.