Вы тут

Атамную станцыю ў Астраўцы інтэгруюць у энергасістэму краіны


Першым праектам з мерапрыемстваў па інтэграцыі Беларускай АЭС у энергасістэму стала будаўніцтва ў новай кацельнай Касцюковічаў электракатла магутнасцю 10 МВт. Сёлета неабходна рэалізаваць такія праекты на 19 аб'ектах агульнай магутнасцю 836 МВт. Да 2021 года плануюць скончыць праекты па будаўніцтве пікава-рэзервовых крыніц, якія ўсталююць на чатырох аб'ектах агульнай магутнасцю 800 МВт.


Мадэрнізацыя і экспарт электраэнергіі

У краіне захавалася станоўчая дынаміка па павелічэнні спажывання электраэнергіі. Пры гэтым яе выпрацоўка павялічылася на 5 %, што стала магчыма дзякуючы значнаму (больш як удвая) павелічэнню яе экспарту — летась ён дасягнуў 2,4 млрд кВт/г. Гэта, пэўна, самы высокі паказчык за 20 гадоў. А вось аб'ём спажывання насельніцтвам і рэальным сектарам эканомікі газа знізіўся. Гэта перш за ўсё звязана з цёплым надвор'ем, а таксама больш эфектыўным рацыянальным выкарыстаннем газу ў прамысловасці і побыце, расказаў міністр энергетыкі Віктар КАРАНКЕВІЧ:

— Вялікая ўвага ўдзяляецца Міністэрствам энергетыкі развіццю і мадэрнізацыі электрасеткавай інфраструктуры, цеплавых і газавых сетак. Летась рэканструявана і збудавана каля 1800 кіламетраў электрасетак, мадэрнізавана больш за 230 кіламетраў цепласетак, створана звыш 1400 кіламетраў газаправодаў. Газ прыйшоў у 25 тысяч новых кватэр, каля 8,5 тысячы абанентаў пераведзены са звадкаванага газу на прыродны.

Вялікія надзеі ўскладаюць энергетыкі і на электрычнасць ад атамнай энергіі, мяркуючы, што гэта дазволіць знізіць затраты на выраб цяпла і паўплывае таксама і на тарыфы на яго для жыхароў. Пакуль жа тэхналагічна рыхтуюцца да работы з электрычнасцю.

— Мы выводзім з эксплуатацыі нізкаэфектыўнае абсталяванне, якое традыцыйна працавала на газе, дэманціруем і на яго месцы ўсталёўваем электракатлы, якія будуць вырабляць цеплаэнергію за кошт спажывання электраэнергіі, якая будзе стварацца на атамнай электрастанцыі, — падзяліўся Аляксандр БУЗО, дырэктар філіяла «Мінскія цеплавыя сеткі» Мінскэнерга.

Першыя кілаватгадзіны

Сёлетні год выніковы ў пяцігодцы. На яго запланаваны фізічны і энергетычны пуск першага энергаблока Беларускай АЭС і выдача першых кілаватгадзін у энергасістэму краіны, далейшая мадэрнізацыя і развіццё генерыруючых крыніц, развіццё электрасеткавай інфраструктуры, вывад з эксплуатацыі адпрацаваных аб'ектаў генерацыі, павелічэнне выкарыстання мясцовых і аднаўляльных крыніц энергіі.

— На Беларускай АЭС практычна завершаны ўсе будаўніча-мантажныя работы, вядзецца аздабленне, праходзіць «гарачая» абкатка абсталявання, — падзяліўся міністр. — Гэта дазволіць забяспечыць работу блока ўжо ў намінальных параметрах. Толькі замест ядзернага паліва работа вядзецца на імітатарах. Неабходна пабачыць і прааналізаваць работу ўсяго першага энергаблоку, ці ўсе параметры работы абсталявання дасягаюцца ў тэхналагічным ланцужку.

У тэму

Па 19 напрамках

Учора ў Беларусь з двухтыднёвым візітам (з 24 лютага па 4 сакавіка) прыбыла МАГАТЭ з ужо трэцяй місіяй ІНІР. Эксперты ацэняць, наколькі створаная на Беларускай АЭС інфраструктура ядзернай энергетыкі гатова да запуску. Згодна з дакументам Mіlеstоnеs («Вехі») для краін-навічкоў, вызначаецца 19 напрамкаў, якія павінны быць рэалізаваны па стварэнні інфраструктуры ў краіне.

— Беларусь напоўніцу карыстаецца ўсімі інструментамі, якія МАГАТЭ дае краінам, прыступіўшым да развіцця ядзернай энергетыкі. На працягу многіх гадоў мы шчыльна супрацоўнічаем у межах праграм тэхнічнага супрацоўніцтва, — заўважыў міністр энергетыкі Віктар КАРАНКЕВІЧ. — Для нас будаўніцтва АЭС з'яўляецца адным з самых важных праектаў адносна дыверсіфікацыі паліўна-энергетычных рэсурсаў і вытрымлівання прынцыпаў экалогіі. Рэалізацыя праекта дазволіць атрымаць «зялёную» энергію і зменшыць ужыванне імпартнага прыроднага газу.

Прадстаўнікі місіі МАГАТЭ ацэняць падрыхтоўку кадраў, кіраванне аварыямі, гатоўнасць да іх і рэагаванне на здарэнні, абарачэнне з радыеактыўнымі адходамі і адпрацаваным ядзерным палівам, радыяцыйную бяспеку і іншыя напрамкі дзейнасці атамнай станцыі ў Астраўцы.

— Усе ведамствы краіны, якія маюць дачыненне да ядзернай энергетычнай праграмы, правялі комплексную самаацэнку зробленага. Гэтыя дакументы былі накіраваны ў МАГАТЭ, — расказаў намеснік міністра энергетыкі Міхаіл МІХАДЗЮК. — Мы чакаем аб'ектыўнай ацэнкі, рэкамендацый, падказак. Каб можна было нешта дапрацаваць, калі ёсць недагляд. Аднак асноўная мэта — не паглядзець саму станцыю, а праверыць у цэлым, як краіна спрацавала па ўсіх 19 напрамках.

Мінулыя місіі МАГАТЭ ў Беларусі давалі атамшчыкам рэкамендацыі і адзначалі добрыя практыкі, якія могуць выкарыстоўвацца як парады для іншых краін-навічкоў.

Ірына СІДАРОК

Фота аўтара

Загаловак у газеце: Менш газу, больш электрычнасці

Выбар рэдакцыі

Культура

Франтавiк Мiхаiл Чэпiк эксперыментаваў з аэражывапiсам

Франтавiк Мiхаiл Чэпiк эксперыментаваў з аэражывапiсам

Як хлапчук з беларускай глыбiнкi здолеў паступiць у Маскоўскае мастацкае вучылiшча iмя Калiнiна?

Грамадства

Заразіцца прафесіяналізмам. Чаму трапіць на неканферэнцыю настаўнікаў EdCamp лічыцца вялікай удачай?

Заразіцца прафесіяналізмам. Чаму трапіць на неканферэнцыю настаўнікаў EdCamp лічыцца вялікай удачай?

Чацвёртая педагагічная неканферэнцыя прайшла ў мінулыя выхадныя з нязменным аншлагам і сабрала больш як тры сотні педагогаў з розных куткоў нашай краіны.

Спорт

Марына Літвінчук: Нашы дзеці будуць лепшыя, чым мы

Марына Літвінчук: Нашы дзеці будуць лепшыя, чым мы

Да старту Алімпійскіх гульняў у Токіа засталося менш за год. Увага да галоўных стартаў ужо пяцігодкі будзе каласальная.