Аляксандр Лукашэнка 19-20 лютага наведае з афіцыйным візітам Егіпет

Прэзідэнт Беларусі Аляксандр Лукашэнка 19-20 лютага зробіць афіцыйны візіт у Егіпет.

У Каіры Аляксандр Лукашэнка правядзе перагаворы з Прэзідэнтам Егіпта Абдэль Фатахам аль-Сісі. Кіраўнікі дзяржаў абмяркуюць рэалізацыю бягучых дамоўленасцяў, дасягнутых падчас візіту егіпецкага лідара ў Мінск летам мінулага года, перспектывы развіцця гандлёва-эканамічных і гуманітарных адносін. Прэзідэнты разгледзяць пытанні ўзаемадзеяння на міжнародных пляцоўках, забеспячэння бяспекі ў рэгіёне і свеце ў цэлым. Па выніках перагавораў чакаецца падпісанне пакета двухбаковых дакументаў, паведамляе прэс-служба кіраўніка дзяржавы.

У Аляксандра Лукашэнкі таксама запланаваны шэраг сустрэч і наведванне сумесна з Абдэль Фатахам аль-Сісі Новай адміністрацыйнай сталіцы Егіпта, якая будуецца ў 45 кіламетрах на ўсход ад Каіра.

Паралельна візіту кіраўніка дзяржавы ў Каіры пройдзе пасяджэнне Беларуска-Егіпецкага савета дзелавога супрацоўніцтва.

Гэта трэці афіцыйны візіт Прэзідэнта Беларусі ў Егіпет. Першыя два адбыліся ў 1998 і 2017 гадах. Летась Прэзідэнт Егіпта ўпершыню наведаў з афіцыйным візітам Беларусь. Па выніках перагавораў у Мінску краіны дамовіліся выводзіць гандлёва-эканамічнае супрацоўніцтва на больш высокі, якасны і выніковы ўзровень.

«Паміж нашымі дзяржавамі няма абсалютна ніякіх праблемных пытанняў. Няма закрытых тэм для абмеркавання. Важна, што мы актыўна перайшлі да трансфармацыі дружалюбных палітычных адносін у шматпланавае і выгаднае эканамічнае супрацоўніцтва. І сёння ўжо ёсць адчувальны вынік і сур'ёзны прагрэс у гэтым накірунку», — сказаў тады Аляксандр Лукашэнка.

Беларусь і Егіпет падпісалі комплексную праграму (дарожную карту) развіцця супрацоўніцтва на 2019—2020 гады. Бакі дамовіліся пашыраць супрацоўніцтва ў такіх перспектыўных сферах, як інфармацыйна-камунікацыйныя напрамкі развіцця, аэракасмічныя і авіяцыйныя тэхналогіі, нанаматэрыялы, малекулярная генетыка, металазнаўства, фармацэўтыка, оптыка. Плануецца таксама актывізаваць узаемадзеянне ў сферы адукацыі.

Вольга Мядзведзева