Вы тут

Яшчэ адзін аздараўленчы цэнтр падрыхтаваны для кітайскіх студэнтаў


Для кітайскіх студэнтаў, якія вяртаюцца ў Мінск, рыхтуюць яшчэ адзін аздараўленчы комплекс — «Загор'е». Тыдзень таму іх пачалі размяшчаць у САК «Брыганціна» Белдзяржуніверсітэта. На сёння ў Мінск прыбылі 174 студэнты. Як паведамлялася раней, па звестках Міністэрства адукацыі, на канікулы ў Кітай паехала 920 студэнтаў, якія вучацца ў беларускіх навучальных установах. Большая іх частка (у нас атрымлівае адукацыю каля чатырох тысяч студэнтаў з КНР) у сувязі з успышкай каранавіруса ў Кітай не выязджала і не пакідала тэрыторыі Беларусі.


Як паведаміла прэс-сакратар Міністэрства аховы здароўя Юлія БАРАДУН, для забеспячэння бесперапыннага медыцынскага назірання за студэнтамі з КНР, якія працягваюць навучанне ў беларускіх універсітэтах, наладжана іх аздараўленне ў САК «Брыганціна» БДУ і Мінскім абласным цэнтры медыцынскай рэабілітацыі «Загор'е».

— Размова ідзе пра дадатковыя меры для студэнтаў, якія не былі ў кантакце з хворымі і не наведвалі эпідэмічна-неспрыяльныя раёны, а таксама для тых, да каго прымяняліся меры каранціну ў КНР. На сёння ўсе 174 студэнты, якія прыбылі, знаходзяцца пад медыцынскім назіраннем, — удакладніла Юлія Барадун.

Зараз у аздараўленчым комплексе «Загор'е» завяршаецца падрыхтоўчая работа да прыёму студэнтаў. Усе супрацоўнікі, якія будуць тут працаваць, прайшлі дадатковую падрыхтоўку. Для студэнтаў будзе арганізавана індывідуальная форма навучання. Такія ж меры эпідэмічнай бяспекі ўведзены ва ўсіх абласцях краіны, дзе вучацца студэнты з КНР.

— Беларускім грамадзянам на гэты перыяд прапануюцца паслугі двух іншых рэабілітацыйных цэнтраў — у вёсках Аксакаўшчына і Атоліна, — адзначыла Юлія Барадун.

Інфармацыю пра ўсіх асоб, якія прыбываюць з КНР, спецыялісты Міністэрства аховы здароўя атрымліваюць ад дзяржаўных пагранічнага і мытнага камітэтаў, Міністэрства транспарту і камунікацый, праводзяцца іх лабараторнае абследаванне і аператыўная дастаўка ў аздараўленчыя цэнтры. За перыяд з 28 студзеня да 14 лютага санітарна-каранцінным кантролем было ахоплена больш за 300 тысяч чалавек, якія перасеклі мяжу Беларусі.

У цяперашні час у Беларусі не зарэгістравана выпадкаў захворвання інфекцыяй, выкліканай каранавірусам СОVІD-19. Аднак з 30 студзеня ў рэжым павышанай гатоўнасці пераведзена работа ўсёй санітарна-эпідэміялагічнай службы, хуткай медыцынскай дапамогі, амбулаторна-паліклінічных і бальнічных арганізацый аховы здароўя. Яны гатовы да прыёму пацыентаў з падазрэннем на каранавірус і правядзення медыцынскага назірання за кантактнымі асобамі.

Дыягнастычная лабараторыя РНПЦ эпідэміялогіі і мікрабіялогіі, якая праводзіць даследаванні і тэсты, працуе ў кругласутачным рэжыме. Даследаваны матэрыял амаль тысячы чалавек. Ва ўсіх выпадках вынік праверкі на каранавірусную інфекцыю адмоўны.

Паводле звестак, якія прыводзіць Нацыянальная камісія па ахове здароўя Кітая, ад каранавіруснай інфекцыі ў краіне загінула 1380 чалавек. Заразіліся ёй больш за 63,8 тысячы, з якіх больш за 10 тысяч чалавек знаходзіцца ў цяжкім стане. Выздаравелі 6723 чалавекі. Агульная колькасць тых, хто захварэў ва ўсім свеце, складае 64 434 чалавекі.

У Сусветнай арганізацыі аховы здароўя не выключаюць, што, калі не спыніць эпідэмію, заразіцца можа 2/3 насельніцтва Зямлі. Пра гэта заявіў саветнік Сусветнай арганізацыі аховы здароўя вірусолаг Айра Ланджыні. Эксперт зыходзіць са звестак, што кожны заражаны вірусам перадае яго двум-тром чалавекам. У Кітаі колькасць новых выпадкаў штодзень можа складаць 50 тысяч. Замарудзіць распаўсюджванне захворвання можа толькі каранцін.

Алена КРАВЕЦ

Прэв'ю: zagorje.by

Выбар рэдакцыі

Грамадства

Нацыянальная акадэмія навук ініцыюе стварэнне народнага летапісу Вялікай Айчыннай вайны

Нацыянальная акадэмія навук ініцыюе стварэнне народнага летапісу Вялікай Айчыннай вайны

Навукоўцы звяртаюцца да кіраўніцтва абласных і раённых выканаўчых камітэтаў, устаноў адукацыі і культуры, грамадскіх арганізацый, усіх зацікаўленых грамадзян з просьбай разгарнуць работу па зборы ўспамінаў і фатаграфій удзельнікаў падзей Вялікай Айчыннай вайны.

Грамадства

Зіновій Прыгодзіч. Успаміны пра архітэктара Леаніда Левіна. Пайшоў, каб застацца...

Зіновій Прыгодзіч. Успаміны пра архітэктара Леаніда Левіна. Пайшоў, каб застацца...

З Леанiдам Левiным, славутым нашым архiтэктарам, мяне пазнаёмiў Генадзь Бураўкiн — яго даўнi, харошы сябра.

Грамадства

«Дзякуй участковаму — ён нас добра беражэ». Як міліцыя праводзіць прафілактычны рэйд падчас сітуацыі з каранавірусам

«Дзякуй участковаму — ён нас добра беражэ». Як міліцыя праводзіць прафілактычны рэйд падчас сітуацыі з каранавірусам

«Без мiлiцыi мы нiяк», — рэзюмаваў Прэзiдэнт Беларусi Аляксандр Лукашэнка падчас сустрэчы з мiнiстрам унутраных спраў Юрыем Караевым, маючы на ўвазе сiтуацыю з каранавiрусам. 

Грамадства

Чым сябе заняць на самаiзаляцыi?

Чым сябе заняць на самаiзаляцыi?

Урачы па ўсiм свеце запусцiлi флэшмоб #StayAtHome.