Вы тут

Сенатар Ігар Гедзіч: 60-70% пытанняў можна вырашыць аператыўна


Дапамагчы канкрэтнаму чалавеку — такога прынцыпу ў сваёй дзейнасці стараецца прытрымлівацца член Савета Рэспублікі ад Гродзенскай вобласці Ігар Гедзіч, які ўваходзіць у склад Пастаяннай камісіі па адукацыі, навуцы, культуры і сацыяльным развіцці.


У Воранаве на прыём да парламентарыя завітала сталая жанчына са сваёй праблемай: у Кітаі цяпер знаходзіцца пляменнік, і жанчына хвалюецца за лёс хлопца. Праблема пенсіянеркі вырашылася адразу на прыёме: дзякуючы сучасным сродкам сувязі, з маладым чалавекам звязаліся, і ён запэўніў сваячку, што хваляванні дарэмныя.

— Як паказвае практыка, 60-70 працэнтаў пытанняў можна вырашыць аператыўна, — адзначыў сенатар.

У Ашмянскім раёне на прыём да парламентарыя звярнуліся тры заяўніцы.

— Пытанні, з якімі прыйшлі жанчыны, датычыліся жыллёвай праблемы, пенсійнага і воднага заканадаўстваў, рамонту вуліцы ў цэнтры горада, — адзначыў Ігар Гедзіч. — Сумесна са службамі раённага выканаўчага камітэта, якія ведаюць сутнасць справы, мы дасканала вывучым праблемы і знойдзем варыянты, якія не супярэчаць закону і прымальныя для заяўнікаў.

Шматдзетная маладая маці Алена пражывае з дзецьмі ў сацыяльнай кватэры ў Ашмянах. На трэцяе дзіця яна аформіла сямейны капітал і хацела б скарыстацца гэтымі сродкамі для рэканструкцыі вясковай хаты ў Смаргонскім раёне. Гэта домаўладанне зарэгістравана на малодшага сына, але будынак знаходзіцца ў непрыдатным для пражывання стане. Аднак Алена не можа скарыстацца сямейным капіталам, каб адрамантаваць дом, бо не знаходзіцца на ўліку для паляпшэння жыллёвых умоў. На чаргу паставіць яе таксама нельга, бо жыллё ў яе быццам бы ёсць, хоць і сацыяльнае. Сям'я атрымала яго па прычыне таго, што старэйшая дачка з'яўляецца інвалідам дзяцінства.

Ігар Гедзіч паабяцаў даць адказ жанчыне пасля таго, як будзе прапрацаваны алгарытм рашэння агучанай тэмы. Што да прызнання вясковага дома старым, жанчыне было рэкамендавана звярнуцца ў камісію пры Смаргонскім райвыканкаме.

Жыхарка вёскі Будзёнаўка абураная высокім коштам білета на рыбную лоўлю, якая прадстаўляецца арандатарамі на вадаёмах Ашмянскага раёна. Рыбалкай у іх сям'і захапляюцца тры сыны і муж. Атрымліваецца прыстойная сума, хоць часам сваякі вяртаюцца дадому і зусім без улову. Жанчыне патлумачылі, што сёння мясцовыя органы ўлады маюць права здаваць у арэнду вадаёмы як дзяржаўным структурам, так і прыватным асобам. А арандатар мае права ўсталёўваць свой кошт на лоўлю рыбы.

Разам з тым, рэзюмаваў парламентарый, трэба вывучыць гэтае пытанне падрабязна і знайсці рацыянальны выхад. Магчыма, прадугледзець палёгкі для пэўнай катэгорыі грамадзян або сістэму зніжак у вызначаныя дні.

Жыхарку вуліцы Гальшанскай да дэпутата прывялі дзве праблемы: адна — калектыўная, другая — асабістага характару. Ад усіх жыхароў з 28-га па 40-ы дом сваёй вуліцы яна папрасіла дапамагчы добраўпарадкаваць кавалак вулічнага пакрыцця. У непрывабным стане вуліца знаходзіцца ўжо не адзін год. Жыллёва-камунальная служба раёна ведае гэтую праблему. Перыядычна ямы «зразаюцца». Аднак гэтых дзеянняў хапае не болей, чым на два тыдні, а затым усё паўтараецца.

Што да асабістага пытання, жанчына на працягу года не можа прыватызаваць дачны ўчастак. Спачатку грамадзянку не задавальняла пытанне кошту працэдуры прыватызацыі. Калі яно было ўрэгулявана, паўсталі новыя абставіны, якія перашкаджаюць афармленню неабходных дакументаў. З'явіўся прэцэдэнт з суседзямі з нагоды вызначэння межаў участкаў. Цяпер гэта пытанне знаходзіцца ў актыўнай стадыі вырашэння. Да яго далучыліся праектны інстытут «Гроднагіпразем» і землеўпарадкавальная служба Ашмянскага райвыканкама.

— Правядзенне асабістых прыёмаў грамадзян — гэта адзін з эфектыўных і дзейсных спосабаў даведацца аб праблемах, якія ёсць у рэгіёнах, пачуць іх з першых вуснаў, ад насельніцтва, — лічыць Ігар Гедзіч. — Звароты грамадзян арыентуюць нас на канкрэтныя справы. Парламентарыі ўзнімаюць агучаныя праблемы на ўзроўні профільных міністэрстваў і ведамстваў, улічваюць у сваёй дзейнасці. У заканатворчым партфелі нямала ініцыятыў, накіраваных на рашэнне паўсядзённых праблем людзей.

Кансалідацыя ў грамадстве вельмі важная — ад гэтага залежыць поспех развіцця краіны, падкрэсліў ён. Кожны з нас павінен быць скіраваны на стварэнне, а не на разбурэнне.

Па матэрыялах «Воранаўскай газеты» і «Ашмянскага весніка»

Выбар рэдакцыі

Грамадства

Валанцёры супраць каранавіруса: адзін дзень з жыцця мінскага хаба ByCovid19

Валанцёры супраць каранавіруса: адзін дзень з жыцця мінскага хаба ByCovid19

Запушчаная кампанія па дапамозе медыкам ByCovid19 перарасла ў буйны «антыкаранавірусны» рух.

Культура

Кіназнаўца Мiкалай Iзволаў: На маёй памяцi адкрыццё такога маштабу здарылася ўпершыню

Кіназнаўца Мiкалай Iзволаў: На маёй памяцi адкрыццё такога маштабу здарылася ўпершыню

Гэта была сенсацыя: у 2018 годзе быў паказаны страчаны фiльм Дзiгi Вертава.

Грамадства

Спрыяльнае навакольнае асяроддзе ствараецца там, дзе над гэтым працуюць на месцах — у гарадскіх мікрараёнах ці на вясковых падворках і вуліцах

Спрыяльнае навакольнае асяроддзе ствараецца там, дзе над гэтым працуюць на месцах — у гарадскіх мікрараёнах ці на вясковых падворках і вуліцах

Маленькі прынц у аднайменнай казцы кожны дзень пачынаў з таго, што прыводзіў у парадак сваю планету. 

Калейдаскоп

Вясёлыя гісторыі чытачоў

Вясёлыя гісторыі чытачоў

Чым бы дзіця ні цешылася, абы не плакала. Пажадана, каб нікога да слёз не даводзіла. Але ж бывае па-іншаму.