Вы тут

Калі ў Іспаніі з'явяцца беларускія электробусы?


Беларускі сцяг у Іспанскім Каралеўстве ўпершыню быў узняты ў 2015 годзе на адным з будынкаў у горадзе Алікантэ, дзе размясцілася першае ганаровае консульства нашай краіны. Мінула фактычна тры гады і толькі тады беларускае пасольства, акрэдытаванае яшчэ ў 2016 годзе, атрымала свой офіс у Мадрыдзе. А з верасня 2018 года ў самабытнай, дзівоснай Барселоне на вуліцы Rambla de Catalunya можна знайсці яшчэ адзін куточак Беларусі ў Іспаніі. Там змяшчаецца офіс другога ганаровага консульства нашай краіны. Яго ўзначальвае Крысціян Балселс. Ганаровы консул — не зусім тыповая дыпламатычная пасада. Імі становяцца грамадзяне Беларусі або замежнікі, якія займаюць значнае грамадскае становішча ў пэўнай краіне.


З ганаровым консулам Беларусі ў Барселоне, уладальнікам юрыдычнай кампаніі, спадаром Крысціянам Балселсам карэспандэнт «Звязды» пазнаёмілася ў Мінску. Крысціян уваходзіў у склад іспанскай дэлегацыі, якая на мінулым тыдні наведала беларускую сталіцу. Узначальваў яе міністр транспарту і інфраструктуры Каталоніі Ісідрэ Гавін. Праграма візіту была досыць багатая: сустрэчы ў Банку развіцця, Нацыянальным цэнтры маркетынгу, Мінскбуду, музеі гісторыі Вялікай Айчыннай вайны, «Белавіа», на «Белкамунмашы» і ва ўрадзе. Нягледзячы на такі шчыльны графік, Крысціян Балселс знайшоў час для інтэрв'ю нашаму выданню.

— Спадар Балселс, як да вас паступіла прапанова стаць ганаровым консулам?

— Па прафесіі я адвакат, маю офіс у Барселоне, які спецыялізуецца на міграцыйным праве. У сувязі з маім вопытам у мяне было шмат кліентаў-беларусаў, якім мы садзейнічалі ў атрыманні віду на жыхарства ў Іспаніі. Дзякуючы гэтым кантактам мы пазнаёміліся з Паўлам Латушкам (у той час Надзвычайным і Паўнамоцным Паслом Беларусі ў Францыі, Каралеўстве Іспаніі і Партугальскай Рэспубліцы па сумяшчальніцтве). Ад яго атрымаў прапанову стаць ганаровым консулам вашай краіны, якая стала вельмі цікавай для мяне. Да прызначэння быў у Беларусі некалькі разоў па справах бізнесу.

— Чым вас зацікавіла Беларусь?

— Я быў зацікаўлены ў пасадзе, таму што спачатку гэта было своеасаблівай прыгодай. Мне вельмі падабаецца ваша краіна, здзіўляе гасціннасць, адкрытасць. Ды і размяшчэнне на карце свету мае стратэгічнае значэнне.

— Адна з задач ганаровага консульства ў Барселоне на 2020 год — узмацненне адносін Беларусі з правінцыяй Лерыда. Чаму менавіта гэты рэгіён Каталоніі?

— Мая сям'я, продкі родам з цэнтра правінцыі — горада Лерыда. Як сапраўдны лерыданец, я вельмі добра ведаю гэты край, і заўважыў шмат агульнага паміж ім і Беларуссю. На гэтых землях Іспаніі вельмі развіта сельская гаспадарка. Там вырошчваюць фрукты і гародніну фактычна на ўсю Каталонію.

— Што Іспанія магла б імпартаваць з Беларусі?

— Напрыклад, трактары. Іх вытворчасць — гэта слабае звяно ў Іспаніі. Такой прамысловасці ў нашай краіны няма, таму нам цікава кампанія кшталту МТЗ. У «Белкамунмаша» прадукцыя высокай якасці, якая магла б ісці на экспарт у маю краіну. Хутка будуемыя дамы з драўніны — галіна таксама развітая ў Беларусі, якой няма ў Іспаніі. Інтарэс да такой будоўлі праявілі ўрад Каталоніі і Агенцтва па канкурэнтаздольнасці. Гэтыя кантакты ўяўляюць цікавасць для будаўніцтва сацыяльнага жылля. У вас існуе буйны Парк высокіх тэхналогій, ёсць цікавыя распрацоўкі ў праграмах. Я ганаровы консул усяго год, і гэта тыя кірункі, пра якія паспеў даведацца за кароткі час. Але ўпэўнены: існуе яшчэ шмат разнастайнай прадукцыі, якая можа экспартавацца ў маю краіну.

— Якія кірункі супрацоўніцтва паміж Беларуссю і Іспаніяй выйдуць на першы план у гэтым годзе?

— На дадзены момант існуе пяць вектараў, якія б мы хацелі развіваць. Першы — пошук патэнцыйных партнёраў для сумеснага прадпрыемства ў Каталоніі з кампаніяй «Белкамунмаш». Другі — арганізацыя дэлегацыі кампаній ад харчовай прамысловасці ў Беларусь у канцы зімы — пачатку вясны. Наступны праект — па прадстаўленні Каталоніі на выстаўцы «Белагра» ў чэрвені. Ёсць магчымасць на гэтым мерапрыемстве ўпершыню Каталоніі стварыць асобны рэгіянальны стэнд з удзелам прыватных кампаній, іх прадукцыі. Плануецца, што суправаджаць прадпрымальнікаў будзе міністр сельскай гаспадаркі Каталоніі. У адказ мы б хацелі арганізаваць уласны стэнд Беларусі на выставе «Сан-Мігель». Гэта мерапрыемства, аналагічнае «Белагра», якое праходзіць у Лерыдзе. Але самы галоўны кірунак, каб іспанцы больш ведалі пра Беларусь, — прасоўванне турызму.

— Як прайшлі перамовы з «Белкамунмашам»?

— У нас ёсць план дзеяння ў двух этапах, якія ідуць паралельна. Адзін з іх — гэта пошук партнёра па стварэнні сумеснага прадпрыемства ў Каталоніі. У нашай дэлегацыі ўжо прысутнічаюць патэнцыйныя партнёры, буйныя транспартныя кампаніі з Каталоніі, якія б маглі заняцца гэтым праектам. Па-другое, ідзе працэс сертыфікацыі частак беларускіх электробусаў у Іспаніі, амалагацыі ўсёй дакументацыі. У гэтым годзе плануецца прывезці электробус для першапачатковых выпрабаванняў у Каталонію на пэўны эксплуатацыйны тэрмін. Кампаніі жадаюць паглядзець на тэхніку ў справе. Я са свайго боку гатовы садзейнічаць і дапамагаць у любым пытанні, каб гэты праект меў поспех.

— Наколькі для Іспаніі актуальна тэматыка беражлівага стаўлення да прыроды?

— Тэма выкарыстання аднаўляльных крыніц, экалагічных відаў транспарту вельмі актуальная. Перад уладамі востра стаіць праблема забруджвання паветра. На жаль, стварэнне электробусаў у нас не так развіта, як у вас. Менавіта таму нашу дэлегацыю суправаджаў міністр транспарту і інфраструктуры Каталоніі. Ён хацеў на ўласныя вочы пабачыць, як гэты транспарт функцыянуе ў Мінску, наведаць вытворчасць «Белкамунмаш».

— Хто ўвойдзе ў дэлегацыю з прадстаўнікоў харчовай прамысловасці, якая ў хуткім часе прыедзе ў Мінск?

— Яна будзе складацца з прыватных кампаній Каталоніі з розных сектараў — вытворчасць вінаў, шампанскага, кандытарскіх вырабаў, аліўкавага алею. На парадку дня будуць пытанні прамых паставак прадукцыі з Каталоніі ў Беларусь, перапрацоўкі яе на вашых прадпрыемствах. Акцэнт зробяць на разліве ў Беларусі алею, вінаў з магчымасцю рэалізацыі і на трэціх рынках.

— Большасць беларусаў ведаюць курорты Каталоніі як пляжны адпачынак. Але вы рэкамендуеце рэгіён для спартыўнага турызму...

— У гэтай частцы Іспаніі вельмі развітыя гарналыжныя курорты, якія могуць прапанаваць беларускаму турысту шырокі пакет паслуг. Мы правялі перамовы з генеральным дырэктарам кампаніі «Белавіа» аб магчымасці ўзімку арганізаваць прамы авіярэйс з Мінска ў Лерыду. — Для культурнага адпачынку прапаную старажытныя невялікія гарадкі, якія знаходзяцца пад абаронай ЮНЕСКА. І, вядома ж, у правінцыі Лерыда вельмі смачная ежа, напрыклад, знакамітыя смаўжы. Нам ёсць чым здзівіць вас.

— Што іспанцы ведаюць пра Беларусь?

— Калі шчыра, ведаюць вельмі мала. Таму мая работа заключаецца ў тым, каб даць больш інфармацыі пра Беларусь іспанцам. І дэлегацыі, якія мы прыводзім сюды, дапамагаюць у гэтым. Людзі больш даведваюцца пра вас, а потым перадаюць іншым, як усё выдатна прайшло.

— Наколькі цяжка сумяшчаць адвакацкую дзейнасць і працаваць на пасадзе ганаровага консула?

— Няцяжка, гэта вельмі цікава. Трэба атрымліваць асалоду ад жыцця і выкарыстоўваць кожную магчымасць спрабаваць нешта новае. Тое, што я раблю ад сябе, упэўнены: у будучым мне гэта вернецца абавязкова нечым добрым.

Марыя ДАДАЛКА

Загаловак у газеце: Наш чалавек у Барселоне

Выбар рэдакцыі

Грамадства

Палацы, паркi, сядзiбы. На Брэстчыне вядзецца вялiкая работа па аднаўленнi гiсторыка-культурных аб'ектаў

Палацы, паркi, сядзiбы. На Брэстчыне вядзецца вялiкая работа па аднаўленнi гiсторыка-культурных аб'ектаў

Адным з першых у вобласцi пачалi рэстаўрыраваць велiчны палац Сапег у Ружанах.

Грамадства

Шопiнг з дапоўненай рэальнасцю. Тэхналогii 3D-мадэлявання адкрыюць новы фармат гандлю

Шопiнг з дапоўненай рэальнасцю. Тэхналогii 3D-мадэлявання адкрыюць новы фармат гандлю

Наша краiна займае трэцяе месца ў сваiм рэгiёне па колькасцi бескантактавых транзакцый.

Грамадства

Баявыя поспехi шмат у чым залежалi ад быту, або пра што паведамляюць партызанскiя летапiсы

Баявыя поспехi шмат у чым залежалi ад быту, або пра што паведамляюць партызанскiя летапiсы

Партыйныя i камсамольскiя арганiзацыi партызанскiх атрадаў удзялялi вялiкую ўвагу адпачынку i вольнаму часу партызан.