Вы тут

Вырошчваем імбір на дачы з кораня. Ці магчыма гэта ў нашым клімаце?


Радзіма імбіру — Індыя і Паўднёва-Усходняя Азія, дзе клімат цёплы і вільготны, а глеба лёгкая і вельмі ўрадлівая. Ці магчыма вырасціць яго ў нашым клімаце, на дачы ці ў хатніх умовах? Дасведчаныя садоўнікі лічаць, што пры выкананні некалькіх нескладаных правілаў вырошчвання, паліву і пасадкі гэта цалкам магчыма.


Перыяд вегетацыі імбіра ад васьмі да дзесяці месяцаў. Таму пачынаць падрыхтоўку да пасадкі лепш у лютым. Корань выбіраюць здаровы, свежы, буйны, гладкі, без бачных пашкоджанняў і плям. Цэлы корань вагой каля 300 грамаў пазней можна будзе падзяліць на 4-6 частак для пасадкі. Купляючы імбір у супермаркеце, варта памятаць, што такі корань праходзіў апрацоўку рэчывамі, якія спыняюць рост, і яго трэба абудзіць да росту. Паскорыць абуджэнне і пазбавіць ад гніласных інфекцый дапаможа раствор марганцоўкі або драўнянага попелу.

Раствор марганцоўкі рыхтуюць з разліку 1 чайная лыжка на 3 літры вады. Попел у ваду гатуюць з разліку 3 сталовыя лыжкі на 3 літры вады. Змешваць усё ў адным растворы непажадана, бо рэчывы ўзаемна нейтралізуюць адно аднаго. Тэмпература раствору для замочвання павінна быць не ніжэйшая за 22 °С. Корань імбіру пакідаюць у растворы на адзін-два дні.

Затым, не абціраючы, кладуць у поліэтыленавы пакет, завязваюць без паветра і пакідаюць на месяц у цёплым месцы да набухання пупышак (як у бульбы). Вельмі важна памятаць, што імбір — ураджэнец цёплых краін, пры зніжэнні тэмпературы навакольнага асяроддзя яго рост моцна запавольваецца. Халодная вада або халодная зямля прымусіць імбір зноў заснуць. Вырасці такая расліна за адно лета не паспее. Калі каля кораня добра сфарміраваліся пупышкі, яго можна падзяліць на некалькі кавалачкаў. На кожным кавалачку пупышак павінна быць не менш за дзве. Нельга рабіць маленькія кавалачкі, яны не змогуць даць парасткам неабходную колькасць пажыўных рэчываў да фарміравання каранёвай сістэмы. Расліна будзе кволая і стане павольна расці. Зрэзы пасыпаюць драўняным попелам.

Пры пасадцы імбіру важна ўлічваць, што дарослая расліна дасягае ў вышыню 1 метра, а корань яе расце ў шырыню, а не ў глыбіню. Таму перавагу варта аддаць не вельмі глыбокаму, але досыць шырокаму гаршку з адтулінамі для зліву залішняй вільгаці. Калі імбір плануецца вырошчваць толькі ў хатніх умовах, без пераезду на дачу, падбярыце адразу прасторны гаршчок: гэтая расліна не любіць перасадак. Але калі імбір вырошчваецца дзеля рэдкіх, прыгожых кветак, варта ўлічыць, што вузкі гаршчок стымулюе рост кветкавай стрэлкі, а кветкі ў такой расліны ў хатніх умовах з'явяцца толькі праз два гады. Гаршчок падбіраецца на 3-4 сантыметры шырэйшы за пасаджаны корань з пупышкамі. Расліну, якая летам будзе вырошчвацца на дачы, для пачатку можна пасадзіць у невялікую шырокую скрынку.

Глеба для імбіру патрэбна ўрадлівая, лёгкая, нармальнай кіслотнасці. Не забудзьцеся пра дрэнаж, імбір пры лішку вільгаці і без доступу кіслароду хутка захварэе і пачне гніць. Для абароны ад хваробатворных грыбкоў і гнілі, зямлю трэба перад пасадкай апрацаваць растворам марганцоўкі або фітаспарыну.

Гатовыя да пасадкі, прарослыя і падзеленыя карэньчыкі размяшчаюцца ў глебе гарызантальна, пупышкай уверх. Пасадка вядзецца так, каб імбір быў пакрыты зямлёй не больш чым на 2 сантыметры. Затым ёмістасці накрываюць плёнкай і пакідаюць на месяц-паўтара. Увесь гэты час трэба сачыць, каб зямля заставалася вільготная. Са з'яўленнем парасткаў плёнку прыбіраюць. Імбір можна выносіць на балкон, зацяняючы ад адкрытага сонечнага святла і абараняючы ад ветру.

Увосень колькасць паліву скарачаюць. Зямля павінна паспець падсохнуць. У гэты час актыўна разрастаецца корань. Калі зеляніна пачне жоўкнуць і чэзнуць, можна зразумець, што імбіру стала холадна. Частку каранёў можна выкарыстоўваць для ежы або лячэння, а частку пасадзіць у чыгун і перавезці дадому. Імбір, прызначаны для выкарыстання, абтрасаюць ад зямлі, абмываюць і добра прасушваюць на паветры. Захоўваць яго карані можна ў склепе, дзе тэмпература не апускаецца ніжэйшы за +4 °С. Ва ўмовах кватэры падыдзе халадзільнік. Як ежу і для лячэння можна выкарыстоўваць не толькі корань, але і лісце, і сцёблы расліны. Але гэта значна знізіць хуткасць яе росту і не дасць добра развіцца караням. Таму зялёную частку выкарыстоўваюць толькі з некалькіх раслін, не трывожачы тых, якія вырошчваюцца дзеля кораня.

Ірына ТАМКОВІЧ

Выбар рэдакцыі

Грамадства

На Гомельшчыне актыўна развіваюць валанцёрскі рух

На Гомельшчыне актыўна развіваюць валанцёрскі рух

Форма сацыяльнай актыўнасці падлеткаў.

Культура

Чым сёлета будзе здзіўляць наведвальнікаў «Славянскі базар у Віцебску»?

Чым сёлета будзе здзіўляць наведвальнікаў «Славянскі базар у Віцебску»?

Канцэрт для дзяцей і моладзі, пластычны спектакль Ягора Дружыніна і «Рок-панарама».