Вы тут

Раім схадзіць


Выстава «Невядомы Ван Гог», Ноч Гары Потэра, лекцыя «Разборкі з кліматам. Будзе горача?», сацыяльны фотапраект «Смак жыцця!», Выстава «Віленскія гарызонты» і іншае - афіша «Звязды» з 3 па 10 лютага.


Выстава «Невядомы Ван Гог»

Дзе: Арцель Галерэя кафэ, г. Мінск, пр-т Незалежнасці, 58/1, офіс 6

Калі: З 1 лютага па 30 сакавіка, пн-ндзл 10:00-20:00

Колькі каштуе: 10 BYN — дарослым, 8 BYN — студэнтам, 5 BYN — пенсіянерам, школьнікам, дзецям (ад 7 гадоў)

Выстава паспяхова экспанавалася ў Маскве і Санкт-Пецярбургу і атрымала высокія водгукі наведвальнікаў і крытыкаў. 

За сваё жыццё Ван Гог напісаў больш за 2000 твораў — 930 карцін і 1100 малюнкаў і эскізаў. Пры жыцці мастака працы шанаваліся мала, а сёння ўзначальваюць спісы самых дарагіх шэдэўраў жывапісу. Шырокай публіцы знаёмыя толькі самыя знакамітыя: «Касачы», «Сланечнікі» і, вядома ж, «Зорная ноч».

«На выставе прадстаўлены як знакамітыя сюжэты майстра, так і мала вядомыя, але не менш вялікія карціны. Па іх можна прасачыць увесь творчы шлях Ван Гога як мастака», — каментуе арганізатар выставы Аляксандр Смірноў.

Работы суправаджаюцца апісаннем сюжэтаў і гісторыяй стварэння кожнай карціны. Для зручнасці наведвальнікі выставы змогуць скарыстацца аўдыягідам пры дапамозе дадатка, які чытае QR-коды. Для гасцей будуць праводзіцца бясплатныя экскурсіі.

Выставачныя палотны створаны з дапамогай тэхнікі «жыкле». Сучасная тэхналогія дазваляе цалкам узнавіць несмяротныя шэдэўры на натуральным палатне, прайграць драбнюткія нюансы колеру і святлаценю, перадаць характар ​​і фактуру мазка. У адрозненне ад мастацкіх копій, што выконваюцца алеем на палатне прафесійнымі мастакамі-капіістамі, лічбавая мастацкая рэпрадукцыя — не імітацыя, а дакладнае, факсімільнае ўзнаўленне арыгінала.

Кантактны тэлефон для наведвальнікаў: + 375-29-351-65-25, + 375-17-276-09-99. Тэлефон па пытаннях СМІ: + 7-962-425-76-70


Сустрэча з фітнес-трэнерам «Найлепшы спосаб карэкцыі паставы»

foxsovet.com

Дзе: г. Мінск, вул. Караля, 9 (ст. метро Фрунзенская). Уваход з тарца, код на дамафоне — 20

Калі: 3 лютага, 19:00

Колькі каштуе: бясплатна, неабходна набыць квіток

Тэма: «Найлепшы спосаб карэкцыі паставы: дзелімся лайфхакам, які каштуе $ 400».

Спікер — Ігар Арцёмаў, інструктар-метадыст, трэнер па спорце.

Вы даведаецеся:

  • што такое постаць;
  • што азначае правільная пастава;
  • чым небяспечныя парушэнні паставы;
  • фактары якія ўплываюць на фарміраванне паставы;
  • спосабы карэкцыі паставы;
  • прычыны болю ў паясніцы і іх вырашэнне.

Ноч Гары Потэра

Дзе: Ok16, г. Мінск, вул. Кастрычніцкая, 16

Калі: 6 лютага, 15:00, 19:00

Колькі каштуе: бясплатна

6 лютага ў культурным хабе ОК16 адбудзецца свята, прысвечанае герою культавай кнігі Дж. Роўлінг.

Ноч Гары Потэра распачало праводзіць брытанскае выдавецтва Bloomsbury ў 2015 годзе. З таго часу штогод у магію чароўнага свету хлопчыка Гары акунаецца ўсё больш і больш людзей з дзясяткаў краін. Сёлета да іх ліку далучыцца і Беларусь. Нагодай для правядзення гэтага свята ўпершыню ў Мінску стала выданне беларускага перакладу кнігі «Гары Потэр і філасофскі камень».

Падчас святкавання запланаваны дзве праграмы — для дзяцей і падлеткаў з 15.00 па 18.00, для дарослых з 19.00 па 22.00.

Удзельнікаў чакаюць чароўны капялюш, гульня ў гіганцкія шахматы і квідыч, конкурсы, фотазоны, а таксама слівачнае піва. І канечне, падарункі. А самыя актыўныя наведвальнікі змогуць стаць пераможцамі Турніра трох чараўнікоў. Сярод гасцей у касцюмах разыграюць дадатковыя прызы.

Атмасферу свята будуць ствараць касплэеры з фандома «Harry Potter Беларусь».

Беларускі пераклад рамана «Гары Потэр і філасофскі камень» з’явіўся ў выдавецтве «Янушкевіч» у снежні мінулага года.


Гастрафэст «Gastrofest. Кава»

Дзе: г. Мінск

Калі: з 6 лютага

Колькі каштуе: 7 BYN на любы сэт

З 6 па 23 лютага Мінск напоўніцца насычанымі водарамі свежай выпечкі і кававых напояў. Усе ўстановы-ўдзельніцы (а гэта 20 кавярняў Мінска) падрыхтавалі свае дэгустацыйныя сэты, якія складаюцца з кавы і дэсерту, каб раскрыць наведвальнікам новыя смакавыя спалучэнні і пазмагацца за лідарства. Кошт усіх прапаноў фіксаваны — 7 рублёў. Госці фестывалю змогуць наведаць любыя з заяўленых устаноў, а пасля дэгустацыі прагаласаваць за найбольш упадабаныя на сайце gastrofest.by або аднайменным тэлеграм-канале.

Новаўвядзенне фестывалю — магчымасць аказаць падтрымку праграме ЮНІСЕФ у Беларусі «Сям'я кожнаму дзіцяці», якая дапамагае дзецям з інваліднасцю з інтэрнатаў знайсці сваю сям'ю. Любы жадаючы зможа падарыць гастра-сэт свайму сябру праз дадатак Gmoji, дзе кошт сэта адрозніваецца на 1 BYN, які і будзе адпраўлены ў падтрымку праграме.

Акрамя гэтага, падчас фестывалю ў вас будзе магчымасць адправіцца ў цёплае падарожжа на дваіх у Егіпет ад тураператара Aviabaltic.

Даведкі


Лекцыя Роба Філда «Разборкі з кліматам. Будзе горача?»

Дзе: Даблтры бай Хілтан, г. Мінск, пр-т Пераможцаў, 9

Калі: 7 лютага, 19:00

Колькі каштуе: бясплатна, рэгістрацыя абавязковая

Пад пастамі ў сацсетках пра змены клімату людзі люта спрачаюцца аб тым, змяняецца клімат у прынцыпе ці не, а калі мяняецца, то чаму: выключна з-за натуральных працэсаў або з-за дзейнасці чалавека? Хтосьці радуецца кліматычным зменам — маўляў, будзе цёпла, не будзем мёрзнуць, а хтосьці баіцца, што наступствамі будуць катаклізмы і эпідэміі.

Ахова Птушак Бацькаўшчыны вырашыла вынесці пытанне ў афлайн і запрасіла дасведчанага эксперта з Вялікабрытаніі расказаць простымі словамі аб тым, што ведаюць на гэты конт сучасныя навукоўцы.

Доктар Роб Філд — старшы навуковы супрацоўнік Каралеўскага таварыства абароны птушак, да якога далучыўся ў 2000 годзе. Ён актыўна вывучае экасістэмныя магчымасці змякчэння наступстваў кліматычных зменаў праз паляпшэнне кіравання і захаванне дзікай прыроды, галоўным чынам у сельскагаспадарчых экасістэмах і тарфяніках Вялікабрытаніі, астатняй Еўропы і Афрыкі.

У прыватнасці, доктар Філд супрацоўнічае з беларускімі калегамі па памяншэнні негатыўных наступстваў кліматычных змяненняў у рэгіёне Палесся, а таксама вывучае, як аднаўленне балот уплывае на папуляцыі птушак у Беларусі.

Лекцыя будзе праходзіць па-англійску з сінхронным перакладам на рускую мову.

Што будзе на лекцыі?

  • Як утварыўся «парніковы эфект» і што мы ведаем пра хімію атмасферы?
  • Што такое кругазварот вугляроду і як на яго ўплываюць выкапні паліва (нафту, вугаль, газ)?
  • Як змены ў гэтым кругавароце прыводзяць да пацяплення атмасферы?
  • Як гэта ўсё ўплывае на людзей і дзікую прыроду?
  • Ці магчыма і ці варта з гэтым змагацца?

Пра ўсё гэта раскажа на адкрытай лекцыі доктар Роб Філд, а ў канцы ён адкажа на пытанні з залы.

«Я вельмі рады вярнуцца ў Беларусь, каб распавесці аб кліматычных зменах, — кажа доктар Фiлд. — Яны ўплываюць на нас усіх, аднолькава закранаюць і людзей, і дзікую прыроду. Беларусь — краіна з вялікім прыродным багаццем, а значыць, мае добрыя перадумовы для барацьбы як са зменамі клімату, так і з іншымі глабальнымі пагрозамі дзікай прыродзе. Я буду казаць не толькі пра тое, якія змены адбываюцца ў клімаце і як яны паўплываюць на нас і месцы, дзе мы жывем, але і пра тое, як праз ахову прыроды і разумнае выкарыстанне прыродных рэсурсаў мы можам змякчыць негатыўныя наступствы гэтых зменаў».


Сацыяльны фотапраект «Смак жыцця!»

Дзе: Месца, г. Мінск, вул. Рэвалюцыйная, 7А

Калі: 7 лютага, 16:00

Сацыяльна-дабрачыннае грамадскае аб'яднанне «РАЗАМ» і Вераніка Супрун прадстаўляюць фотавыстаўку пра прыгажосць чалавека, які праходзіць курс хіміятэрапіі.

У Рэспубліканскім анкагематалагічным цэнтры знаходзіцца на лячэнні парадку двухсот дзяцей, якія праходзяць найскладанейшую тэрапію. Сучасныя метады лячэння анказахворванняў цягнуць за сабой сур'ёзныя знешнія змены. Асабліва дэструктыўна змены ў знешнасці адбіваюцца на падлетках і маладых людзях.

Фотапраект стварае асабістую пазітыўную гісторыю кожнага анкахворага маладога чалавека. Фотасесія — як форма арт-тэрапіі знайсці ў сабе рэсурсы да далейшага лячэння і сацыяльнай адаптацыі.

Праект — гэта магутны інструмент ў фарміраванні здаровага інфармацыйнага поля вакол анказахворванняў. Змена стэрэатыпнага прадстаўлення ў грамадстве пра знешні выгляд і жыццё анкахворых.

Задача — паказаць, як можа выглядаць чалавек, які праходзіць курс хіміятэрапіі, у пазітыўным ключы, без жалю, знявагі, няёмкасці. Паказаць эстэтыку людзей з анка. Тое, што гэта можа быць прыгожа.

+375447602974 Маргарыта Міткевіч vmeste.by@mail.ru; www.vmestecharity.by.


Міжнародны фестываль-конкурс сучаснага харэаграфічнага мастацтва «Za гранню»

Дзе: г. Мінск, пр. Незалежнасці, 25

Калі: 7-9 лютага

Колькі каштуе: бясплатна

7–9 лютага ў Мінску на пляцоўцы Палаца прафсаюзаў пройдзе III Міжнародны фестываль-конкурс лаўрэатаў у галіне сучаснага харэаграфічнага мастацтва ZA Гранню — галоўная танцавальная падзея года.

Удзельнікі фестывалю-конкурсу ZA Гранню — гэта самыя моцныя дзіцячыя і моладзевыя харэаграфічныя калектывы з Беларусі, а таксама з краін блізкага замежжа — уладальнікі Гран-пры і лаўрэаты 1 ступені. Яны прыедуць у Мінск, каб пазмагацца за званне лепшых з лепшых у танцавальным свеце і атрымаць грашовы ГРАН-ПРЫ. 

У спецыяльнай намінацыі фестывалю-конкурсу ZA Гранню «Рух сэрцам» выступяць дзеці з парушэннем слыху. Яны, насуперак сваёй прыродзе, сталі часткай танца і на сваім прыкладзе паказалі, што мастацтва выходзіць ZA Гранню магчымага і можа быць даступна ўсім.

ZА Гранню — гэта не толькі конкурсная праграма сярод харэаграфічных калектываў, але і майстар-класы ад суддзяў фестывалю.

7 лютага

  • 17:00 — урачыстае адкрыццё фестывалю — уваход вольны;
  • 18:00 —конкурсная праграма. Тэатры танца (спектаклі) — уваход вольны.

8 лютага

  • 9:00 — конкурсны дзень — уваход вольны.

9 лютага

  • 10:00 — майстар-класы і гала-канцэрт — уваход па запрашальных.

Play! Гісторыя мультфільмаў

Дзе: Дом-музей I з'езда РСДРП, г. Мінск, пр-т Незалежнасці, 31а

Калі: па 5 красавіка, пн-ндзл 11:00 — 19:00

Колькі каштуе: дарослыя — 5 BYN; студэнты — 4 BYN; школьнікі — 3 BYN

Хто з нас, асабліва ў дзяцінстве, не захапляўся мультыкамі і не задаваўся пытаннем, як усё гэта робіцца? Сёння на выставе вы зможаце зазірнуць у таямніцу стварэння анімацыі.

Днём нараджэння мультыплікацыі лічыцца 30 жніўня 1877 года, а ўжо з 1920-х гадоў «мульцяшныя героі» становяцца спадарожнікамі дзяцей ва ўсім свеце. Сёння ў асноўным мультфільмы ствараюцца з дапамогай камп'ютарнай графікі, і мы можам праглядаць іх на любой лічбавай прыладзе. А сто гадоў таму для прагляду «бегаючых малюнкаў» выкарыстоўвалі фенакістыскоп, заатроп, страбаскоп, праксінаскоп, стэрыяскоп і г.д. З усімі гэтымі фантастычнымі прыладамі вы зможаце азнаёміцца ​​на выставе і не проста паглядзець на іх здалёк, але і пакруціць і непасрэдна на сабе адчуць, як гэта працуе.

Акрамя інтэрактыўных мульты-агрэгатаў, вы зможаце пагартаць цікавыя коміксы, паглядзець кадры з мультфільмаў першай паловы мінулага стагоддзя, прымерыць вушкі Мікі Маўса ў адкрытай фотазоне і нават зрабіць уласны анімацыйны фліпбук у анімацыйнай міні-майстэрні!

Ну а для тых, хто не баіцца пасмяяцца над сабой, мы прапануем куток крывых люстэркаў, дзе можна паглядзець на сябе ў розных незвычайных варыяцыях, як калісьці гэта зрабіў воўк у адной з серый знакамітага мультсерыяла «Ну, Пачакай!».

На выставе экспанаты чапаць не толькі можна, але і трэба!


Выстава «Віленскія гарызонты»

Дзе: Нацыянальны цэнтр сучасных мастацтваў, г. Мінск, пр-т Незалежнасці, 47

Калі: па 23 лютага

Колькі каштуе: 5 BYN

Нацыянальны цэнтр сучасных мастацтваў запрашае вас у перыяд наведать выставу фотаздымкаў Саўлюса Журы «Віленскія гарызонты».

Не так проста патлумачыць сабе і іншым, што такое «мой горад», — прасцей паказаць. Аднак, кажучы пра яго фатаграфію, важна зразумець адну рэч — аб’ектыўнай, бачнай для ўсіх па-аднолькаваму гарадской прасторы няма. Існуюць толькі індывідуальныя кагнітыўныя карты нашага руху.

Мы рухаемся не столькі па архітэктурных прасторах, колькі па ўяўных шляхах, рухаемся тактыльна, кіруючыся звычкамі і бачнымі толькі для нас знакамі. Добры фатограф ведае: тое, што бачна, — няпраўда. Як толькі мы нараджаемся, нас паглынае гарадская прастора, яе перспектывы і маштабы, яе вобразы і пахі, гукі, што яна фармуе, і звінячая цішыня, тупыя плоскасці і фатальныя праёмы.

Спытайце ў Саўлюса Журы, дакладней, выйдзіце з ім ранкам ці ўвечары ў аблюбаваныя фатографам мясціны горада Вільнюса, у якіх за будынкамі, за дымам, за застылым ад холаду небам ён бачыць прароцкія знакі. У іх няма віленскіх вежаў, але ёсць гукі званоў, што даносяцца з іх, няма вуліц, але чуецца пагрозлівы гул транспарту.

Горад — гэта шматгаловы жыццяздольны жыхар прырэчча, які хрыпіць, шыпіць, спіць і святкуе. Яго можна на кароткі час прыручыць, зразумець адну, другую асаблівасць яго характару, але не больш за тое. Таму Саўлюсу, як і мноству фатографаў, пісьменнікаў, мастакоў, даводзіцца днём, ноччу, зімой і летам ствараць свой Вільнюс, як гісторыю сваіх пошукаў, сустрэч, адкрыццяў. Яна пераменлівая, бо горад заўсёды рухлівы, цьмяны, тактыльны, ён пастаянна знікае з поля зроку, аддаляецца, пільнуе, зрастаецца з рухамі цела, паўтарае іх.

Для Саўлюса Журы важная маляўнічасць Вільнюса, яго самастойнасць. Таму фатограф адхіляецца, падымаецца на хмарачос, глядзіць у далёкую перспектыву і дазваляе гораду на сваіх фотаздымках проста быць. Быць максімальна бачным, самадастатковым, утульна мармытаць свае штодзённыя мантры. Гэта адлегласць павагі і захаплення.


XXVI Мінская міжнародная кніжная выстаўка-кірмаш

Дзе: г. Мінск, пр-кт Пераможцаў, 14

Калі: 5 — 9 лютага

Колькі каштуе: бясплатна

Кніжны форум будзе прысвечаны Году малой радзімы і ІІ Еўрапейскім гульням, а таксама юбілеям класікаў беларускай літаратуры і памятным гістарычным датам Беларусі.

Упершыню выстаўка будзе праводзіцца не толькі на пляцоўках выставачнага комплексу, але і ў кніжных магазінах, бібліятэках і музеях, будуць арганізаваны літаратурныя экскурсіі, паэтычныя маршруты і тэматычныя семінары. Плануецца абмеркаваць сусветныя тэндэнцыі ў афармленні кніг, краўдфандынг, літаратурную крытыку і блогінг, работу ў сацыяльных сетках і іншыя пытанні кніжнай галіны.

У час выстаўкі арганізуюць сустрэчы з аўтарамі, выдаўцамі, мастакамі, прэзентацыі кніг, круглыя сталы, аўтограф-сесіі, майстар-класы, будзе працаваць дзіцячая пляцоўка. Экспазіцыя «Друкарскі двор XVI стагоддзя» прадэманструе ўнікальную абстаноўку старадаўняга друкарскага двара.

Акрамя таго, адбудзецца міжнародны сімпозіум літаратараў «Пісьменнік і час» 6-7 лютага з удзелам аўтараў з краін блізкага і далёкага замежжа, а таксама семінар маладых літаратараў і перакладчыкаў.

На цэнтральнай пляцоўцы пройдзе ўрачыстая цырымонія ўзнагароджання пераможцаў 58-га нацыянальнага конкурсу «Мастацтва кнігі» і конкурсу маладых літаратараў «Першацвет».

У гэтым годзе пачэсным госцем форуму стануць Злучаныя Штаты Амерыкі.

Выбар рэдакцыі

Палітыка

«Рэальнае жыццё нi ў якi нават самы дасканалы закон не ўмесцiш»

«Рэальнае жыццё нi ў якi нават самы дасканалы закон не ўмесцiш»

Пра першы год жыцця Вярхоўнага суда ў новым будынку — Валерый Калiнковiч.

Спорт

СААЗ рэкамендуе займацца спортам у хатнiх умовах

СААЗ рэкамендуе займацца спортам у хатнiх умовах

Сядзячы спосаб жыцця i нiзкi ўзровень фiзiчнай актыўнасцi могуць аказаць негатыўны ўплыў на здароўе.

Грамадства

Намеснік міністра аховы здароўя Алена Богдан: Сітуацыя з каранавірусам застаецца кантраляванай

Намеснік міністра аховы здароўя Алена Богдан: Сітуацыя з каранавірусам застаецца кантраляванай

У Беларусі з моманту выяўлення першага выпадку COVID-19 зарэгістравана 351 інфікаваных.