Вы тут

На ваенны факультэт БДУІР упершыню залічылі дзяўчын


Дар'я ГАРБАЧОВА, Валерыя РЫМЧОНАК, Карына ШЧУР і Ангеліна КУДЛАЧ таксама, як і 59 хлопцаў (менавіта столькі аказалася на першым курсе юнакоў), да паступлення прайшлі праз розныя выпрабаванні: медкамісію, тэсты на прафпрыдатнасць, гутарку з псіхолагам, здачу нарматываў па фізпадрыхтоўцы і іншыя. Цяпер дні іх курсанцкага жыцця распісаныя па хвілінах. Як ставяцца да выбару прафесіі бацькі дзяўчат? Як ім вучоба на факультэце? Якія дысцыпліны самыя любімыя?


Ва­ле­рыя Рым­чо­нак.

Васямнаццацігадовая Дар'я Гарбачова з аграгарадка Турэц Чэрвеньскага раёна ўпэўнена, што ў будучыні стане... палкоўнікам! Зараз для сябе яна абрала спецыяльнасць «Інфакамунікацыйныя тэхналогіі». Курсантка прызнаецца, што прафесійны шлях ёй дапамог выбраць старэйшы брат, які служыць у спецназе.

— Ён часта дзяліўся цікавымі момантамі, звязанымі са службай, мяне гэта прываблівала. Да таго ж мой дзядуля таксама быў вайсковец, служыў на падводнай лодцы, так што, можна сказаць, у нас сямейная дынастыя. Памятаю, калі я сказала матулі пра цвёрды намер паступаць на ваенны факультэт, яна вельмі перажывала, але цяпер супакоілася. Лічу, што прафесія вайскоўца дысцыплінуе і арганізоўвае. Акрамя таго, ёсць нейкая рамантыка ў тым, як выглядае дзяўчына ў форме з пагонамі на плячах...

Дар'я падзялілася, што да залічэння на ваенны факультэт паўгода працавала над сваёй фізічнай падрыхтоўкай штодзень. Дзякуючы гэтаму цяпер ёй лягчэй даецца выкананне розных нарматываў.

— Таксама ў мяне атрымліваецца вучыцца «на выдатна», таму я часам маю прывілеі ў выглядзе дадатковых звальненняў. Увогуле, вучобе мы ўдзяляем шмат часу, мне больш за ўсё падабаюцца ваенныя дысцыпліны. З дзяўчатамі жывём у асобным блоку ў інтэрнаце. У вызначаны час маем магчымасць патэлефанаваць родным, — падзялілася студэнтка.

Сямнаццацігадовая Валерыя Рымчонак з Віцебска вучыцца на той жа спецыяльнасці, што і Дар'я. Са спортам сябруе ўжо шмат гадоў, таму выкананне нарматываў для паступлення прайшло для яе без узмоцненай падрыхтоўкі. Ваенны факультэт БДУІР дзяўчына лічыць для сябе вельмі перспектыўным, таму і намаганні для далейшай рэалізацыі ў кар'еры прыкладае немалыя.

— Яшчэ ў дзяцінстве зразумела, што буду ваеннай. Глядзела фільмы пра вайну і ўяўляла сябе на месцы герояў, а калі пасталела, жаданне трапіць у гэтую сферу толькі ўзмацнілася. Вызначыўшыся з установай адукацыі, вельмі перажывала, былі сумненні ва ўласных магчымасцях. Хваляванне заставалася, нават калі прыйшло ўсведамленне, што маю высокія балы для залічэння на курс — амаль 350. У мяне ёсць дакладнае разуменне, што хачу служыць на карысць нашай краіны. Спадзяюся, усё атрымаецца, — кажа Валерыя.

Дарэчы, наша гераіня найлепшая ў вучобе на курсе, яна бярэ ўдзел у розных спартыўных спаборніцтвах, дзе займае прызавыя месцы. Родных Валерыя бачыць часта: «Часам нават засумаваць не паспяваю (усміхаецца). Вучыцца на ваенным факультэце няцяжка, наадварот, падабаюцца дысцыпліна, дакладны распарадак дня».

З ма­май пас­ля пры­няц­ця во­ін­скай пры­ся­гі.

Курсанткі Карына Шчур і Ангеліна Кудлач разам адвучыліся ў кадэцкім вучылішчы, а пасля вырашылі паступаць на ваенны факультэт.

— Бацькі да апошняга думалі, што аддам перавагу звычайнай ВНУ. Але я зрабіла па-свойму. Фізічная падрыхтоўка пры паступленні была адным з галоўных аспектаў, падчас курса маладога байца нас правяралі на трываласць. Цяжкія для мяне аказаліся выпрабаванні з бронекамізэлькай. Але я з усім справілася, паступіла на спецыяльнасць «Вылічальныя машыны, сістэмы і сеткі» і вельмі гэтаму рада. У мяне ёсць мэта — даслужыць да высокага звання ў ваеннай справе, — падзялілася сямнаццацігадовая Карына.

Васямнаццацігадовай мінчанцы Ангеліне Кудлач абраць прафесію па душы дапамог прыклад старэйшага пакалення. Яе дзядуля служыў у органах унутраных спраў. Рашэнне адвучыцца ў кадэцкім вучылішчы падтрымала і матуля:

— Пасля вучобы ў гэтай установе задумалася: ці варта працягваць? Але адразу ж адказала сабе — так, ніякія цяжкасці мяне не палохаюць. Ведала, што пры паступленні на ваенны факультэт БДУІР будзе няпроста. Але мне пашанцавала, з боку родных была велізарная падтрымка. Навучацца ваенным дысцыплінам мне па душы. Упэўнена, што сюды лепш паступаць хлопцам і дзяўчатам з моцным характарам, тым, хто гатовы развівацца і духоўна, і фізічна.

Дар'я ШЛАПАКОВА

Фота з архіва Валерыі Рымчонак

Загаловак у газеце: Чацвёрка першых

Выбар рэдакцыі

Грамадства

Нацыянальная акадэмія навук ініцыюе стварэнне народнага летапісу Вялікай Айчыннай вайны

Нацыянальная акадэмія навук ініцыюе стварэнне народнага летапісу Вялікай Айчыннай вайны

Навукоўцы звяртаюцца да кіраўніцтва абласных і раённых выканаўчых камітэтаў, устаноў адукацыі і культуры, грамадскіх арганізацый, усіх зацікаўленых грамадзян з просьбай разгарнуць работу па зборы ўспамінаў і фатаграфій удзельнікаў падзей Вялікай Айчыннай вайны.

Грамадства

Зіновій Прыгодзіч. Успаміны пра архітэктара Леаніда Левіна. Пайшоў, каб застацца...

Зіновій Прыгодзіч. Успаміны пра архітэктара Леаніда Левіна. Пайшоў, каб застацца...

З Леанiдам Левiным, славутым нашым архiтэктарам, мяне пазнаёмiў Генадзь Бураўкiн — яго даўнi, харошы сябра.

Грамадства

«Дзякуй участковаму — ён нас добра беражэ». Як міліцыя праводзіць прафілактычны рэйд падчас сітуацыі з каранавірусам

«Дзякуй участковаму — ён нас добра беражэ». Як міліцыя праводзіць прафілактычны рэйд падчас сітуацыі з каранавірусам

«Без мiлiцыi мы нiяк», — рэзюмаваў Прэзiдэнт Беларусi Аляксандр Лукашэнка падчас сустрэчы з мiнiстрам унутраных спраў Юрыем Караевым, маючы на ўвазе сiтуацыю з каранавiрусам. 

Грамадства

Чым сябе заняць на самаiзаляцыi?

Чым сябе заняць на самаiзаляцыi?

Урачы па ўсiм свеце запусцiлi флэшмоб #StayAtHome.