Вы тут

Сырая цёплая зіма: ратаваць кветкі ці махнуць рукой?


Такой цёплай зімы не было за ўсю гісторыю метэаназіранняў. І як вынік гэтай анамаліі — зазелянела трава, пачалі распускацца першыя кветкі, нават абрыкосы зацвілі.

Зразумела, што такое пацяпленне не найлепшым чынам адбіваецца на раслінах, якія прывыклі да суровых зім. Якіх наступстваў трэба чакаць і што рабіць з адчувальнымі да перападаў тэмператур садовымі кветкамі?


У чым небяспека?

Цёплае і вільготнае надвор'е зімой нясе небяспеку для раслін. Яно можа справакаваць іх рост, а маразы, калі раптам прыйдуць, загубяць набраклыя пупышкі і зялёныя парасткі. Ад гэтага вясной цвіценне можа быць слабае ці ўвогуле адсутнічаць. Расліны не загінуць, але вясной іх трэба будзе падлячыць і падкарміць.

З-за адсутнасці снегу пры паніжэнні тэмпературы да -10 °C можа пацярпець каранёвая сістэма ягадных культур і садовых кветак. Каб гэтага не здарылася, міжраддзі каля іх каранёў варта замульчыраваць пластом сухога пілавіння або ігліцы таўшчынёй не менш за 5 сантыметраў. Не зашкодзіць і ўкрыццё лапнікам.

Ураджайнасць і прыгажосць цвіцення раслін часта залежаць ад таго, чым яны замульчыраваны.

Да гібелі мнагалетнікаў могуць прывесці грыбковыя інфекцыі, узбуджальнікі якіх асабліва добра сябе адчуваюць ва ўмовах павышанай вільготнасці і плюсавых тэмператур. Спрыяе такое надвор'е і лепшай зімоўцы шкоднікаў, якія не вымерзнуць у сваіх сховішчах. Таму з пачаткам вясны з імі трэба будзе весці барацьбу.

Мнагалетнік у цёплую зіму

Выжывуць ці не любімыя кветкі, залежыць ад таго, як зменіцца надвор'е і наколькі хутка пахаладае, а таксама ад своечасова ажыццёўленых дзеянняў па іх выратаванні. Калі маразы надыдуць рэзка, гэта выкліча стрэс і пашкоджанні ў раслін, але наўрад ці загубіць іх. Значна больш небяспечнае для іх чаргаванне пахаладання і адлігі.

Найбольш адчувальныя да перападаў тэмператур ружы, гартэнзіі, дэкаратыўны бружмель, лаванда і некаторыя іншыя кветкі, Таму іх і хаваюць на зіму. Аднак калі гэтае сховішча глухое, то-бок не праветрываецца, а ад плюсавых тэмператур глеба пад ім не замерзла, выдзяляецца кандэнсат, і расліны могуць папрэць і вымакнуць.

Каб гэтага не здарылася, а таксама і для прытоку кіслароду да мнагалетнікаў неабходна перыядычна іх раскрываць. Калі ж вы схавалі свае кветкі на зіму пад лапнікам, мешкавінай або агравалакном, якое дыхае, то можаце быць спакойныя: выправанне ім не пагражае. Такое сховішча не мае патрэбы ў праветрыванні.

Найлепшая «апратка» для раслін

Калі ўвосень не праведзена апрацоўка шматгадовых культур, то засцерагчы іх ад хвароб і шкоднікаў можна і зараз, пакуль трымаецца плюсавая тэмпература. Для гэтага расліны трэба вызваліць са сховішча і апрацаваць 3-працэнтнай бардоскай вадкасцю, якая абароніць іх ад мучністай расы і іншых грыбковых інфекцый.

Замест гэтага прэпарату для апырсквання таксама можна выкарыстоўваць 3-працэнтны раствор меднага або жалезнага купарвасу. Пры апрацоўцы медным купарвасам гіне да 70 % лічынак і дарослых шкоднікаў, якія зімуюць, а таксама міцэліі і споры грыбоў, узбуджальнікі іншых захворванняў. Жалезны купарвас спалучае ў сабе ўласцівасці інсектыцыду, фунгіцыду і мікраўгнаення. Ён таксама эфектыўны супраць шкоднікаў, а яшчэ мхоў і лішайнікаў, выкарыстоўваецца для прафілактыкі і лячэння грыбковых захворванняў, такіх як мучністая раса, шэрая гнілата і іншыя.

Некаторыя ж мнагалетнікі зімуюць проста пад мульчай з лістоты. Ад вільготнага надвор'я пад ёй могуць развівацца грыбковыя інфекцыі. Таму лістоту лепш прыбраць, а расліны пасля апрацоўкі фунгіцыдамі ўкрыць іншай сухой мульчай.

У час адлігі могуць з'явіцца парасткі цыбульных кветак. Але з надыходам халадоў яны адамруць. Кветкавыя ж пупышкі мароз, хутчэй за ўсё, не закране, бо яны знаходзяцца ў зямлі. Таму ёсць надзея ўбачыць іх цвіценне вясной. На жаль, першацветы, якія ўжо распусціліся, другі раз за сезон не зацвітуць.

Вільготная і цёплая зіма небяспечная для шматгадовых культур. Але калі правесці апрацоўкі і зрабіць укрыццё, якое праветрываецца, праблем ад неспрыяльных умоў надвор'я можна пазбегнуць.

Ірына ТАМКОВІЧ

Выбар рэдакцыі

Палітыка

«Рэальнае жыццё нi ў якi нават самы дасканалы закон не ўмесцiш»

«Рэальнае жыццё нi ў якi нават самы дасканалы закон не ўмесцiш»

Пра першы год жыцця Вярхоўнага суда ў новым будынку — Валерый Калiнковiч.

Спорт

СААЗ рэкамендуе займацца спортам у хатнiх умовах

СААЗ рэкамендуе займацца спортам у хатнiх умовах

Сядзячы спосаб жыцця i нiзкi ўзровень фiзiчнай актыўнасцi могуць аказаць негатыўны ўплыў на здароўе.

Грамадства

Намеснік міністра аховы здароўя Алена Богдан: Сітуацыя з каранавірусам застаецца кантраляванай

Намеснік міністра аховы здароўя Алена Богдан: Сітуацыя з каранавірусам застаецца кантраляванай

У Беларусі з моманту выяўлення першага выпадку COVID-19 зарэгістравана 351 інфікаваных.