Вы тут

Проста казачны падарунак!


Нашы юныя супляменнікі з Латвіі былі гасцямі на Прэзідэнцкай ёлцы ў мінскім Палацы Рэспублікі


Дзеці з Даўгаўпілса з іх настаўніцай на свяце

Цуды, кажуць, здараюцца ў Калядную пару. І вучням Беларускай нядзельнай школы “Вясёлка” Даўгаўпілскага беларускага культурна-асветнага таварыства “Уздым” пашчасціла да іх дакрануцца: яны 26–27 снежня 2019 года пабывалі на святочным прадстаўленні ў Беларускім дзяржцырку і на Прэзідэнцкай ёлцы ў Палацы Рэспублікі. Гэта, заўважым, знакавыя імпрэзы вялікай Навагодняй дабрачыннай акцыі “Нашы дзеці”, якая штогод праходзіць па ўсёй Беларусі.

Спачатку, як прыехалі мы ў Мінск, запрасілі нас у цырк. Прадстаўленне праходзіла паводле казкі “Царэўна-Несмяяна”. Сюжэт яе вядомы: Баба-Яга начаравала — і прынцэса перастала смяяцца, радавацца жыццю. Цар-бацька запрашае ўсіх прыдворных зняць чары з дачкі: а на арэне тое рабілі жанглёры, клоўны, вярблюды, сабачкі з трукамі на скейтбордах. Нас найбольш уразіла шоу, калі артысты ў яркіх святлодыёдных касцюмах прыгожа танцавалі ды адначасова каляровымі посахамі малявалі карціны.

Пасля смачнай вячэры ў гімназіі, у самым цэнтры беларускай сталіцы, мы гулялі па вячэрнім горадзе, які зіхацеў у навагодняй ілюмінацыі. Прыгажосць! А потым у інтэрнаце (там начавалі школьнікі з розных месцаў Беларусі, з іншых дзяржаў, якія прыехалі на свята) зладзілі дзіцячую дыскатэку. Госці змаглі й пазнаёміцца, і нават знайсці новых сяброў.

Раніца 27 снежня. Дзеці ў прадчуванні Ёлкі. У Палацы Рэспублікі ўсё зіхаціць-пераліваецца, паўсюль прыгожыя кампазіцыі для фотасесій, велізарная ёлка. Аніматары — малайцы: дапамаглі дзецям разняволіцца, яшчэ больш іх падзарадзілі святочным настроем.

Перад Навагоднім прадстаўленнем выступаў Прэзідэнт Беларусі Аляксандр Рыгоравіч Лукашэнка. Ён павіншаваў дзяцей і настаўнікаў з Новым годам.

Спектакль жа быў у стылі мюзікла: добрая гісторыя з дзяцінства Дзеда Мароза з цікавай версіяй, чаму ж па свеце столькі розных Дзядоў Марозаў. Несумненна, шчасцем было для дзяцей атрымаць падарункі ад Прэзідэнта: вялікія наборы беларускіх цукерак, мяккія цацкі-Мышкі, віншавальныя паштоўкі. Эксклюзіў!

Мы перамяшчаліся па Мінску ў спецаўтобусах, у суправаджэнні міліцэйскага эскорту. Як адказная за дзетак, зазначу, што ў пытаннях арганізацыі мерапрыемстваў, бяспекі ўсё было прадумана да дробязяў.

Дарога дадому нікому не падалася доўгай. Ва ўдзельнікаў паездкі ў Мінск пра гэтае замежнае, не вельмі блізкае, святочнае й дзівоснае падарожжа засталіся самыя пазітыўныя ўражанні. Казалі: пра такі навагодні падарунак можна толькі марыць! А яшчэ дзеці зразумелі, што паездка на Прэзідэнцкую ёлку ў Мінск — гэта ўзнагарода ім за поспехі ў вучобе, актыўнасць у Беларускай нядзельнай школе. Дарэчы, на Прэзідэнцкай ёлцы ў Мінску з Латвіі былі й вучні Рыжскай беларускай асноўнай школы, беларускага нядзельнага класа з Рэзэкнэ. Ведаю, былі на свяцей й нашы юныя супляменнікі з Літвы. А выхаванцы “Вясёлкі” падзельнічалі ў дабрачыннай акцыі “Нашы дзеці” ў Беларусі ўжо другі раз — дзякуючы падтрымцы Амбасады Беларусі у Латвіі, за што “Уздым”, як і бацькі, дзеці-шчасліўчыкі дыпламатам бязмежна ўдзячныя. Асобныя словы нашай падзякі: Генеральнаму консульству Беларусі ў Даўгаўпілсе — за вырашэнне візавых пытанняў; віцэ-мэру Даўгаўпілса Янісу Дукшынскаму ды Упраўленню адукацыі, яго кіраўніцы Марыне Ісупавай — за вырашэнне транспартнага пытання; шафёру Чэславу Кезіку — за высокі прафесіяналізм. Дзякуем і памежным службам Латвіі ды Беларусі — за аператыўнае вырашэнне пытання з перасячэннем дзяржаўнай мяжы, праўленню беларускага таварыства “Уздым” — за вырашэнне ўсіх аргпытанняў. А ўрэшце вялікі “механізм навагодніх цудаў” спрацаваў як мае быць — і гэта здорава! З прафесіяналізму, разумных і ўзважаных учынкаў многіх спецыялістаў абедзвюх дзяржаў, розных структур склалася агульная добрая справа: нашы дзеці атрымалі незабыўны падарунак да Новага года, пашырылі свой кругагляд, умацавалі дружалюбныя стасункі Латвіі ды Беларусі.

Алёна Радзівонава, настаўніца, кіраўніца дэлегацыі, г. Даўгаўпілс

Нумар у фармаце PDF

Выбар рэдакцыі

Грамадства

Час клопату садаводаў: на якія сарты пладовых і ягадных культур варта звярнуць увагу?

Час клопату садаводаў: на якія сарты пладовых і ягадных культур варта звярнуць увагу?

Выбар саджанца для садавода — той момант, значнасць якога складана пераацаніць.

Культура

Чым сёлета будзе здзіўляць наведвальнікаў «Славянскі базар у Віцебску»?

Чым сёлета будзе здзіўляць наведвальнікаў «Славянскі базар у Віцебску»?

Канцэрт для дзяцей і моладзі, пластычны спектакль Ягора Дружыніна і «Рок-панарама».