Вы тут

АПБ і анлайн-кампанія «Воўчы блог» запрашаюць на начную экскурсію па слядах воўка


1-2 лютага грамадская арганізацыя «Ахова птушак Бацькаўшчны», воўчы блог vouk.by сумесна з нацыянальным паркам «Белавежская пушча» і Белавежскім нацыянальным паркам Польшчы арганізуюць «Ноч ваўкоў», каб развеяць распаўсюджаныя стэрэатыпы пра іх і натхніць як мага больш людзей далучыцца да аховы роднай прыроды. 


У нашым грамадстве да ваўка склалася жорстка негатыўнае стаўленне і гэта адмоўна ўплывае на стан дзікай прыроды Беларусі. Воўк — драпежнік найвышэйшага парадку, а значыць, ён падтрымлівае біялагічную разнастайнасць і самарэгуляцыю экасістэмы, у якой жыве. Але яго ролю пачаў прымяраць на сябе чалавек. Ён вырашае, колькі і якіх відаў патрэбна канкрэтнаму лесу ці асабліва ахоўнай тэрыторыі. Беспадстаўна перакройваючы экасістэму на свой капыл, чалавек парушае раўнавагу дзікай прыроды, у якой усё ўзаемазвязана. 

Грамадская арганізацыя «Ахова птушак Бацькаўшчыны» займаецца вывучэннем сітуацыі па ваўку ў Беларусі з 2013 года. У межах анлайн-кампаніі vouk.by усе могуць паглядзець на свет вачыма звера. Дапамагаюць у гэтым палявыя супрацоўнікі. Яны ўсталёўваюць фотапасткі, па слядах высочваюць ваўкоў, каб падлічыць іх, робяць генетычны аналіз груп. Усё гэта дзеля адной вялікай мэты — спыніць татальны адстрэл ваўкоў. У ваўчынай кампаніі АПБ дапамагае Франкфурцкае заалагічнае таварыства. 

Цяпер АПБ і Франкфурцкае заалагічнае таварыства сумесна з Нацыянальным паркам «Белавежская пушча» і польскім Белавежскім нацыянальным паркам праводзяць першую трансгранічную Ноч ваўкоў. 

Два дні ў Белавежскай пушчы з абодвух бакоў дзяржаўнай мяжы будуць вабіць ваўка, прымяраць на сябе ролю следапытаў. Удзельнікі мерапрыемства даведаюцца пра жыццёвы распарадак, звычкі драпежніка, яго стасункі з чалавекам і ў сваёй сям’і.

У канцы першага дня ўсіх чакае вячэрняя экскурсія па слядах ваўка і начное вогнішча на Царскай паляне. 

Удзел у экскурсііі бясплатны, але па папярэдняй рэгістрацыі

У праграме ваўчыных лекцый:

• Ігар Бышнёў — выбітны кінарэжысёр-анімаліст, аўтар больш чым 60 фільмаў і сацыяльных відэаролікаў пра прыроду. Пакажа свае кінапрацы пра ваўка Беларусі, Калмыкіі і Каўказа.

• Дзмітрый Шамовіч і Анастасія Кузьмянкова — навукоўцы, важакі ваўчынай зграі. Выгадавалі трох ваўкоў і раскажуць пра асаблівасці жыцця з імі.

• Валерый Дамброўскі — навуковец. Раскажа пра даследаванні ваўкоў у Чарнобыльскай зоне — унікальным месцы, дзе чалавек мінімальна ўмешваецца ў дзікую прыроду.

• Віктар Фянчук — каардынатар воўчага праекта, чалавек, якому vouk.by абавязаны сваім існаваннем. Раскажа пра тое, колькі ваўкоў у Белавежскай пушчы і як ім тут жывецца.

• Мацей Шэўчык — вучоны-генетык з Польшчы, спецыялізуецца на даследаваннях генетычнай структуры папуляцыі. Раскажа пра асаблівасці ваўкоў, якія рэкаланізуюць Цэнтральную Еўропу.

• Ірына Кашпей — прыродаахоўны спецыяліст і студэнтка магістратуры Эдынбургскага ўніверсітэта. Натхніла аўдыторыю TEDxMinsk сваёй любоўю да ваўка і цяпер падзеліцца ёй з вамі.

Больш падрабязна з праграмай «Ночы ваўкоў» можна пазнаёміцца тут.

Надзея НІКАЛАЕВА

Выбар рэдакцыі

Грамадства

Тураўскі крыж упершыню будзе прадстаўлены 26 верасня

Тураўскі крыж упершыню будзе прадстаўлены 26 верасня

На свята Узнясення Крыжа Гасподняга, падчас вячэрняй службы ў Мінскім кафедральным саборы.

Грамадства

Як і чым жыве колішняя «памідорная сталіца» Беларусі?

Як і чым жыве колішняя «памідорная сталіца» Беларусі?

Каб адчуць, чым organіc food адрозніваецца ад звыклых для сучаснага гараджаніна прадуктаў, дастаткова пакаштаваць памідоры ў Савічах і параўнаць іх з таматамі з гіпермаркета.

Грамадства

Генеральны дырэктар РУП «Белпошта» Святлана Юркевіч: Мы будзем развіваць перш за ўсё паштаматы

Генеральны дырэктар РУП «Белпошта» Святлана Юркевіч: Мы будзем развіваць перш за ўсё паштаматы

На працягу многіх дзесяцігоддзяў пошта асацыіравалася з традыцыйным наборам паслуг — лістамі, пасылкамі, газетамі, пенсіямі... Але сучасныя тэхналогіі ўсё больш уваходзяць у наш побыт.