Вы тут

Як у Чашніцкім раёне вырошчваюць мандарыны


Своеасаблівая «фішка» для турыстаў, ды і тутэйшых, у Чашніцкім раёне — прыватная аранжарэя плошчай больш за 1200 «квадратаў». Тут вырошчваюць адзін з сімвалаў навагодняга свята — мандарыны. Недалёка можна ўбачыць, як растуць бананы, лімоны, персікі, інжыр, кафейнае дрэва, іншая экзотыка. У штучным вадаёме плаваюць асятры, якіх пры жаданні гасцей могуць прыгатаваць. А ў клетцы спявае кенар. Знаходзіцца ўсё гэта ў аграрнай сядзібе «Абузер'е».


Побач вялікае возера каля Лукомльскай дзяржаўнай раённай электрастанцыі — флагмана беларускай энергетыкі. Вадаём па плошчы адзін з пяці найвялікшых у Беларусі. Многія яго параўноўваюць з морам, дзе заўсёды шмат рыбы. Таму любяць тут спыняцца і заядлыя рыбакі.

Ад Віцебска да вёскі Абузер'е на аўтамабілі прыкладна паўтары гадзіны, ад Мінска — прыкладна дзве, а масквічам ехаць — меней шасці гадзін.

Гаспадыня турыстычнага пункта Ларыса Іванова па адукацыі спецыяліст па міжнародных стасунках. Дарэчы, што цікава, яна нарадзілася і доўгі час жыла ў Расіі: у Ханты-Мансійскай аўтаномнай акрузе, а вучылася ў Санкт-Пецярбургу — у акадэміі дзяржаўнай службы.

— У Беларусь прыязджалі да сваякоў мужа Вячаслава адпачыць. Каля дзесяці гадоў таму мы пабудавалі ў вёсцы дом і «дачу», каб прымаць у гасцях расійскіх сваякоў, знаёмых. Тыя шчыра дзяліліся ўражаннямі са сваімі сябрамі. І многія таксама хацелі адпачыць у беларускай глыбінцы, набрацца сіл на прыродзе, харчуючыся агароднінай, садавіной без хімікатаў. Так і распачалі сямейны турыстычны бізнес, — жанчына згадвае, як усё пачыналася.

У прынцыпе, пачатак такі, як і ва ўсіх уладальнікаў беларускіх аграсядзіб. Канешне, паспрыяў старту бізнесу сімвалічны падатак для тых, хто займаецца сельскім турызмам, — усяго базавая велічыня ў год.

Наконт аранжарэі гаспадыня кажа, што напачатку быў проста агарод, як ва ўсіх вяскоўцаў ці дачнікаў.

— Але захацелася, каб расліны радавалі вока круглы год. Вось і пабудавалі вялікую аранжарэю. Каб у ёй было ўсім раслінам утульна, заўсёды падтрымліваецца адна і тая ж тэмпература: плюс 20 градусаў. І паралельна — неабходны стабільны ўзровень вільготнасці. За яго адказвае вельмі прадуманая і разумная сістэма кандыцыянавання.

Усяго пад дахам на дванаццаці сотках больш за пяцьдзясят відаў флоры. Пры гэтым у памяшканні вельмі прасторна. Тут з задавальненнем бегаюць дзеці, гуляюць у схованкі, катаюцца на маленькіх веласіпедах, самакатах. Ёсць і горкі, арэлі...

Як жа навучылася даглядаць экзатычныя расліны? Ларыса кажа, што дзякуючы сеціву можна атрымаць шмат рэкамендацый па ўсіх тэмах. Але, як сцвярджае гаспадыня «зялёнага царства», найлепшая парада — напрацаваны гадамі вопыт.

Як «бонус» — багатыя ўраджаі смачных і вельмі карысных для здароўя пладоў. А як пахнуць і якія цудоўныя на смак аранжарэйныя бананы, апельсіны і мандарыны... Словамі не перадаць. А сокі з іх, кажуць, толькі б піць ды піць.

Дарэчы, частка ўраджаю прадаецца. Аднавяскоўцы і госці ахвотна купляюць тыя ж беларускія бананы. Канешне, гучыць, бадай, смешна, але факт застаецца фактам.

— Уявіце сабе: адна гронка вагой пад дваццаць кіло! А ўраджай персікаў бывае і пад трыста кілаграмаў. Сотні кіло мандарынаў, лімонаў, апельсінаў — самім не з'есці ніколі пры ўсім жаданні, — канстатуе вясковая бізнесвумен.

І амаль усе прыезджыя ўпершыню ў жыцці дзякуючы Ларысе паспрабавалі на смак каламондзіны — гэта гібрыдная расліна: мандарынавае дрэва з кумкватам (з роду цытрусавых)...

Ларыса яшчэ і двойчы мама: дачцэ Жанне — сем, сыну Ваню — пяць гадоў. Ім, безумоўна, вельмі пашанцавала жыць побач з «тропікамі». Малым вельмі падабаецца паліваць кветкі, садавіну, ягады. Каб вады ўсім даць, падрэзаць і абрэзаць лішняе, падкарміць, падлячыць, рабочай змены не хапае. У прыватнасці, доўгі працэс паліву. Некаторым раслінам дастаткова трохі вады, а асабліва «капрызным» неабходны «душ» са шлангу. Ды яшчэ некаторых без лесвіцы не памыць.

Таму ёсць у працавітай Ларысы тры памочнікі. Яны ж і прыёмам турыстаў займацца дапамагаюць.

Аграрная сядзіба больш нагадвае комплекс, бо прыезджыя адпачываюць у некалькіх катэджах. За год тут бывае і пад тысячу гасцей. Напэўна, другой такой сядзібы не знайсці не толькі на Віцебшчыне, але і ва ўсёй краіне.

Напрыклад, на дварэ класічнае навагодняе надвор'е: з марозцам і сняжком, а за шклом аранжарэі клімат зусім іншых геаграфічных шырот. Дзе яшчэ ўбачыш такі «звычайны цуд»? Такое не забываецца насамрэч доўга. І фотаздымкі на памяць хочацца глядзець і глядзець.

Аляксандр ПУКШАНСКІ

Фота Ігара МАЦВЕЕВА

Загаловак у газеце: Мандарыны, апельсіны, бананы... беларускія

Выбар рэдакцыі

Культура

Чым сёлета будзе здзіўляць наведвальнікаў «Славянскі базар у Віцебску»?

Чым сёлета будзе здзіўляць наведвальнікаў «Славянскі базар у Віцебску»?

Канцэрт для дзяцей і моладзі, пластычны спектакль Ягора Дружыніна і «Рок-панарама».

Грамадства

Час клопату садаводаў: на якія сарты пладовых і ягадных культур варта звярнуць увагу?

Час клопату садаводаў: на якія сарты пладовых і ягадных культур варта звярнуць увагу?

Выбар саджанца для садавода — той момант, значнасць якога складана пераацаніць.

Культура

Вольга Здзярская: Для мяне мая прафесія — жыццё

Вольга Здзярская: Для мяне мая прафесія — жыццё

Актрыса НАДТ імя М. Горкага — пра шлях да сцэны і натхненне.

Грамадства

«Любоў — галоўнае, што бацькі павінны даць сваім дзецям»

«Любоў — галоўнае, што бацькі павінны даць сваім дзецям»

Тата і мама — два самыя важныя чалавекі ў жыцці кожнага дзіцяці.