Вы тут

«Звязда» далучылася да акцыі «Нашы дзеці»


Кнігі і ласункі ў падарунак да навагодніх святаў ад Выдавецкага дома «Звязда» сёння атрымалі гадаванцы Рудзенскай дапаможнай школы-інтэрната.


Мясцовыя жыхары сустракалі са шчырымі ўсмешкамі і прывітаннямі, распытвалі, чым мы займаемся, і дарылі абдымкі. Няхай многія з гэтых дзетак маюць пэўны дыягназ, аднак шчырая цікавасць і непадробныя эмоцыі імгненна зрабілі знаёмства блізкім.

— Наша бібліятэка папоўніцца новымі кнігамі, з якіх вы зможаце даведацца больш пра творчасць беларускіх пісьменнікаў, — звярнулася да сваіх выхаванцаў дырэктар установы Наталля ДЗІРОЎСКАЯ. — Спадзяюся, вы будзеце іх не толькі гартаць, але і чытаць і дзяліцца ўражаннямі пра прачытанае, асабліва старшакласнікі, — і дадала ўжо звяздоўцам. — Няхай многія тут не ўмеюць чытаць, але ж малюнкі любяць глядзець усе. Цяпер яшчэ паспрабуй сабраць кнігі разам, пакуль яны не нагуляюцца.

Сапраўды, не паспелі мы яшчэ палажыць падарункі на стол, як яго атакавалі малыя і пачалі гартаць кнігі і расказваць пра свае захапленні.

— Я люблю маляваць, — кажа Арцём. — І фарбаваць. Мо і з кнігі што-небудзь намалюю.

— А мне падабаецца беларуская мова, хоць я на ёй не чытаю, — далучаецца Вова, прыціскаючы да сябе кнігу з казкамі, і пытаецца, ці можна забраць яе з сабою ў бытавы пакой, дзе малыя бавяць час пасля ўрокаў.

Вельмі радуецца, калі адказваю, што ўсе кнігі застануцца ім.

— Вучыцеся, чытайце, набірайцеся ведаў, а мы будзем выдаваць яшчэ больш цікавыя і маляўнічыя кнігі, — паабяцала Таццяна ТРУХАН, вядучы спецыяліст аддзела маркетынга і падпіскі Выдавецкага дома «Звязда».

Пакрысе малыя, нібыта мурашы, пацягнуліся ў сталовую на абед, дзе іх чакаў зефір, прывезены звяздоўцамі. Кнігі панеслі з сабою. Думаецца, цацку гэтую вярнуць у бібліятэку атрымаецца яшчэ не хутка, але ніхто з выхавацеляў не засмучаўся.

— Хай сабе гартаюць, нават добра, а то некаторыя зусім у рукі не бяруць, — гаворыць Таццяна СТУСЬ, намеснік дырэктара па выхаваўчай рабоце. — У нас нядаўна з’явіўся хлопчык-дашкольнік, ён яшчэ і чытаць не ўмее. У яго кніга — найлепшая цацка. Пакуль. Але, думаю, ён і чытаць навучыцца, бо бачна, што цягнецца да ведаў.

На развітанне дзеці дзякавалі і абяцалі калі не чытаць кнігі, то абавязкова глядзець на малюнкі. А нам думалася, наколькі каштоўнай бывае маленькая кропля ўвагі, што выклікае вялікія эмоцыі.

Ірына СІДАРОК, фота аўтара

Выбар рэдакцыі

Палітыка

Як галасуюць рэгіёны на выбарах Прэзідэнта

Як галасуюць рэгіёны на выбарах Прэзідэнта

Расказваюць нашы карэспандэнты.

Палітыка

Аляксандр Лукашэнка: Гэта адна з самых складаных выбарчых кампаній

Аляксандр Лукашэнка: Гэта адна з самых складаных выбарчых кампаній

Кіраўнік дзяржавы прагаласаваў на выбарах Прэзідэнта.

Грамадства

Медыцынскі агляд у віцебскіх газавікоў ажыццяўляе... робат

Медыцынскі агляд у віцебскіх газавікоў ажыццяўляе... робат

А наведвальнiкаў крамы кансультуе выява спецыялiста.