Казачных персанажаў забяспечылі ўсім неабходным дарослыя ўдзельнікі ранішніка — члены Беларускага саюза ветэранаў вайны ў Афганістане. Два дзясяткі дзяцей, чые бацькі — інваліды баявых дзеянняў у Афганістане, наведалі святочную імпрэзу і пачаставаліся салодкімі прысмакамі.
А потым — самае доўгачаканае: сапраўдныя Дзед Мароз і яго ўнучка ўручылі малым спецыяльна падрыхтаваныя падарункі. Вядома, чараўнікі ніколі не памыляюцца, і кожны атрымаў менавіта тое, што хацеў, — «разумны» гадзіннік, лега-канструктар ці смартфон.
«Мая мара!» — ажно заскакала, запляскала ў далонькі адно дзяўчо, пабачыўшы ў руках Дзеда Мароза ролікавыя канькі.
«Калі чалавека не забываюць, памятаюць пра яго, — гэта самае асноўнае. Людзі перанеслі сур'ёзныя выпрабаванні, атрымалі раненні, сталі інвалідамі І, ІІ груп. Але яны змаглі адшукаць сваё месца ў жыцці, стварыць сем'і, гадуюць цудоўных дзяцей — у тым ліку і трох, чатырох», — падкрэсліў член Савета Рэспублікі, старшыня Беларускага саюза ветэранаў вайны ў Афганістане Валерый Гайдукевіч. Асабліва гэта актуальна сёлета, калі ўводу войскаў у Афганістан спаўняецца сорак гадоў.
У чараўніцтва вераць усе. Напэўна, калі рызыкуеш жыццём, яшчэ больш чакаеш цуду. Бо нават у Афганістане Новы год сустракалі — святочна.
«У маёй 8-й роце абавязкова святкавалі, і Дзед Мароз быў», — згадвае кавалер двух ордэнаў Чырвонай Зоркі Аляксандр Жадан. Два яго старэйшыя сыны абралі ваенную прафесію. Шасцігадовы малы ведае: тата афганец, дэсантнік. Хлапчук, калі вырасце, таксама пойдзе па бацькоўскіх слядах — каб Дзеду Марозу больш ніколі не даводзілася прыходзіць на вайну.
А пакуль дзяўчынкі і хлопчыкі, калі і не вызначыліся з будучай прафесіяй, цвёрда ведаюць: будзе свята, падарункі, казка і залпы салютаў. Мірныя на роднай зямлі.
Варвара МАРОЗАВА
Прэв'ю: minsknews.by
У парадку дня — зацвярджэнне Канцэпцыі нацбяспекі і Ваеннай дактрыны.
Фіналістка праекта «Акадэмія талентаў» на АНТ — пра творчасць і жыццё.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.
