Прысвячэнні малой радзіме

Прысвячэнні малой радзіме

9 снежня ў мастацкай галерэі “Універсітэт культуры” прайшла вечарына-прэзентацыя лістападаўскага нумара часопіса “Маладосць”, прысвечанага малой радзіме.

Вечар адкрыў аўтар эсэ “У пошуках малой радзімы” Андрэй Дуброва. У вуснай форме ён прадставіў сваё досыць сур’ёзнае, абгрунтаванае меркаваннямі аўтарытэтных айчынных і замежных гісторыкаў, сацыёлагаў і псіхолагаў, даследаванне пра малую радзіму як мастацкі вобраз, зыходны пункт і базавы інструмент светапогляду чалавека, а не толькі як геаграфічную адзінку і метафару.

Сэнсава глыбокія, але пры гэтым пачуццёвыя, лірычныя прамовы прысутныя пачулі ад супрацоўніцы Інстытута літаратуразнаўства імя Янкі Купалы Нацыянальнай акадэміі навук Беларусі Наталлі Бахановіч і студэнта-гісторыка Максіма Сямёнава. У зале прысутнічалі студэнты чатырох факультэтаў БДУ — будучыя журналісты, сацыёлагі, філолагі і гісторыкі , а таксама іх выкладчыкі.

Падхопленыя агульнай хваляй замілавання да родных куткоў, юныя паэткі — дэбютанткі мінулай восені Вольга Нікіценка і Вераніка Герко, якім была аддадзена паэтычная частка вечара, — не толькі чыталі вершы, але і распавялі кожная пра сваю малую радзіму.

Пра канкрэтныя справы па ўзнаўлены аб’ектаў даўніны распавёў герой адной з публікацый нумара Францішак Жылка.

Сімвалічна, што аўтары краязнаўчых артыкулаў атрымалі ў якасці падарункаў кнігі па краязнаўстве, падпісаныя аўтарам, Алесем Карлюкевічам. “З пажаданнем поспехаў у распачатай дзейнасці” — так гучыць наказ на далейшую творчую дарогу тым, хто зрабіў па ёй хоць і першыя, але вельмі ўпэўненыя крокі.

На прэзентацыі былі прадстаўлены кнігі па тэме краязнаўства і малой радзімы, выпушчаныя Выдавецкім домам “Звязда”.

Фотаздымкі прадастаўлены мастацкай галерэяй “Універсітэт культуры”.