Юлія Шэдзько
нарадзілася 29 ліпеня 1986 года ў Віцебску.
АНАТОМІЯ ВОСЕНІ
* * *
Мы выпраўляемся ў шлях,
караблі і ветразі, усё як след,
дождж ушчэнт залівае палубу
і ўвесь навакольны свет.
Наш дом паволі скрануўся з падмурка,
усе спяць, толькі мы выходзім на нос карабля —
глядзець, як сузор’і змяняюць сузор’і,
як успыхваюць зараніцы за даляглядам,
як час прамінае, пакуль усё спіць.
Лятуць стагоддзі над светам, а мы плывём,
сны калыхаюць людзей, як чоўны,
а мы ўсё глядзім удалячынь і не хочам заплюшчваць вочы.
Срэбнай заслонай дождж, вось ужо і мора паўсюль,
і нічога больш.
Гэта зусім не дом, а каўчэг,
месяц лунае ў нябёсах, і мы у хвалях лунаем,
наш карабель ці дом, ці высокі востраў —
не бачна, бо дождж, дый не важна —
ён плыве па бяскрайняй прасторы, і мы ўсё не спім,
высылаем у свет галубоў,
белыя птахі далёка лятуць, зліваюцца з белаю пенаю хваль.
Мы плывём, як далёка — хто б ведаў?
Але не ў гэтым сэнс.
Нам — пераплыць бы праз мора, праз ноч і сны,
следам за белымі птахамі
пераляцець, нібы выраслі крылы ў карабля белыя,
і каб зоркі ззялі над намі, а што дождж — ну і хай сабе,
гэта толькі прычына шчыльней прытуліцца спінамі.
* * *
У неба сёння дэпрэсія —
пярэстая,
як галубы на весніцах,
на лесвіцах,
у падстрэшшы старым і дзіравым.
Неба ходзіць па бэльках сусветнага даху,
застылага, засыпанага
жоўтымі фотаздымкамі
пажоўклага лісця
яшчэ з восені.
Ды, зрэшты,
ужо якую вясну
не даходзяць (ці не падымаюцца) рукі
прыбраць прыцярушаны лісцем
колішніх восеняў дах.
У неба дэпрэсія —
зрэбная
кашуля, заношаная
процьмаю прошлых
і прышлых гаспадароў.
Яе выкідаюць на сметнік,
ірвуць з трэскам у рыззё,
а яна вяртаецца, пошасць,
напамінкам колішняга або
да болю знаёмымі
лахманамі на чыіхсьці апушчаных
плячах.
У неба дэпрэсія —
веснавая,
як закаханая жанчына,
што весціць
аб сваім каханні слязьмі
і сонечнымі промнямі,
халадэчай
і воблакам квецені на вішні.
У неба дэпрэсія —
нябесная,
ды што тут скажаш,
чалавеча.
Анатомія восені
Анатомію восені крэсляць маршрутамі самалётаў
і праводзяць вачыма ў тузе па ўсім вечным і цёплым:
каханні–свабодзе–жыцці, — выцягні свой квіток на рэйс
і ляці з усіх крылаў да іх — ці ад іх, ужо ўпотай.
Анатомію восені пішуць абдымкамі ля калон
у метро. За Эўрыдыку Арфей коле пікаю парасона
забыццё і самую смерць, каб ўрачыста адзначыць крэс
неапошняга лістападу — і верыць у вернасць да скону.
Анатомію восені вучаць па жылах кляновых лістоў,
іх адчайных далонях, працягнутых раптам, без слоў,
у апошнім «бывай» ад любімых; а ў вогнішчах спрэс
ўсё гарыць і ніяк не згарае іх рэха — а ў памяці дый пагатоў.
Дыялогі
Ты кажаш зноў: лістапад — гэта заўсёды цяжка.
І мне лістападнае неба таксама цісне на плечы.
Няпроста з ім гаварыць — такім набрынялым, важкім,
абсурдна ад лістападу па лістападзе бегчы.
Бясконцыя дыялогі наканавана вытрымаць,
і лепей бы мне маўчаць, а я гавару, гавару...
Цяжка стрываць травой, калі столькі трэба выказаць.
Вазьму і на падаконні ў імбрыку пасаджу —
лепей вішнёвую — костку, скрываўленую і цвёрдую,
няхай яна прарасце, калі будзе цемра і ноч,
а раніцай будзе лёгкі вішнёвае кавы водар
і снег, таксама вішнёвы, дзе сонца прайшло наўзбоч.
Спытай яе, чаго вартая поўная шклянка роспачы
і колькі анёлаў змесціцца на вейках тваіх у сне.
Скрываўленая, пунсовая, вішнёвая цвёрдая костачка
пад тонкім празрыстым вэлюмам у сэрцы маім жыве.
А разам з імі навучанне, сацпакет і нават жыллё.
Беларусь — адзін з сусветных лідараў у галіне здабычы і глыбокай перапрацоўкі торфу.
«Мы зацікаўлены, каб да нас прыязджалі».