Вы тут

Рэспубліканскі конкурс юных журналістаў назваў пераможцаў


Рэспубліканскі конкурс юных журналістаў «Ты ў эфіры», зладжаны Нацыянальным цэнтрам мастацкай творчасці дзяцей і моладзі, назваў пераможцаў. Сёлета конкурс быў прысвечаны Году малой радзімы, а выказацца па тэме «Можа, мала сябры яшчэ знаюць наш край» дзеці і падлеткі маглі ў чатырох намінацыях «Друкаваны матэрыял», «Відэаматэрыял», «Фотарэпартаж», «Сацыяльная сетка».


Пераможцаў у намінацыі «Відэаматэрыял» дапамаглі вызначыць стваральнікі маладзёжнага інтэрактыўнага праекта «Пін_код» тэлеканала «Беларусь 2». Адна з работ, якая дайшла да фіналу і была высока ацэнена расказвае гісторыю невялікага возера Сіняе каля вёскі Сасноўка. Яе аўтарамі сталі Ірына Шыкалава і Мікіта Галавачэнка са Светлагорска. «Пра конкурс расказала наш педагог-арганізатар, потым мы знайшлі ідэю і пачалі яе распрацоўваць. Разам са зборам інфармацыі і здымкамі роліка спатрэбілася каля двух тыдняў, каб стварыць гэты невялікі міні-фільм пра нашу малую радзіму, а дакладней пра возера, якое ёсць у нашай мясцовасці», — апавядае Ірына Шыкалава.

Усяго на суд журы ў намінацыі «Відэаматэрыял» было прадстаўлена 24 работы. Геаграфічна тут можна сустрэць удзельнікаў з розных куточкаў Беларусі. Відэаролікі розныя па змесце і ўзроўні майстэрства, але самае важнае, што ёсць жаданне расказаць іншым пра тую мясцовасць, дзе жывеш, з якой пачынаецца шлях у вялікае жыццё.

— Прыемна, што дзякуючы такім конкурсам нашы дзеці пачынаюць праяўляць цікавасць да гісторыі іх малой радзімы. Мы як людзі, звязаныя з тэлебачаннем, таксама зацікаўлены ў такіх мерапрыемствах, бо яны даюць магчымасць убачыць таленавітых людзей, якім у перспектыве можна прапанаваць супрацоўніцтва ў нашым праекце ў якасці пазаштатных аўтараў, — падзяліўся кіраўнік праграмы «Пін_код» Ягор Шолькін. — У эфіры мы дэманстравалі фрагменты найлепшых відэа. Таксама адзначым пераможцаў сертыфікатамі на заняткі ў кінашколе.

Яшчэ юныя журналісты ці тыя, хто толькі прыглядаецца сёння да гэтай прафесіі, атрымаюць магчымасць трапіць на бліцстажыроўку ў Белтэлерадыёкампаніі, паўдзельнічаць у працэсе здымак, трапіць на прамы эфір. 1-е месца ў намінацыі «Відэаматэрыял» прысудзілі вучню сярэдняй школы № 3 горада Кобрына Савелію Прохараву, другое занялі навучэнцы Брэсцкага абласнога цэнтра маладзёжнай творчасці Данііл Хаменка, Настасся Грышанава, Кацярына Захарэвіч, Ганна Трацюк, а на 3-м аказаліся Вераніка Каваленка, Вікторыя Працко і Міхаіл Савошка, якія займаюцца ў Чачэрскім раённым цэнтры творчасці дзяцей і моладзі.

Загадчык сектара па рабоце з моладдзю Нацыянальнага цэнтра творчасці дзяцей і моладзі Настасся Сайчык расказала «Звяздзе»: «На заключным этапе конкурсу мы атрымалі 88 заявак ад болей чым 100 удзельнікаў — яны апавядалі пра родныя мясціны, гісторыі абрадаў, вуліцы, закраналі і многія іншыя тэмы».

Алена ДРАПКО

Фота Таццяны ТКАЧОВАЙ

Загаловак у газеце: У аб'ектыве — малая радзіма

Выбар рэдакцыі

Грамадства

Нацыянальная акадэмія навук ініцыюе стварэнне народнага летапісу Вялікай Айчыннай вайны

Нацыянальная акадэмія навук ініцыюе стварэнне народнага летапісу Вялікай Айчыннай вайны

Навукоўцы звяртаюцца да кіраўніцтва абласных і раённых выканаўчых камітэтаў, устаноў адукацыі і культуры, грамадскіх арганізацый, усіх зацікаўленых грамадзян з просьбай разгарнуць работу па зборы ўспамінаў і фатаграфій удзельнікаў падзей Вялікай Айчыннай вайны.

Грамадства

Зіновій Прыгодзіч. Успаміны пра архітэктара Леаніда Левіна. Пайшоў, каб застацца...

Зіновій Прыгодзіч. Успаміны пра архітэктара Леаніда Левіна. Пайшоў, каб застацца...

З Леанiдам Левiным, славутым нашым архiтэктарам, мяне пазнаёмiў Генадзь Бураўкiн — яго даўнi, харошы сябра.

Грамадства

«Дзякуй участковаму — ён нас добра беражэ». Як міліцыя праводзіць прафілактычны рэйд падчас сітуацыі з каранавірусам

«Дзякуй участковаму — ён нас добра беражэ». Як міліцыя праводзіць прафілактычны рэйд падчас сітуацыі з каранавірусам

«Без мiлiцыi мы нiяк», — рэзюмаваў Прэзiдэнт Беларусi Аляксандр Лукашэнка падчас сустрэчы з мiнiстрам унутраных спраў Юрыем Караевым, маючы на ўвазе сiтуацыю з каранавiрусам. 

Грамадства

Чым сябе заняць на самаiзаляцыi?

Чым сябе заняць на самаiзаляцыi?

Урачы па ўсiм свеце запусцiлi флэшмоб #StayAtHome.