Вы тут

Фестываль «Бярэзіна» у Барысаве сабраў некалькі тысяч гледачоў і ўдзельнікаў


Міжнародны фестываль ваенна-гістарычнай рэканструкцыі «Бярэзіна», прысвечаны 207-й гадавіне падзей вайны 1812 года, прайшоў у выхадныя ў Барысаве і сабраў некалькі тысяч гледачоў і ўдзельнікаў з Беларусі, Расіі, Польшчы і Францыі.


Упершыню на фестывалі адбыўся заплыў цераз Бярэзіну. Каля васьмі дзясяткаў падрыхтаваных спартсменаў-аматараў вырашыліся ўшанаваць памяць французскіх пантанераў, дзякуючы якім армія Напалеона, несучы вялікія страты, усё ж пераправілася на другі бераг па наведзеных мастах і працягнула адступленне. З тых часоў, нагадаў удзельнік «Бярэзіны» 2019 года Надзвычайны і Паўнамоцны пасол Францыі ў Беларусі Дзідзье Канес, у яго роднай мове захавалася слова berezіna як абазначэнне катастрофы — а праз некалькі стагоддзяў славутая рака зноў злучыла беларусаў і французаў, але ўжо ў мірнай справе рэканструкцыі.

Фарсіраванне ледзяной Бярэзіны праходзіла пад акампанемент ваеннага аркестра дэсантнікаў з Тулузы і ўрыўкі з твораў Віктора Гюго, якія чыталі ў арыгінале барысаўскія школьнікі, а ўсіх плыўцоў на другім беразе сустракалі апладысментамі і сімвалічным прызам — капелюшом-двухвуголкай. Змерзлых сагравалі чаем, «імператарскай» кашай, паходнай лазняй. Увечары ў гарадскім доме культуры прайшоў грамадскі баль — адкрыты для ўсіх ахвотных, але з абавязковым дрэс-кодам у стылі ампір.

У нядзелю ж адбыліся ўскладанне кветак да помнікаў загінулым салдатам — у цырымоніі ўзялі ўдзел прадстаўнікі Барысаўскага раённага і Мінскага абласнога выканкамаў і замежныя дыпламаты. А галоўнай падзеяй дня стала відовішчная рэканструкцыя баталіі на Брылёўскім полі, якую ажыццявілі ўдзельнікі больш чым 50 гістарычных клубаў з розных краін.

Дарэчы, як адзначаюць арганізатары барысаўскага фестывалю, на сённяшні дзень ён уваходзіць у пяцёрку найбуйнейшых рэканструкцый па напалеоніцы ў свеце — і безумоўна будзе развівацца надалей, аб'ядноўваючы ўсё больш знаўцаў і аматараў гісторыі.

Вікторыя ЦЕЛЯШУК

Фота БелТА

Загаловак у газеце: «Узяць» Бярэзіну ўплаў

Выбар рэдакцыі

Культура

Дзяніс Раманюк: Я раблю этнаграфію «дваццаць пятым» кадрам

Дзяніс Раманюк: Я раблю этнаграфію «дваццаць пятым» кадрам

Пышныя альбомы, выдадзеныя Дзянісам Раманюком, з задавальненнем трымаюць у хатніх бібліятэках як беларусы, бо адчуваюць гонар за краіну, так і замежнікі, бо невядомую культуру даследуюць праз высакакласны кніжны твор.

Грамадства

Санны рэйд. Як партызаны здзейснілі пераможную аперацыю на Палессі ў 1942-м

Санны рэйд. Як партызаны здзейснілі пераможную аперацыю на Палессі ў 1942-м

Сёлетняя зіма на снег, скажам прама, зусім небагатая. Але ў лютым і сакавіку 1942 года, калі пра глабальнае пацяпленне ніхто і не чуў, снегу было вельмі шмат.

Спорт

Барэц Максім Нягода: Пасля кожнага медаля трэба пачынаць з нуля

Барэц Максім Нягода: Пасля кожнага медаля трэба пачынаць з нуля

Барысаўчанін са шматдзетнай сям'і стаў чэмпіёнам кантынента.

Культура

Хто спявае па-беларуску?

Хто спявае па-беларуску?

Адмысловы плэйліст “Звязды” да Дня роднай мовы.