Вы тут

Дзевяцікласнік стварыў электронную кнігу для невідушчых


Стварыць свой сайт, правесці экскурсію па невядомых месцах, убудаваць у дом АRM-мікракантролер або зрабіць электронную кнігу для невідушчых дзяцей — гэта толькі малая частка таго, што яны могуць. Менавіта з такімі ініцыятыўнымі, амбіцыйнымі і, безумоўна, таленавітымі хлопцамі і дзяўчатамі мы пазнаёміліся на Мінскім абласным этапе конкурсу работ даследчага характару навучэнцаў устаноў агульнай сярэдняй і прафесійнай адукацыі.


Пе­ра­мож­цы прад­ста­вяць Мін­скую воб­ласць  на за­ключ­ным эта­пе рэс­пуб­лі­кан­ска­га  кон­кур­су ў 2020 го­дзе.

У гонар Года малой радзімы многія яго ўдзельнікі заняліся даследаваннем сваёй краіны і развіццём турызму. Так, напрыклад, Уладзіслаў Данілковіч, вучань 11 класа Мінскага дзяржаўнага абласнога ліцэя, стварыў экскурсію па дузе Струвэ.

— Яна была створана каля 150 гадоў таму з мэтай дакладна вымераць форму і памеры Зямлі, уяўляе сабой сетку з геадэзічных пунктаў, якая праходзіць па шэрагу краін. У Беларусі такіх 19, пяць уваходзяць у спадчыну ЮНЕСКА. Менавіта па іх і па славутасцях, што знаходзяцца побач, мы і задумалі пракласці наш турыстычны маршрут. Калі правялі пробную экскурсію, надумалі зрабіць на сайце электронную карту для любога, хто жадае азнаёміцца. Збіраемся працягваць праект, спадзяюся, што пачынанні перарастуць у штосьці маштабнае, — падзяліўся юнак.

Вучаніца 10 класа Турэц-Баярскай сярэдняй школы Маладзечанскага раёна Вікторыя Паўлоўская вырашыла ўдасканаліць звыклую ўсім форму экскурсіі і стварыла мабільную праграму, якая дазваляе праходзіць адмысловы квэст на аснове тапанімічнага матэрыялу.

— Па тых, хто побач, — сябрах, аднакласніках — я зразумела, што вельмі мала хто з нас сам праяўляе жаданне з'ездзіць на якую-небудзь экскурсію. У асноўным, усе цяпер проста «заліпаюць» у тэлефонах. Таму і вырашыла аб'яднаць мабільныя гаджэты і магчымасць пазнаць нашу краіну. З дапамогай навуковага кіраўніка зрабіла праграму, праз якую кожны можа не толькі пазнаёміцца з прыродай і славутасцямі таго ці іншага раёна, але і прайсці розныя тэматычныя заданні.

Падобная ідэя ўзнікла і ў Ягора Шыкаўца, вучня 10 класа нарачанскай сярэдняй школы № 2 Мядзельскага раёна. Яго праект — вэб-сайт «Мая Нарач» — для прыцягнення турыстаў на сваю малую радзіму.

— Адкрыўшы яго, можна адразу ўбачыць інфармацыю аб возеры і нашым курортным пасёлку, розныя навіны, фотагалерэю. А яшчэ ёсць віртуальная карта, дзе госці Нарачы могуць паглядзець усе славутасці і адразу выбраць сабе жаданы маршрут. Цяпер мы працягваем удасканальваць сайт: распрацоўваем рэкламу, паляпшаем афармленне і тэхнічныя магчымасці, у прыватнасці, плануем увесці розныя мовы для наведвальнікаў. Я лічу, што пра Нарач павінны даведацца як мага больш людзей, бо гэта не проста возера, а самы прыгожы і вялікі курорт Беларусі, — расказаў Ягор.

У час інфармацыйных тэхналогій цяжка адкрыць нешта новае ў гэтай сферы, але ўдзельнікі конкурсу здолелі здзівіць журы. Іх вынаходкі аказаліся не толькі цікавымі, але і карыснымі.

Максім Жыдовіч, вучань 11 класа дзяржынскай гімназіі № 1, прадставіў праграму кросплатформеннага «разумнага дома» на АRM-мікракантролеры. Яна дазваляе кантраляваць усе электрычныя прыборы і святло ў жыллі і кіраваць імі.

— Гэтая праграма не з'яўляецца навінкай у свеце, проста ў Беларусі яна чамусьці не так папулярная, як за мяжой. Аднак у майго праекта ёсць некалькі адметнасцяў, якія робяць яго лепшым за замежныя аналагі. Калі выводзіць яе на рынак, яна будзе ў некалькі разоў таннейшай, дзякуючы выкарыстаным матэрыялам. Не трэба купляць ніякага габарытнага абсталявання, рэгістравацца, нават інтэрнэт не патрэбны, трэба проста падключыцца да сістэмы і ўвесці ў пошукавы радок патрэбны ІР-адрас. І вы зможаце кантраляваць свой дом з любой часткі свету, — расказаў аўтар распрацоўкі.

Вучань 9 класа бярэзінскай гімназіі Кірыл Цітоў узняў важную сацыяльную праблему і змог знайсці яе рашэнне. Ён стварыў электронную кнігу для невідушчых.

— Гэта, хутчэй, буквар для дзяцей, — патлумачыў хлопец. — Для яго мы абралі найбольш распаўсюджаны шрыфт Брайля. Наш праект яшчэ не завершаны, мы будзем развіваць яго. Хочацца, каб у будучыні такія электронныя кнігі палегчылі жыццё людзям без зроку.

Ангеліна НОВІКАВА, студэнтка ІІІ курса Беларускага дзяржаўнага ўніверсітэта культуры і мастацтваў

Загаловак у газеце: З характарам даследчыка

Выбар рэдакцыі

Грамадства

Вясёлыя гісторыі чытачоў

Вясёлыя гісторыі чытачоў

Пра стасункі, армію і падарункі.

Грамадства

Вайна пакінула яму жыццё, але забрала блізкіх. Завіталі да клічаўскага ветэрана вайны Міхаіла Фельдмана

Вайна пакінула яму жыццё, але забрала блізкіх. Завіталі да клічаўскага ветэрана вайны Міхаіла Фельдмана

Нягледзячы на свае 96, Міхаіл Фельдман выглядае на зайздрасць бадзёрым і маладжавым. 

Грамадства

Прыёмная кампанія: да чаго рыхтавацца?

Прыёмная кампанія: да чаго рыхтавацца?

Зроблены першы крок да аб'яднання экзаменаў.