«Звязда» пабывала на здымках «Талента краіны»

Ужо ў гэту суботу на АНТ вялікая прэм'ера: чацвёрты тэлесезон рэспубліканскага творчага конкурсу «Талент краіны», удзел у якім бяруць дзеці з усіх куткоў Беларусі. Сёлета на кастынгу іх было каля 700, але ў праект ужо традыцыйна прайшлі толькі 48 нумароў — салістаў і калектываў да трох чалавек, а пераможцамі ў снежні стануць усяго двое. «Звязда» пабывала на здымках новага сезона і даведалася, што змянілася ў праекце і чым удзельнікі гатовыя ўразіць гледачоў.

Фармат творчага спаборніцтва захоўваецца — юныя артысты ад 5 да 15 гадоў, падзеленыя на дзве ўзроставыя катэгорыі, дэманструюць свае здольнасці ў чатырох намінацыях: інструментальнае мастацтва, вакал, харэаграфія і арыгінальны жанр, ад дэкламацыі да акрабатыкі і цыркавых нумароў. Сёлета сярод прэтэндэнтаў на галоўны прыз — грант ад спецфонду Прэзідэнта па падтрымцы таленавітай моладзі — прадстаўнікі Мінска і сталічнай вобласці (іх пераважная большасць), Магілёва, Бабруйска, Рагачова, Петрыкава, Оршы, Гродна, Ліды, Дзятлава, Брэста, Жабінкі, некалькіх вёсак і аграгарадкоў.

Журы, якое ўзначальвае рэктар Акадэміі музыкі прафесар Кацярына Дулава, не выстаўляе балы ці «смайлікі», як летась. «Суддзі называюць імёны найлепшых у чатырох намінацыях, а пятага ўдзельніка паўфіналу з дапамогай спецыяльных пультаў вызначаць удзельнікі і фіналісты мінулых сезонаў праекта, — расказала кіраўнік дырэкцыі спецпраектаў АНТ Алена Лобач. — Мы захавалі таксама пакой, у якім бацькі і настаўнікі ў рэжыме рэальнага часу змогуць бачыць выступленні юных артыстаў».

Цяпер пра перамены. «Талент краіны — 4» пераехаў на новую пляцоўку. Адборачныя канцэрты праходзяць у сталічным ДК МАЗ, таму сцэна ў параўнанні з ранейшымі сезонамі адносна невялікая, а зала — больш утульная.

Змяніўся склад вядучых: у тандэме з Яўгенам Булкам працуе оперная спявачка, прызёрка міжнародных конкурсаў класічнай музыкі Маргарыта Ляўчук — летась яна была ў журы, а цяпер апынулася па другі бок барыкад. Вядучая Надзея Клемянцёнак таксама не пакінула праект — яна сядзіць у зале з былымі ўдзельнікамі конкурсу і запрошанымі экспертамі творчай сферы, якія падтрымліваюць канкурсантаў.

Ужо на першых адборачных канцэртах юныя артысты прадэманстравалі такі артыстызм і тэхнічную дасканаласць, што нават прафесійнае журы гублялася, як тут можна кагосьці адсеяць. «Удзельнікі не перастаюць нас прыемна здзіўляць і ўражваць, і я ўпэўнена, што ў кожнага з іх вялікая будучыня», — падкрэслівае старшыня журы.

Хочаце даведацца, як за тры хвіліны прайсці шлях ад каралевы да каровы, чым падобныя кантэмпарары і класічны балет, чаму гітара ўсё ж такі ўдарны інструмент і каго Яўген Крыжаноўскі гатовы хоць заўтра ўзяць у свой прадзюсарскі цэнтр? Адказ у выпусках «Талента краіны — 4» — кожную суботу, пачынаючы з 16 лістапада.

Вікторыя ЦЕЛЯШУК, фота аўтара